ആരാധകർക്ക് ദീപാവലി സമ്മാനമൊരുക്കി ജയസൂര്യയും വെള്ളം സിനിമ ടീമും.ദീപാവലി സമ്മാനമായി റീലിസ് ചെയ്ത "ഒരു കുറി കണ്ട്" എന്നു തുടങ്ങുന്ന ഗാനം ഇതിനോടകം വൈറലായി കഴിഞ്ഞു. ജയസൂര്യ, പ്രജേഷ് സെൻ കൂട്ടുകെട്ടിൽ പുറത്തിറങ്ങുന്ന "വെള്ളം "എന്ന ചിത്രത്തിലെ പുതിയ ഗാനമാണ് പുറത്തിറക്കിയത്. ബി.കെ.ഹരിനാരായണന്റെ വരികൾക്ക് ബിജിപാലാണ് സംഗീതം നൽകിയിരിക്കുന്നത്. പുതിയൊരു ഗായകനെയും ഈ പാട്ടിലൂടെ അവതരിപ്പിച്ചിട്ടുണ്ട്. കണ്ണൂർ തളിപ്പറമ്പ് സ്വദേശിയായ വിശ്വനാഥനാണ് ഈ ഗാനം ആലപിച്ചിരിക്കുന്നത്.

കണ്ണൂരിലെ മുഴുക്കുടിയനായ മുരളി എന്നയാളുടെ കഥയാണ് ചിത്രം പറയുന്നത്. ഷാപ്പിന്റെ പശ്ചാത്തലത്തിലാണ് പുതിയതായി പുറത്തു വന്ന ഗാനം ചിത്രീകരിച്ചിരിക്കുന്നത്. മുൻപ് പുലരിയിലച്ഛന്റെ എന്ന് തുടങ്ങുന്ന ഗാനം പുറത്തു വന്നിരുന്നു.നിതീഷ് നടേരിയുടെ വരികൾ മനോഹരമാക്കിയത് അന്ധതയെ അതിജീവിച്ച കണ്ണൂർക്കാരിയായ അനന്യയാണ്.

ഫ്രണ്ട്‍ലി പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, യദുകൃഷ്ണ, രഞ്ജിത്ത് മണബ്രക്കാട്ട് എന്നിവർ ചേർന്ന് നിർമിച്ചിരിക്കുന്ന പൂർണമായും സിങ്ക് സൗണ്ട് ആയി ചിത്രീകരിച്ച വെള്ളം ഇപ്പോൾ റിലീസിന് ഒരുങ്ങിയിരിക്കുകയാണ്.

ജയസൂര്യയുടെ നായികമാരായി എത്തുന്നത് സംയുക്തമേനോൻ, സ്നേഹ പാലിയേരി എന്നിവരാണ്. സിദ്ധിഖ്, ഇന്ദ്രൻസ്, ബൈജു, ശ്രീലക്ഷ്മി, പ്രിയങ്ക, ജോണി ആന്റണി, ഇടവേള ബാബു, വെട്ടുകിളി പ്രകാശ്, നിർമൽ പാലാഴി, സന്തോഷ് കീഴാറ്റൂർ, ശിവദാസ് മട്ടന്നൂർ, ജിൻസ് ഭാസ്കർ, ബേബി ശ്രീലക്ഷ്മി എന്നിവർക്കൊപ്പം മുപ്പതോളം പുതുമുഖതാരങ്ങളും ചിത്രത്തിൽ അണി നിരക്കുന്നുണ്ട്. ചിത്രം വിതരണത്തിന് എത്തിക്കുന്നത് സെൻട്രൽ പിക്ചേഴ്സാണ്.

ക്യാമറ റോബി വർഗീസ്, എഡിറ്റിങ് ബിജിത്ത് ബാല, കലാസംവിധാനം അജയ് മാങ്ങാട്, കോസ്റ്റ്യൂം അരവിന്ദ്.കെ.ആർ, സൗണ്ട് ഡിസൈൻ അരുൺ വർമ്മ, മേക്കപ്പ് ലിബിൻ മോഹനൻ,ത്രിൽസ് മാഫിയ ശശി,കൊറിയോഗ്രഫി സജ്ന നജാം, പ്രൊജക്ട് ഡിസൈൻ ബാദുഷ, പ്രൊഡക്ഷൻ കൺട്രോളർ സുധ‍ർമൻ വള്ളിക്കുന്ന്, ചീഫ് അസോ.ഡയറക്ടർ ഗിരീഷ് മാരാർ, അസോ.ഡയറക്ടർ ജിബിൻ ജോൺ, സ്റ്റിൽസ് ലെബിസൺ ഗോപി, ഡിസൈൻ താമിർ ഓ കെ,
പിആർഒഎ. എസ്. ദിനേശ് ,വാഴൂർ ജോസ്, മഞ്ജു ഗോപിനാഥ് എന്നിവരാണ്.