ചലച്ചിത്ര അക്കാദമി ചെയർമാൻ രഞ്ജിത്തിന്റെ സ്ഥാനപ്പേര് മാറ്റിവിളിച്ച് അവതാരകൻ. ചലച്ചിത്ര അക്കാദമി ചെയർമാൻ എന്നതിന് പകരം ജനറൽ സെക്രട്ടറി ഓഫ് ഫെഫ്ക എന്നാണ് അവതാരകൻ പറഞ്ഞത്.

തുടർന്ന് തെറ്റ് മനസിലാക്കി തിരുത്തി വിളിച്ചത് ചലച്ചിത്ര അക്കാദമി ജനറൽ സെക്രട്ടറി എന്ന് തെറ്റിച്ചായിരുന്നു. സ്ഥാനപ്പേര് തെറ്റിച്ച് വിളിച്ചതിനെ തുടർന്ന് രഞ്ജിത്ത് വേദിയിലേക്ക് കയറാൻ കൂട്ടാക്കിയില്ല.

ചലച്ചിത്ര അക്കാദമി ചെയർമാൻ എന്ന് ശരിയാക്കി അഭിസംബോധന ചെയ്ത്, ക്ഷമ ചോദിച്ച് വേദിയിൽ നിന്നും അടുത്ത് വന്ന് അവതാരകൻ ക്ഷണിച്ചതോടെയാണ് രഞ്ജിത്ത് വേദിയിലേക്ക് കയറാൻ തയ്യാറായത്. വി.കെ. പ്രകാശ് സംവിധാനം ചെയ്യുന്ന ലൈവ് എന്ന ചിത്രത്തിന്റെ ഓഡിയോ ലോഞ്ചിൽ വെച്ചാണ് സംഭവം നടന്നത്.

ALSO READ

നല്ല നിലാവുള്ള രാത്രി ഒഫീഷ്യൽ ട്രെയിലർ പുറത്തിറങ്ങി

അടുത്തതായി വേദിയിലേക്ക് സ്വാഗതം ചെയ്യുന്നത് നമ്മളെല്ലാം ഒരുപാട് ബഹുമാനിക്കുന്ന നമ്മുടെ സ്വന്തം രഞ്ജിത്തേട്ടനെയാണ്, ജനറൽ സെക്രട്ടറി ഓഫ് ഫെഫ്ക, എന്നാണ് അവതാരകൻ പറഞ്ഞത്. ഇത് കേട്ട് വേദിയിലാകെ ചിരി പടർന്നു.

തെറ്റ് മനസിലാക്കി അവതാരകൻ ചലച്ചിത്ര അക്കാദമിയുടെ ജനറൽ സെക്രട്ടറി, അല്ല ചെയർമാൻ എന്ന് പറഞ്ഞെങ്കിലും രഞ്ജിത്ത് വേദിയിലേക്ക് വരില്ല എന്ന് കൈ കൊണ്ട് ആംഗ്യം കാണിച്ചു.

അയാം സോ സോറി, രഞ്ജിത്ത് സാർ അയാം റിയലി സോറി, പെട്ടെന്നുള്ള ടെൻഷനിൽ അറിയാതെ പറ്റിയതാണ്, കണ്ട ടെൻഷനിൽ തെറ്റി പോയതാണ്, കൊല്ലാതെ വിടണം എന്ന് പറഞ്ഞ് വേദിയിൽ നിന്നും ഇറങ്ങി വന്ന് അവതാരകൻ ക്ഷമ ചോദിച്ചതിന് ശേഷമാണ് രഞ്ജിത്ത് വേദിയിലേക്ക് കയറി വന്നത്. വേദിയിൽ വന്നതിന് ശേഷവും അവതാരകൻ ക്ഷമ ചോദിച്ചു.

വല്ലപ്പോഴും പത്രം എടുത്ത് നോക്കി വായിക്കുന്നത് നല്ലതാണെന്നാണ് അവതാരകനോട് രഞ്ജിത്ത് പറഞ്ഞത്. എല്ലാം അറിഞ്ഞുവെന്ന് ഒരു ഇട്ടാവട്ട സ്‌റ്റേജിൽ നിന്ന് സംസാരിക്കുന്നതല്ല ലോകം.

അതിനപ്പുറത്തുള്ള ആളുകളെ തിരിച്ചറിയാൻ ശ്രമിക്കുക. ചലച്ചിത്ര അക്കാദമി ജനറൽ സെക്രട്ടറി എന്ന് ഞാൻ ആദ്യം കേൾക്കുകയാണ്. എന്തുമാവട്ടെ ആ ചെറുപ്പക്കാരനെ കൊല്ലാതെ വിടുന്നു, രഞ്ജിത്ത് പറഞ്ഞു.