തമിഴകത്തെ സ്റ്റൈൽ മന്നൻ രജിനികാന്ത് ലോകമെമ്പാടും ആരാധകരുള്ള ഇന്ത്യൻ നടൻമാരിലൊരാളാണ്. പതിറ്റാണ്ടുകളായി തമിഴ് സിനിമയിൽ അഭിനയിക്കുന്ന താരത്തിന് വലിയ ആരാധകവൃന്ദമുണ്ട്.

ഇന്ത്യയിൽ തന്നെ ഏറ്റവും കൂടുതൽ സ്റ്റാർ വാല്യൂ ഉള്ള താരങ്ങളിൽ ഒരാൾ ആണ് രജിനികാന്ത്. അതുകൊണ്ട് തന്നെ താരത്തിന്റെ ഈ സ്റ്റാർ വാല്യൂ ദുരുപയോഗം ചെയ്യാൻ പലരും ശ്രമിക്കാറുണ്ട് അത്തരക്കാർക്ക് ഒരു മുന്നറിയിപ്പ് നോട്ടീസുമായി എത്തിയിരിക്കുകയാണ് താരത്തിന്റെ അഭിഭാഷകൻ.

രജിനികാന്തിന്റെ പേര്, ശബ്ദം, ചിത്രം തുടങ്ങിയവ അനധികൃതമായി ഉപയോഗിച്ച് താരത്തിന്റെ വ്യക്തിത്വ അവകാശങ്ങൾ ലംഘിക്കുന്നവർക്കെതിരെ സിവിൽ, ക്രിമിനൽ നടപടിയെടുക്കുമെന്ന പൊതു നോട്ടീസാണ് താരത്തിന്റെ അഭിഭാഷകൻ എസ്. ഇളംഭാരതി പുറത്തുവിട്ടിരിക്കുന്നത്.

നിരവധി കമ്പനികൾ അവരുടെ ഉൽപ്പന്നങ്ങൾ വിൽക്കാനായി ആളുകളുടെ ശ്രദ്ധയാകർഷിക്കാൻ രജിനികാന്തിന്റെ പേര്, ശബ്ദം, ചിത്രം, കാരിക്കേച്ചർ, ആർട്ടിഫിഷ്യൽ ഇന്റലിജൻസ് ചിത്രങ്ങൾ എന്നിവ ദുരുപയോഗം ചെയ്യുന്നതായി ശ്രദ്ധയിൽപ്പെട്ടിട്ടുണ്ടെന്നും അറിയിപ്പിൽ വ്യക്തമാക്കിയിട്ടുണ്ട്.

മുൻകൂർ അനുവാദമില്ലാതെ ഇത്തരം അനധികൃത ചിത്രങ്ങൾ ഉപയോഗിക്കുന്നത് പൊതുജനങ്ങൾക്കിടയിൽ ആശയക്കുഴപ്പവും വഞ്ചനയുമുണ്ടാക്കാൻ സാധ്യതയുണ്ടെന്ന് നോട്ടീസിൽ പറയുന്നു. രജിനികാന്തിന്റെ വ്യക്തിത്വം, പേര്, ശബ്ദം, പ്രതിച്ഛായ തുടങ്ങിയ കാര്യങ്ങൾ വാണിജ്യപരമായി ഉപയോഗിക്കാനുള്ള അവകാശം രജിനികാന്തിന് മാത്രമാണെന്നും നോട്ടീസിൽ പറയുന്നു.

 ALSO READ

മൂന്ന് ദിവസം കൊണ്ട് 300 കോടി കടന്ന് പഠാൻ... മന്നത്തിലും ഗംഭീര ആഘോഷം

താരത്തിന്റെ സമ്മതം കൂടാതെ മറ്റാർക്കും അത് വാണിജ്യപരമായി ചൂഷണം ചെയ്യാൻ കഴിയില്ലെന്നും നോട്ടീസിൽ വ്യക്തമാക്കുന്നു. ഒരു നടനെന്ന നിലയിലും മനുഷ്യനെന്ന നിലയിലും അദ്ദേഹത്തിന്റെ വ്യക്തിപ്രഭാവവും സ്വഭാവവും കാരണം അദ്ദേഹത്തിന് ലോകമെമ്പാടുമുള്ള ദശലക്ഷക്കണക്കിന് ആരാധകർ സൂപ്പർസ്റ്റാർ എന്ന പദവി കൊടുത്തു.

അദ്ദേഹത്തിന്റെ പ്രശസ്തിക്കോ വ്യക്തിപരമോ ആയ എന്തെങ്കിലും കാര്യത്തിന് കേടുപാടുകൾ സംഭവിച്ചാൽ അത് അദ്ദേഹത്തിന് വലിയ നഷ്ടം വരുത്തിവയ്ക്കുമെന്നും നോട്ടീസിൽ പറയുന്നു.