മുന്‍ ഭാര്യ അഞ്ജന പാണ്ഡെയ്ക്കും സ്വന്തം സഹോദരന്‍ ഷമാസ് നവാബ് സിദ്ദീഖിയ്ക്കുമെതിരെ 100 കോടി രൂപയുടെ മാനനഷ്ടക്കേസ് ഫയല്‍ ചെയ്ത് ബോളിവുഡ് നടന്‍ നവാസുദ്ദീന്‍ സിദ്ദീഖി. ഇരുവരും തനിക്കെതിരെ അപകീര്‍ത്തി പ്രസ്താവനകള്‍ പുറപ്പെടുവിച്ചു എന്നും അതില്‍ തനിക്ക് അപമാനം നേരിട്ടു എന്നും നവാസുദ്ദീന്‍ പരാതിയില്‍ പറയുന്നു. ഈ മാസം 30ന് കേസില്‍ വാദം കേള്‍ക്കും.

തന്നെ അപമാനിക്കുന്നതില്‍ നിന്ന് ഉടന്‍ ഇരുവരെയും വിലക്കണമെന്ന് പരാതിയില്‍ പറയണം. ഇരുവരും തനിക്കെതിരെ സമൂഹമാധ്യമങ്ങളിലൂടെ നടത്തിയ അപവാദ പ്രചരണങ്ങള്‍ നീക്കം ചെയ്യണം. അത്തരം പ്രസ്താവനകള്‍ ഇനി നടത്തുന്നതില്‍ നിന്ന് ഇവരെ തടയണം.

പരസ്യമായി ഇരുവരും മാപ്പ് എഴുതിനല്‍കണം. ഇത്തരം അപവാദ പ്രചരണങ്ങള്‍ നടത്താന്‍ സമീപിച്ചവര്‍ ആരെന്ന് ഇരുവരും കൃത്യമായി പറയാന്‍ കോടതി ഉത്തരവിടണം എന്നും നവാസുദ്ദീന്റെ പരാതിയില്‍ പറയുന്നു.

ഒരു നടനാകാനുള്ള വ്യക്തിത്വം തനിക്കില്ലെന്ന് കുടുംബക്കാരും സുഹൃത്തുക്കളും പറയാറുണ്ടായിരുന്നു. അവിടെനിന്നാണ് താന്‍ ഉയര്‍ന്നുവന്നത്. 2008ല്‍, സഹോദരന്‍ തൊഴിലില്ലാതിരിക്കുമ്പോള്‍ താന്‍ അവനെ മാനേജരാക്കി. തന്റെ പണമിടപാടുകളൊക്കെ അവന്‍ നോക്കുമ്പോള്‍ താന്‍ അഭിനയിക്കുകയായിരുന്നു. ക്രെഡിറ്റ് കാര്‍ഡുകള്‍, എടിഎം കാര്‍ഡുകള്‍, ചെക്ക് ബുക്ക്, ബാങ്ക് പാസ്വേഡ് എല്ലാം സഹോദരനെ ഏല്പിച്ചു.

എന്നാല്‍, അവന്‍ വിശ്വാസവഞ്ചന കാണിച്ചു. തന്നെ പറ്റിച്ച് പണം തട്ടിയെടുത്തു. തിരക്കുള്ള നടനായിരുന്നതിനാല്‍ ഇത് ശ്രദ്ധയില്‍ പെട്ടില്ല. തന്റെ പേരില്‍ വസ്തുവകകള്‍ വാങ്ങുകയാണെന്ന് അവന്‍ പറഞ്ഞെങ്കിലും രണ്ട് പേരുടെയും പേരിലാണ് അവന്‍ വാങ്ങിയത്. യാരി റോഡിലെ ഒരു ഫ്‌ലാറ്റ്,

അവിടെത്തന്നെ വാണിജ്യാവശത്തിനുള്ള ഒരു കെട്ടിടം, ഷാപൂരില്‍ ഒരു ഫാംഹൗസ്, ബുല്‍ധനയിലും ദുബായിലും പ്രോപ്പര്‍ട്ടികള്‍, ബിഎംഡബ്ല്യു, റേഞ്ച് റോവര്‍, ഡുകാട്ടി തുടങ്ങി 14 വാഹനങ്ങള്‍ എന്നിവയൊക്കെ സഹോദരന്‍ വാങ്ങി. ചോദ്യം ചെയ്തപ്പോള്‍ അവന്‍ ഒഴിഞ്ഞുമാറി. എന്നിട്ട് മുന്‍ ഭാര്യയെ ഉപയോഗിച്ച് കള്ളക്കേസുകള്‍ കെട്ടിച്ചമച്ചു എന്നും പരാതിയിലുണ്ട്.

സഹോദരന്‍ അടക്കാതിരുന്ന വിവിധ നികുതിയായി താന്‍ 37 കോടി രൂപ അടച്ചു എന്നും നവാസുദ്ദീന്‍ പരാതിയില്‍ വിശദീകരിക്കുന്നു.മുന്‍ ഭാര്യയെ താന്‍ വിവാഹം കഴിക്കും മുന്‍പ് അവര്‍ മറ്റൊരാളെ വിവാഹം കഴിച്ചിരുന്നു എന്ന് നവാസുദ്ദീന്‍ പറയുന്നു. വിവാഹിതയല്ലാത്ത മുസ്ലിം ആണെന്ന് അവര്‍ തന്നെ തെറ്റിദ്ധരിപ്പിച്ചു.

പിന്നീട് സത്യമറിഞ്ഞപ്പോള്‍ താന്‍ ഞെട്ടിപ്പോയി. തന്റെ 21 കോടി രൂപ ഭാര്യയും സഹോദരനും ചേര്‍ന്ന് ദുര്‍വ്യയം ചെയ്തു. തന്റെ എല്ലാ കൂടിക്കാഴ്ചകളിലും പങ്കെടുത്തിട്ടുള്ള സഹോദരന്‍ ഇതൊക്കെ വിഡിയോയും ഓഡിയോ ആയും റെക്കോര്‍ഡ് ചെയ്തിട്ടുണ്ട്.

അത് പുറത്തുപോകാന്‍ പാടില്ല. തന്റെ പ്രോപ്പര്‍ട്ടികള്‍ തിരികെനല്‍കാന്‍ ആവശ്യപ്പെട്ടപ്പോള്‍ സഹോദരനും മുന്‍ ഭാര്യയും ചേര്‍ന്ന് തന്നെ ബ്ലാക്ക്‌മെയില്‍ ചെയ്തു. എല്ലാ മാസവും മക്കളുടെ പഠനത്തിനായി 10 ലക്ഷം രൂപ വീതം നല്‍കുന്നുണ്ട്. ഭാര്യക്ക് പ്രൊഡക്ഷന്‍ ഹൗസ് ആരംഭിക്കാന്‍ 2.5 കോടി രൂപ നല്‍കി. എന്നാല്‍, അത് അവര്‍ വ്യക്തിപരമായ ആനന്ദത്തിനു വേണ്ടി ഉപയോഗിച്ചു. ഭാര്യയും സഹോദരനും നടത്തുന്ന അപവാദ പ്രചരണങ്ങള്‍ തനിക്ക് നഷ്ടമുണ്ടാക്കി. തന്റെ പുതിയ ചിത്രങ്ങള്‍ നീട്ടിവച്ചിരിക്കുകയാണെന്നും അദ്ദേഹം പറയുന്നു.