രാജമൗലി ചിത്രങ്ങൾ പ്രേക്ഷകർ ഇരുകൈകളും നീട്ടി സ്വീകരിക്കാനാണ് പതിവ്. താൻ സിനിമ ചെയ്യുന്നത് പണം ഉണ്ടാകാൻ മാത്രമാണെന്ന് സംവിധായകൻ അടുത്തിടെ ഒരു അഭിമുഖത്തിൽ പറയുകയുണ്ടായി. എന്നാൽ വെറും കച്ചവട സിനിമകൾ അല്ല രാജമൗലി ഒരുക്കുന്നതെന്ന് നമുക്കെല്ലാം അറിയാം.

സിനിമയിൽ സാങ്കേതികവിദ്യ ഗംഭീരമായി ഉപയോഗിക്കാനുള്ള കഴിവും അദ്ദേഹത്തിനുണ്ട്. ബാഹുബലി, ഈഗ തുടങ്ങിയ ചിത്രങ്ങൾ അതിനു ഉദാഹരണമാണ്.

രാജമൗലിയുടെ സംവിധാനത്തിൽ ഏറ്റവും ഒടുവിൽ പുറത്തിറങ്ങിയ ചിത്രമാണ് ആർ ആർ ആർ. ചിത്രത്തിന്റെ കഥയും വിഷ്വൽ എഫക്റ്റും ഗാനങ്ങളുമെല്ലാം തന്നെ ശരവേഗത്തിലാണ് പ്രേക്ഷകഹൃദയം കീഴടക്കിയത്.

ചിത്രത്തിന് മികച്ച വിദേശ ഭാഷ ചിത്രത്തിനുള്ള 28-മത് ക്രിട്ടിക്സ് ചോയ്സ് പുരസ്കാരവും ലഭിച്ചു. ഇപ്പോഴിതാ രാജമൗലിക്ക് വധഭീഷണിയുമായി എത്തിയിരിക്കുകയാണ് ഒരാൾ. ആരാണെന്നാലേ, സാക്ഷാൽ രാം ഗോപാൽ വർമ്മ തന്നെ.

സംവിധായകൻ എന്ന നിലയിൽ രാജമൗലി തന്നെപോലെ ഉള്ളവർക്ക് ഭീഷണിയാണെന്നും അസൂയ മൂത്ത് താൻ ഉൾപ്പെടെയുള്ള ഒരു കൂട്ടം സിനിമ സംവിധായകർ രാജമൗലിയെ കൊല്ലാൻ പദ്ധതി ഇട്ടിരിക്കുകയാണെന്നും അദ്ദേഹം പറഞ്ഞു.

മദ്യപിച്ചത് കൊണ്ടാണ് ഇക്കാര്യങ്ങളെല്ലാം പുറത്തായതെന്നും സംവിധായകൻ രാം ഗോപാൽ വർമ്മ ട്വിറ്ററിൽ തമാശരൂപേണ പറഞ്ഞു.

28മത് ക്രിട്ടിക്സ് ചോയ്സ് പുരസ്കാര വേളയിൽ രാജമൗലി ടൈറ്റാനിക് സംവിധായകൻ ജേയിംസ് കാമറൂണുമായി സംസാരിക്കുന്ന വീഡിയോ പങ്കുവെച്ചാണ് രാം ഗോപാലിന്റെ ഈ ട്വീറ്റ്.

രാജമൗലി സ്വപ്നത്തിൽ പോലും ചിന്തിക്കാത്ത നിമിഷങ്ങളിലൂടെയാണ് കടന്നു പോയതെന്നും ഇന്ത്യയിലെ മികച്ച സംവിധായകർ വരച്ചുവെച്ച രേഖ താങ്കൾ ലംഘിച്ചുവെച്ചും ചൂണ്ടിക്കാട്ടിയാണ് രാം ഗോപാലിന്റെ ഭീഷണി.

ഷോലെ സിനിമ സംവിധായകൻ രമേഷ് സിപ്പിയേയും ആദിത്യ ചോപ്ര, കരൺ ജോഹർ തുടങ്ങി ബൻസാലിമാരെയും താങ്കൾ മറികടന്നു. അതിൽ ഒരു വിഭാഗം സംവിധായകർ അസൂയപ്പെടുന്നുവെന്നും താനും അതിലൊരാളാണെന്നും രാം ഗോപാൽ പറഞ്ഞു.

ജൂനിയർ എൻടിആറും രാം ചരൺ തേജയുമാണ് ആർ ആർ ആറിൽ മുഖ്യ വേഷം ചെയ്യുന്നത്. ബോളിവുഡിൽ നിന്നും ആലിയ ബട്ട്, അജയ് ദേവ്ഗൺ എന്നിവരും മുഖ്യകഥാപാത്രങ്ങളെ അവതരിപ്പിച്ചിട്ടുണ്ട്.