മുപ്പത്തിയഞ്ച് വര്‍ഷത്തെ സിനിമാ ജീവിതം. പയ്യനായും അനിയനായും വിദ്യാര്‍ത്ഥിയായും പ്രേക്ഷകരുടെ മനസില്‍ ഇടംപിടിച്ച നടനാണ് സുധീഷ്. മലയാളിക്ക് സുധീഷ് ഇപ്പോഴും മണിച്ചിത്രത്താഴിലെ നിഷ്‌കളങ്കനായ ചെക്കന്‍ കിണ്ടിയാണ്.

ഇപ്പോഴിതാ ക്രൂരനായ വില്ലനായി എത്തുകയാണ് സുധീഷ്. ധ്യാന്‍ ശ്രീനിവാസനെ നായകനാക്കി സാഗര്‍ ഹരി രചനയും സംവിധാനവും നിര്‍വ്വഹിക്കുന്ന സത്യം മാത്രമേ ബോധിപ്പിക്കു എന്ന ചിത്രത്തിലാണ് സുധീഷ്, മാത്യു എന്ന കിടിലന്‍ വില്ലനായി അഭിനയിക്കുന്നത്.

സുധീഷിന്റെ പുതിയ കഥാപാത്രത്തെക്കുറിച്ച് നടനും സുഹൃത്തുമായ ബിജു മേനോന്‍ സോഷ്യല്‍ മീഡിയയില്‍ കുറിച്ചത് ഇങ്ങനെയാണ്.

ഒരുപാട് കാലത്തെ ബന്ധമുണ്ട്, ഓര്‍ത്തു പറയാന്‍ പറ്റാത്ത അത്രയും ആഴത്തിലുള്ള ഹൃദയ ബന്ധം, നടന്‍ സുധീഷ് എന്ന സഹോദര തുല്യനായ കലാകാരനെ അഭിനന്ദിക്കുന്നതില്‍ സന്തോഷം. സത്യം മാത്രമേ ബോധിപ്പിക്കു എന്ന സാഗര്‍ ഹരിയുടെ സംവിധാനത്തില്‍ ധ്യാന്‍ ശ്രീനിവാസന്‍ നായകനായ ചിത്രത്തില്‍ എന്നെ പോലെ തന്നെ ലോകമെമ്പാടുമുള്ള സിനിമാപ്രേമികള്‍ക്ക് മനസ്സില്‍ എടുത്തു വെക്കാന്‍ പാകത്തില്‍ ഒരു കഥാപാത്രത്തെ നല്‍കിയത് സുധീഷ് ആണ്. കഴിഞ്ഞ മുപ്പത്തിയഞ്ച് വര്‍ഷത്തെ അദ്ദേഹത്തിന്റെ സിനിമ ജീവിതത്തില്‍ ഓര്‍ത്തു വെക്കാനും ഏറ്റവും മികച്ചതെന്ന് പറയാനും ഈ ചിത്രത്തിലെ മാത്യൂ എന്ന വില്ലന്‍ വേഷം ധാരാളം.

ഒരു സുഹൃത്തെന്ന നിലയില്‍ ഒരു സഹോദരാണെന്ന നിലയില്‍ ഒരേ മേഖലയില്‍ ജോലി ചെയ്യുന്ന സഹപ്രവര്‍ത്തകനെന്ന നിലയില്‍ തീര്‍ച്ചയായും ഈ അവസരം അദ്ദേഹത്തെ അഭിനന്ദിക്കാന്‍ ഉപയോഗപ്പെടുത്തട്ടെ, ഇനിയും ഇത്തരത്തില്‍ ഒട്ടനവധി കഥാപാത്രങ്ങള്‍ താങ്കളെ തേടിയെത്തുമെന്ന് ഉറപ്പാണ്. ഉയരങ്ങള്‍ കീഴടക്കട്ടെ. ആശംസകള്‍, വീണ്ടും ഒരിക്കല്‍ കൂടി അഭിനന്ദനങ്ങള്‍!

ശ്രീവിദ്യയാണ് ചിത്രത്തിലെ നായിക. ഒരു സസ്പെന്‍സ് റിവഞ്ച്ക്രൈം ത്രില്ലര്‍ ചിത്രമാണ് സത്യം മാത്രമേ ബോധിപ്പിക്കു. ചിത്രത്തിന്റെ ക്യാമറ ധനേഷ് രവീന്ദ്രനാഥ് നിര്‍വ്വഹിക്കുന്നു, എഡിറ്റിങ്ങ് അജീഷ് ആനന്ദ്, പശ്ചാത്തല സംഗീതം ഒരുക്കിയിരിക്കുന്നത് വില്യംസ് ഫ്രാന്‍സിസ് ആണ്.