വെളിപാടിന്റെ പുസ്തകം രണ്ടാം ഗാനവും പുറത്തിറങ്ങി. നീയും നിനക്കുള്ളൊരീ ഞാനും എന്നു തുടങ്ങുന്ന ഗാനമാണ് പുറത്തിറങ്ങിയിരിക്കുന്നത്. മോഹന്‍ലാലിനെ നായകനാക്കി ലാല്‍ ജോസ് ഒരുക്കുന്ന ചിത്രമാണ് വെളിപാടിന്റെ പുസ്തകം. വയലാര്‍ ശരത് ചന്ദ്ര വര്‍മ്മയുടെ വരികള്‍ക്ക് ഷാന്‍ റഹ്മാന്റെ സംഗീതത്തില്‍ മധു ബാലകൃഷ്ണനും വൃന്ദ ഷമീക്കും ചേര്‍ന്നാണ് ഗാനാലാപനം.

ചിത്രത്തിന്റെ ടീസറും പുറത്തിറങ്ങിയിട്ടുണ്ട്. ടീസറില്‍ സൈക്കിള്‍ ചവിട്ടിയെത്തുന്ന മോഹന്‍ലാലിനെയാണ് കാണാനാകുക. മൈക്കിള്‍ ഇടിക്കുള എന്ന കഥാപാത്രമായാണ് മോഹന്‍ലാല്‍ അവതരിപ്പിക്കുന്നത്. കോളേജില്‍ പുതുതായി ചുമതല ഏല്‍ക്കുന്ന പ്രൊഫസര്‍ മൈക്കിള്‍ ഇടിക്കുള എന്ന കഥാപാത്രത്തെയാണ് മോഹന്‍ലാല്‍ അവതരിപ്പിക്കുന്നത്. രണ്ടു ഗെറ്റപ്പിലാണ് ചിത്രത്തില്‍ മോഹന്‍ലാല്‍ പ്രത്യക്ഷപ്പെടുന്നത്.

ഗുരു ശിഷ്യ ബന്ധം പറയുന്ന ചിത്രത്തില്‍ അദ്ധ്യാപകരും വിദ്യാര്‍ത്ഥികളും തമ്മിലുള്ള ബന്ധം വരച്ചുകാട്ടുന്നു. ചിത്രത്തില്‍ അനൂപ് മേനോനും പ്രധാന കഥാപാത്രത്തെ അവതരിപ്പിക്കും. മുന്തിരി വള്ളികള്‍ക്ക് ശേഷം അനൂപ് മേനോനും ലാലുമൊന്നിച്ചുള്ള ചിത്രം കൂടിയാണിത്. അങ്കമാലി ഫെയിം അന്ന രേഷ്മയാണ് മോഹന്‍ലാലിന്റെ നായികയായെത്തുന്നത്. പ്രിയങ്കയും ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കും. സിദ്ദീക്ക്, കലാഭവന്‍ ഷാജോണ്‍, സലിം കുമാര്‍, ശിവജി ഗുരുവായൂര്‍ തുടങ്ങിയവരും ചിത്രത്തില്‍ അണിനിരക്കുന്നുണ്ട്.

ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂറിന്റെ നിര്‍മ്മാണത്തില്‍ ബെന്നി പി നായരമ്പലം തിരക്കഥയൊരുക്കുന്ന ചിത്രമാണിത്. കൂടാതെ മോഹന്‍ലാലും ലാല്‍ ജോസും ആദ്യമായി ഒന്നിക്കുന്ന ചിത്രം കൂടിയാണിത്. മാക്സ്ലാബ് സിനിമാസ് ആന്ഡ് എന്റര്‍ടെയ്ന്‍മെന്റാണ് ചിത്രം വിതരണം ചെയ്യുന്നത്.

തിരുവനന്തപുരം സെന്റ്സ് സേവിയേഴ്സ് കോളേജായിരുന്നു പ്രധാന ലൊക്കേഷന്‍. വിഷ്ണു ശര്‍മ്മ ഛായാഗ്രാഹവും ഷാന്‍ റഹ്മാന്‍ സംഗീത സംവിധാനവും നിര്‍വ്വഹിക്കും. റഫീക്ക് അഹ്മദ്, വയലാര്‍ ശരത് ചന്ദ്രവര്‍മ്മ, അനില്‍ പനച്ചീരാന്‍, സന്തോഷ് വര്‍മ്മ, മനു രഞ്ജിത്ത് എന്നിവരാണ് ഗാനരചന. ഓണം റിലീസായി ചിത്രം തിയേറ്ററുകളിലെത്തും.