നടന്മാരുടെ സിനിമകൾ പരാജയപ്പെട്ടാലും അവർ തങ്ങളുടെ പ്രതിഫലം കുറക്കാറില്ലെന്ന് നടൻ ധ്യാൻ ശ്രീനിവാസൻ. ഒരു നടന്റെ മൂന്നും നാലും സിനിമകൾ പരാജയപ്പെട്ടിട്ടും അദ്ദേഹം ഇപ്പോഴും കോടിക്കണക്കിന് രൂപയാണ് പ്രതിഫലം വാങ്ങുന്നതെന്നും മാർക്കറ്റ് വാല്യൂ കുറയുമ്പോഴും ആരും സാലറി കുറക്കുന്നില്ലെന്നും അദ്ദേഹം പറഞ്ഞു.

തനിക്ക് ശേഷം സിനിമയിലേക്ക് വന്ന പലരും തന്റെ ഇരട്ടിയുടെ ഇരട്ടി പ്രതിഫലം വാങ്ങുന്നുണ്ടെന്നും അദ്ദേഹം പറഞ്ഞു. എഡിറ്റോറിയലിന് നൽകിയ അഭിമുഖത്തിലാണ് ധ്യാൻ ശ്രീനിവാസൻ ഇക്കാര്യങ്ങൾ പറഞ്ഞത്.

ഇപ്പോൾ ഞാൻ തെരഞ്ഞെടുത്തല്ല സിനിമ ചെയ്യുന്നത്. ഞാൻ ഇപ്പോൾ 30, 32 സിനിമകൾ കമ്മിറ്റ് ചെയ്തു. എനിക്ക് എങ്ങനെ ഇത്രയും സിനിമ വരുന്നു എന്നതിൽ എല്ലാർക്കും സംശയമുണ്ട്.

ഞാൻ വളരെ ലിമിറ്റഡ് ബജറ്റിലാണ് സിനിമകളെല്ലാം ചെയ്യുന്നത്. എന്നുവെച്ചാൽ ഇത്രയും ബജറ്റിൽ നിൽക്കുന്ന സിനിമകളാണ് ചെയ്യുന്നത്. എത്ര നല്ല സിനിമയാണെന്ന് പറഞ്ഞാലും നാലു കോടിയുടെയും അഞ്ചു കോടിയുടെയും സിനിമ ഞാൻ ചെയ്യില്ല. കാരണം എനിക്ക് മാർക്കറ്റിൽ എത്ര വാല്യൂ ഉണ്ടെന്ന് എനിക്ക് കൃത്യമായിട്ട് അറിയാം.

കഴിഞ്ഞ പ്രാവശ്യം ഇറങ്ങിയ എന്റെ സിനിമകളിൽ പലതും തിയേറ്ററിൽ പരാജയമാണ്. പക്ഷെ അതെല്ലാം വിൽപ്പന നടന്നവയാണ്. ലാഭം കിട്ടിയ സിനിമകളാണ്. പരാജയമാണ് പക്ഷെ സിനിമ ഓടാതെ പോയിട്ടില്ല. അതെല്ലാം ചെറിയ ബജറ്റിലെ സിനിമകളാണ്.

സിനിമ ഓടില്ലെന്നൊക്കെ എന്നോട് പറഞ്ഞിട്ടും ഉണ്ട്. പക്ഷെ എനിക്ക് കുഴപ്പമില്ല. എനിക്ക് ശേഷം വന്ന പലരും എന്റെ ഇരട്ടിയുടെ ഇരട്ടി ശമ്പളം വാങ്ങുന്നുണ്ട്. അവരുടെയൊക്കെ മാർക്കറ്റ് വാല്യൂ എന്റെ അത്രയെ ഉള്ളൂ.

അതൊന്നും അംഗീകരിച്ച് കൊടുക്കരുതെന്ന് ഞാൻ പറയുന്നില്ല. കാരണം അവർ ഡിമാൻഡ് ചെയ്യുമ്പോൾ കൊടുക്കാൻ പ്രൊഡക്ഷൻ ഹൗസുണ്ട് ഇവിടെ. റീച്ചുള്ള മെയിൻ സ്ട്രീം നടന്മാർ ഒഴിച്ചുള്ളവരുടെ കാര്യമാണ് ഞാൻ പറയുന്നത്. കാരണം അവർക്ക് ആകാം.

ചില നടന്മാർക്ക് മാത്രം ഫിക്‌സഡ് ബിസിനസുണ്ട്. അതിന്റെ താഴെയാണ് ഞാൻ ഉൾപ്പെടെയുള്ള നടന്മാർ. അവരെ സംബന്ധിച്ച് ഇവിടെ റിസ്‌ക്കുണ്ട്. പക്ഷെ അവരെ സംബന്ധിച്ച് വലിയ സിനിമകൾ ചെയ്യുക എന്നതാണ് ആഗ്രഹം.

ALSO READ

പൊന്നിയിൻ സെല്‍വൻ രണ്ടാം ഭാഗത്തിലെ ആദ്യ ഗാനം തിങ്കളാഴ്ച എത്തും

ഒരു നടന്റെ മൂന്ന് സിനിമകൾ പൊട്ടി, പക്ഷെ അയാൾ ശമ്പളം കുറക്കുന്നില്ല. മൂന്ന് പടം പൊട്ടിയിട്ടും പ്രതിഫലം വാങ്ങുന്നത് മൂന്നര കോടി, നാലു കോടിയാണ്.

പക്ഷെ അയാളുടെ സാറ്റലൈറ്റ് വാല്യൂവിലും ഡിജിറ്റൽ വാല്യൂവിലും ഇടിവ് വന്നിട്ടുണ്ടാകും, അയാളുടെ പടങ്ങൾ ബിസിനസ് ചെയ്യാനുള്ള ബുദ്ധിമുട്ടികൾ വന്നിട്ടുണ്ടാകും. എന്നിട്ടും മൂന്നും നാലും പടം പൊട്ടിയിട്ടും അയാൾ വാങ്ങിക്കുന്ന സാലറി പഴയതു തന്നെയാവും. കാരണം ആരും കുറക്കില്ല, കൂട്ടുകയെ ഉള്ളു, ധ്യാൻ ശ്രീനിവാസൻ പറഞ്ഞു.