ഒരു ഇടവേളയ്ക്കു ശേഷം വീണ്ടും ബോളിവുഡിലേക്ക് തിരികെ വരാനൊരുങ്ങി നടൻ ആമിർ ഖാൻ. താരത്തിന്റെ സൂപ്പർ ഹിറ്റ് ചിത്രം ഗജിനിയുടെ രണ്ടാം ഭാഗം സംബന്ധിച്ച ചർച്ചകൾ അണിയറയിൽ നടക്കുന്നു എന്നാണ് റിപ്പോർട്ടുകൾ. അതേസമയം, സിനിമയെക്കുറിച്ചുള്ള ഔദ്യോഗിക പ്രഖ്യാപനങ്ങൾ ഒന്നും തന്നെ പുറത്തു വന്നിട്ടില്ല.

ആമിർ ഖാൻ തെലുങ്ക് സിനിമയിലെ പ്രമുഖ നിർമാതാവായ അല്ലു അരവിന്ദുമായി ചർച്ച നടത്തിയെന്നും ഇതിനായി താരം ഹൈദരാബാദിലെത്തിയെന്നുമാണ് പ്രചരിക്കുന്ന റിപ്പോർട്ടുകൾ. ഇരുവരും തമ്മിലുള്ള കൂടിക്കാഴ്ചയിൽ മറ്റു സിനിമകൾക്ക് വേണ്ടിയുള്ള ചർച്ചകളും നടന്നുവെന്നും റിപ്പോർട്ടിൽ പറയുന്നുണ്ട്. ഇതോടെ ആരാധകർക്കിടയിൽ ചർച്ചയായിരിക്കുകയാണ് ഗജിനി 2.

ALSO READ

ദി കേരള സ്റ്റോറിയുടെ പ്രദര്‍ശനങ്ങള്‍ റദ്ദാക്കി തിയറ്ററുകള്‍

ആമിർ ഖാന്റെ കരിയറിലെ വ്യത്യസ്‍തമായ കഥാപാത്രങ്ങളിൽ ഒന്നായിരുന്നു ഗജിനിയിലെ സഞ്ജയ് സിംഘാനിയ. ചിത്രത്തിന്‍റെ രണ്ടാം ഭാഗം എത്തിയാല്‍ ആമിറിന്‍റെ ബോക്സ് ഓഫീസ് തിരിച്ചുവരവ് യാഥാര്‍ഥ്യമാക്കുമെന്നാണ് ആരാധകർ പറയുന്നത്.

2022ൽ പുറത്തിറങ്ങിയ ലാൽ സിങ് ഛദ്ദയുടെ പരാജയത്തിന് ശേഷം സിനിമയിൽ നിന്ന് ആമിർ ഖാൻ ഇടവേള എടുക്കുകയായിരുന്നു. വലിയ പ്രതീക്ഷയോടെ തീയറ്ററുകളിൽ എത്തിയ താരത്തിന്റെ ചിത്രത്തിന് എന്നാൽ പ്രേക്ഷകരെ തൃപ്തിപ്പെടുത്താൻ കഴിയാതെ പോവുകയായിരുന്നു.

2005ൽ സൂര്യയെ നായകനാക്കി എ. ആർ മുരുഗദോസ് സംവിധാനം ചെയ്ത ചിത്രമാണ് ഗജിനി. തമിഴിൽ സൂപ്പർ ഹിറ്റായി മാറിയ ചിത്രം 2008ൽ ആമിർ ഖാനെ വെച്ച് സംവിധായകൻ മുരുകദോസ് തന്നെയാണ് ബോളിവുഡിൽ ഒരുക്കിയത്.