സൽമാൻ ഖാന് നേരെയുണ്ടായ വധഭീഷണിയിൽ പ്രതികരണവുമായി നടി കങ്കണ റണാവത്ത്. രാജ്യം സുരക്ഷിതമായ കരങ്ങളിലാണെന്നും സുരക്ഷയെക്കുറിച്ച് ആശങ്ക വേണ്ടന്നുമാണ് കങ്കണ പറഞ്ഞത്.

കഴിഞ്ഞ ദിവസം ഒരു ടെലിവിഷൻ പരിപാടിക്കിടെ തന്റെ സുരക്ഷയെക്കുറിച്ച് സൽമാൻ ഖാൻ പറഞ്ഞിരുന്നു. ഇതിനോട് പ്രതികരിക്കുകയായിരുന്നു കങ്കണ.

ഞങ്ങൾ അഭിനേതാക്കളാണ്. സൽമാൻ ഖാന് കേന്ദ്രം സുരക്ഷയൊരുക്കുന്നുണ്ട്. പ്രധാനമന്ത്രി നരേന്ദ്ര മോദിയിൽ നിന്നും ആഭ്യന്തര മന്ത്രി അമിത് ഷായിൽ നിന്നും അദ്ദേഹത്തിന് സംരക്ഷണം ലഭിക്കുന്നുണ്ട്, അതുകൊണ്ട് ഒന്നും പേടിക്കാനില്ല.

എനിക്ക് നേരെ ഭീഷണി ഉണ്ടായപ്പോൾ സർക്കാർ എനിക്കും സുരക്ഷയൊരുക്കിയിരുന്നു. ഇന്ന് രാജ്യം സുരക്ഷിതമായ കരങ്ങളിലാണ്, അതെക്കുറിച്ച് ആശങ്ക വേണ്ട, കങ്കണ പറഞ്ഞു.

വധഭീഷണിയെ തുടർന്ന് സൽമാൻ ഖാന് വൈ പ്ലസ് കാറ്റഗറി സുരക്ഷയാണ് മുംബൈ പോലീസ് ഒരുക്കിയിട്ടുള്ളത്. ശനിയാഴ്ചയാണ് തന്റെ സുരക്ഷയെക്കുറിച്ചുള്ള കാര്യങ്ങളും അനുഭവങ്ങളും സൽമാൻ ഖാൻ വെളിപ്പെടുത്തിയത്.

ഇപ്പോൾ റോഡിൽ സൈക്കിൾ ചവിട്ടാനും ഒറ്റയ്ക്ക് എവിടെയെങ്കിലും പോകാനും സാധിക്കുന്നില്ലെന്ന് സൽമാൻ ഖാൻ പറഞ്ഞു. ട്രാഫിക്കിലായിരിക്കുമ്പോൾ തനിക്കൊരുക്കുന്ന സുരക്ഷ മറ്റ് ആളുകൾക്ക് അസൗകര്യമുണ്ടാക്കുന്നുവെന്നും താരം പറഞ്ഞു.

തനിക്കെതിരെ ഗുരുതരമായ ഭീഷണിയുണ്ടെന്നും അതിനാലാണ് സുരക്ഷയൊരുക്കുന്നതെന്നും താരം കൂട്ടിച്ചേർത്തു. ദുബായിലാണ് സൽമാൻഖാൻ ഇപ്പോൾ.

പൂർണ്ണ സുരക്ഷയോടെയാണ് ഞാൻ എല്ലായിടത്തും പോകുന്നത്. ഞാൻ ഇവിടെയായിരിക്കുമ്പോൾ ഇതൊന്നും ആവശ്യമില്ല, പൂർണ്ണമായും സുരക്ഷിതനാണ്. ഇന്ത്യക്കകത്ത് ചെറിയ പ്രശ്നമുണ്ട്.

എന്ത് ചെയ്താലും സംഭവിക്കേണ്ടതെല്ലാം സംഭവിക്കുമെന്ന് എനിക്കറിയാം. ദൈവമുണ്ടെന്ന് ഞാൻ വിശ്വസിക്കുന്നു, സൽമാൻ ഖാൻ പറഞ്ഞു.

അധോലോക നേതാവ് ലോറൻസ് ബിഷ്ണോയിയും സംഘവുമാണ് സൽമാൻ ഖാന് നേരെ വധ ഭീഷണി മുഴക്കിയിരിക്കുന്നത്. 1998-ൽ സൽമാൻ ഖാൻ രാജസ്ഥാനിൽ രണ്ട് കൃഷ്ണമൃഗങ്ങളെ വേട്ടയാടിയ സംഭവത്തെ തുടർന്നാണ് ലോറൻസ് ബിഷ്ണോയിയും സംഘവും സൽമാൻഖാൻ വധിക്കാൻ പദ്ധതി ഇട്ടത്.

കൃഷ്ണമൃഗത്തെ ബിഷ്‌ണോയി വിഭാഗം പരിപാവനമായാണ് കരുതുന്നത്. പല തവണ ലോറൻസ് ബിഷ്ണോയി സൽമാൻ ഖാന് നേരെ ഭീഷണിയുമായി എത്തിയിട്ടുണ്ട്.

കൃഷ്ണമൃഗത്തെ വേട്ടയാടിയതിന് 2018ൽ ജോധ്പൂർ കോടതി സൽമാൻ ഖാനെ അഞ്ച് വർഷം തടവിന് ശിക്ഷിച്ചിരുന്നു. പിന്നീട് താരത്തിന് ജാമ്യം ലഭിക്കുകയും ചെയ്തു. എന്നാൽ കൃഷ്ണമൃഗത്തെ കൊന്നകേസിൽ സൽമാൻ ഖാന്റെ വിധി കോടതിയല്ല, താൻ വിധിക്കുമെന്ന് ലോറൻസ് പറയുകയുണ്ടായി.

താനും തന്റെ സമുദായവും സൽമാനോട് ക്ഷമിക്കില്ലെന്നും സൽമാൻ ഖാനും പിതാവ് സലീം ഖാനും പൊതുമധ്യത്തിൽ മാപ്പ് പറഞ്ഞാൽ ചിലപ്പോൾ തീരുമാനം മാറ്റുന്നത് പരിഗണിച്ചേക്കുമെന്നും ലോറൻസ് പറഞ്ഞിരുന്നു.