മരിക്കാത്ത ഒരുപിടി ഗാനങ്ങളിലൂടെ മലയാള സംഗീത പ്രേമികളുടെ മനം കവര്‍ന്ന എം.ബി ശ്രീനിവാസന്‍ മണ്‍മറഞ്ഞിട്ട് ഇന്നേക്ക് 33 വര്‍ഷം. വരികളുടെ അര്‍ത്ഥം പൂര്‍ണമായി ഉള്‍കൊണ്ട്, തനിക്ക് മാത്രം സാധ്യമാകുന്ന ശൈലിയിലൂടെ, കേള്‍ക്കുന്ന ഏതൊരാളുടെയും മനസ്സില്‍ പതിയും വിധം സംഗീതമൊരുക്കിയ മാന്ത്രികനായിരുന്നു എംബിഎസ്. അത്രമേല്‍ ലളിതമായിരുന്നു അദ്ദേഹത്തിന്റെ ഈണങ്ങള്‍. കേള്‍ക്കുന്ന മാത്രയില്‍ തന്നെ എംബിഎസിന്റെ സംഗീതമാണെന്ന് തിരിച്ചറിയാന്‍ പാകത്തിന് വ്യക്തിത്വമുള്ളവയായിരുന്നു അദ്ദേഹത്തിന്റെ ഓരോ ഈണങ്ങളും.

ഒരിക്കലും മറക്കാനാകാത്ത നിരവധി ഗാനങ്ങളാണ് എംബിഎസ് മലയാളികള്‍ക്ക് സമ്മാനിച്ചത്. ചിരിക്കുമ്പോള്‍ കൂടെ ചിരിക്കാന്‍ എന്ന ഗാനം ഇന്നും ഓരോരുത്തരുടെയും ഉള്ളില്‍ മായാതെ നില്‍ക്കുന്നതില്‍ അദ്ദേഹത്തിന്റെ ഈണം വഹിച്ച പങ്ക് ചെറുതല്ല. ഉള്‍ക്കടല്‍ എന്ന ചിത്രത്തിലെ ശരബിന്ദു മലര്‍ദീപ നാളം നീട്ടി എന്ന ഗാനത്തിലൂടെ പി.ജയചന്ദ്രനും സെല്‍മ ജോര്‍ജും എത്ര അനായസമായാണ് ശ്രോതാക്കളെ ആ ഗാനത്തിലേക്ക് ലയിപ്പിച്ചതെന്നും നമുക്കറിയാവുന്നതാണ്. വേറിട്ട ശൈലിയിലൂടെ പ്രണയവും വിരഹവും എംബിഎസ് മലയാളിക്ക് മുന്നില്‍ അവതരിപ്പിച്ചു.

1961 ല്‍ കാല്‍പ്പാടുകള്‍ എന്ന ചിത്രത്തിലൂടെ ഗാനഗന്ധര്‍വന്‍ കെ.ജെ യേശുദാസിനെ മലയാള സംഗീത ലോകത്തേക്ക് അവതരിപ്പിച്ചതും എം.ബി ശ്രീനിവാസനായിരുന്നു. തമിഴ് സംഗീത ലോകത്ത് നിന്നായിരുന്നു അദ്ദേഹം മലയാളത്തിലേക്ക് കടന്നുവരുന്നത്. അടൂര്‍ ഗോപാലകൃഷ്ണന്‍, എം.ടി, കെ.ജി ജോര്‍ജ് തുടങ്ങിയ പ്രഗത്ഭരായ സംവിധായകര്‍ക്കൊപ്പം മലയാള സംഗീത ലോകത്തെ അവിഭാജ്യ ഘടകമായി അദ്ദേഹം മാറുകയായിരുന്നു.

1973, 1978, 1979, 1981 എന്നീ വര്‍ഷങ്ങളില്‍ മികച്ച സംഗീത സംവിധായകനുള്ള സംസ്ഥാന അവാര്‍ഡും, 1987ല്‍ സംസ്ഥാന സര്‍ക്കാരിന്റെ സ്‌പെഷ്യല്‍ ജൂറി അവാര്‍ഡും അദ്ദേഹത്തെ തേടിയെത്തി.

1988 മാര്‍ച്ച് 9ന് ഹൃദയാഘാതത്തെ തുടര്‍ന്നായിരുന്നു അദ്ദേഹത്തിന്റെ അന്ത്യം. അതുല്യപ്രതിഭയുടെ ഓര്‍മകള്‍ക്ക് മുന്നില്‍ സ്‌നേഹാഞ്ജലികള്‍...