ആദ്യമായി മലയാള ചിത്രത്തില്‍ സണ്ണി ലിയോണ്‍ എത്തുന്നെന്ന വാര്‍ത്ത ഏറെ കൗതുകത്തോടെയും സന്തോഷത്തോടെയുമാണ് ആരാധകര്‍ ഏറ്റെടുത്ത്ത്. പിന്നാലെ ചിത്രം തീയേറ്ററുകളിലെത്തിയപ്പോഴും സണ്ണിലിയോണ്‍ ഏറെ ശ്രദ്ധിക്കപ്പെട്ടു. ഇപ്പോഴിതാ മമ്മൂട്ടി നായകനായെത്തിയ മധുരരാജയിലെ ബോളിവുഡ് സൂപ്പര്‍ നായിക സണ്ണി ലിയോണ്‍ തകര്‍ത്താടിയ ഐറ്റം ഡാൻസിൻ്റെ വീഡിയോ പുറത്ത് വിട്ടിരിക്കുകയാണ് അണിയറപ്രവര്‍ത്തകര്‍. മോഹ മുന്തിരി എന്ന് തുടങ്ങുന്ന ഗാനം ആലപിച്ചിരിക്കുന്നത് സിതാര കൃഷ്ണകുമാറാണ്. ബികെ ഹരിനാരായണൻ്റെ വരികൾക്ക് ഗോപി സുന്ദറാണ് ഈണം പകര്‍ന്നിരിക്കുന്നത്. കഥയില്‍ നിര്‍ണായക പങ്കുവഹിക്കുന്ന ഗാനം കൂടിയായിരുന്നു സണ്ണി ലിയോണിൻ്റെ ഈ ഗാനം.

അതേ സമയം മമ്മൂട്ടി നായകനായി എത്തിയ, മധുരരാജ ബോക്‌സ് ഓഫീസില്‍ മികച്ച പ്രകടനം തുടരുകയാണ്. ചിത്രം 50 കോടി ക്ലബ്ബിലെത്തിയെന്നതാണ് കളക്ഷന്‍ സംബന്ധിച്ച്‌ അണിയറപ്രവര്‍ത്തകര്‍ പുറത്തുവിട്ട പുതിയ വാര്‍ത്ത. പത്ത് ദിവസത്തിനുള്ളില്‍ 58.7 കോടി രൂപയാണ് മധുരരാജ മൊത്തം നേടിയത്. ആദ്യ ദിനം തന്നെ 9.12 കോടി രൂപ നേടിയിരുന്നു. വൈശാഖ് ആണ് ചിത്രം സംവിധാനം ചെയ്തത്.ഉദയ് കൃഷ്ണയായിരുന്നു ചിത്രത്തിന്റെ തിരക്കഥ എഴുതിയത്. 2010ല്‍ പ്രദര്‍ശനത്തിന് എത്തിയ പോക്കിരിരാജയുടെ രണ്ടാം ഭാഗമായിട്ടാണ് മധുരരാജ ഒരുക്കിയത്. ആദ്യ ഭാഗത്തിലെ നെടുമുടി വേണു, സലിംകുമാര്‍ തുടങ്ങിയവര്‍ മധുരരാജയിലുമുണ്ടായിരുന്നു. പുലിമുരുകനിലൂടെ മലയാളികളുടെ പ്രിയം പിടിച്ചുപറ്റിയ പീറ്റര്‍ ഹെയ്ന്‍ ആയിരുന്നു മധുരരാജയുടെ ആക്ഷന്‍ കൊറിയോഗ്രാഫി നിര്‍വഹിച്ചത്.