ഉണ്ണീശോ... എന്ന ഗോപി സുന്ദറിന്റെ ക്രിസ്മസ് കരോൾ ഗാനം പ്രശസ്ത സിനിമാ താരമായ മഞ്ജു വാര്യർ പുറത്തിറക്കി. ഗോപി സുന്ദറും ഹരിനാരായണനും ആദ്യമായി ഒരുമിച്ചൊരുക്കുന്ന ക്രിസ്മസ് കരോൾ വീഡിയോ ഗാനം കൂടിയാണിത് എന്ന പ്രത്യേകതയുമുണ്ട്.

പുതുതലമുറയിലെ വളർന്നു വരുന്ന ഗായികയായ മെറിൽ ആൻ മാത്യുവിനൊപ്പം പ്രശസ്ത ഗായകരായ സിയ ഉൽ ഹഖ്, അക്ബർ ഖാൻ, സുജയ് മോഹൻ എന്നിവർ ചേർന്നാണ് ഗാനം ആലപിച്ചിരിക്കുന്നത്. ദേശി രാഗ് എന്ന ഗാനത്തിലൂടെ ശ്രദ്ധേയയായി മാറിയ മെറിൽ ആദ്യമായി ഗോപി സുന്ദറിന്റെ ഈണത്തിൽ പാടുന്നു എന്ന പ്രത്യേകതയും ഈ ഗാനത്തിനുണ്ട്.

തിരുപ്പിറവിയുടെ വാഴ്ത്തൽ മാത്രമല്ല തിരിച്ചു പിടിക്കലിന്റെയും പ്രതീക്ഷയുടെയും ഗാനം കൂടിയാണ് ഉണ്ണീശോ. നമുക്ക് നഷ്ടപ്പെട്ട കണ്ണീർക്കാലങ്ങളുടെയും, വറുതികളുടെയും അപ്പുറം പ്രതീക്ഷയുടെ ഒരു കിരണമുണ്ട്. ഒലീവിലയിൽ നിന്നിറ്റു വീഴുന്ന മഞ്ഞുതുള്ളി പോലെയുള്ള സ്‌നേഹവുമുണ്ടെന്നോർമിപ്പിക്കുക കൂടിയാണ് ഈ ഗാനം.

ഖത്തർ ദോഹയിലെ ബിർള പബ്ലിക് സ്‌കൂളിലെ ആറാം ക്ലാസുകാരിയാണ് മെറിൽ ആൻ മാത്യു. കണ്ണൂർ ആലക്കോട് അറക്കൽ മനോജ് മാത്യു-നിഷ വർഗീസ് ദമ്പതികളുടെ മകളാണ് മെറിൽ . പ്രശസ്ത സംഗീതാധ്യാപകരായ ശങ്കർ ദാസിന്റെയും അഭിലാഷിന്റേയും കീഴിൽ കർണാടിക് വെസ്‌റ്റേൺ സംഗീതം അഭ്യസിക്കുന്ന കൊച്ചു ഗായിക നിരവധി ആൽബങ്ങളിലും സ്‌റ്റേജ് ഷോകളിലും മുൻപ് പാടിയിട്ടുണ്ട്.

ഗോപിസുന്ദർ മ്യൂസിക് കമ്പനി നിർമ്മിക്കുന്ന ഈ വീഡിയോ ആൽബത്തിന്റെ ആശയവും സംവിധാനവും യൂസഫ് ലെൻസ്മാന്റെതാണ്. സോഷ്യൽ മീഡിയയിലൂടെ വൈറൽ താരങ്ങളായ ബൈസി ഭാസി, ഇവാനിയ നാഷ് എന്നിവരും ഈ വീഡിയോ ആൽബത്തിലൂടെ ശ്രദ്ധേയ വേഷങ്ങളിലെത്തുന്നുണ്ട്. ശ്രീജിത്ത് ഡാൻസ് സിറ്റി കൊറിയോഗ്രാഫി നിർവഹിക്കുമ്പോൾ ക്യാമറ യൂസഫ് ലെൻസ്മാൻ, മോഹൻ പുതുശ്ശേരി, അൻസൂർ. എഡിറ്റർ- രഞ്ജിത്ത് ടച്ച്‌റിവർ, പ്രൊജക്റ്റ് ഡിസൈനർ- ഷംസി തിരൂർ. പ്രൊജക്റ്റ് മാനേജർ- ഷൈൻ റായംസ്. പ്രൊജക്റ്റ് കോർഡിനേറ്റർ- ശിഹാബ് അലി. പിആർഒ- എ.എസ് ദിനേശ് എന്നിവ നിർവഹിക്കുന്നു.

പുറത്തിറങ്ങി മണിക്കൂറുകൾക്കുള്ളിൽ തന്നെ മികച്ച അഭിപ്രായങ്ങളാണ് ഈ ഗാനത്തിന് ലഭിച്ചിട്ടുള്ളത്.ഏതൊരു ആഘോഷങ്ങൾക്കിടയിലും എത്ര പ്രതിസന്ധികൾക്കിടയിലാണെങ്കിലും നമ്മൾ ഓർമിക്കപ്പെടേണ്ട മാനുഷിക സന്ദേശം ഈ ഗാനത്തിലുണ്ടെന്നുള്ള പ്രതേകത ഈ ഗാനത്തെ ശ്രദ്ധേയമാക്കുന്നു.