മിദിലാജ് റഷീദ്

പതിമൂന്ന് മണിക്കൂര്‍ കൊണ്ട് ഒരു സിനിമ ഷൂട്ട് ചെയ്ത് എഡിറ്റ് ചെയ്ത് ഒടിടിയില്‍ റിലീസ് ചെയ്തു! കേള്‍ക്കുമ്പോള്‍ നിസ്സാരമായി തോന്നുണ്ടോ? ആ 13 മണിക്കൂറിനു വേണ്ടി 5000-ത്തില്‍ അധികം മണിക്കൂര്‍ പരിശ്രമിച്ചതിന്റെ കഥ പറയാനുണ്ട്, തൃശ്ശൂര്‍ വടക്കാഞ്ചേരി സ്വദേശിയും സംവിധായകനുമായ രഘുനാഥന്.
13 മണിക്കൂര്‍ കൊണ്ട് പൂര്‍ത്തിയാക്കി യുആര്‍എഫ് വേള്‍ഡ് റെക്കോഡ്, വേള്‍ഡ്‌സ് ഗ്രേറ്റസ്റ്റ് റെക്കോഡ് തുടങ്ങി ലോക റെക്കോഡുകള്‍ കരസ്ഥമാക്കിയ തത്വമസി എന്ന ചിത്രത്തിന്റെ വിശേഷങ്ങള്‍ രഘുനാഥ് എന്‍.ബി പറയുന്നത്.

തത്വമസി സംഭവിച്ചത്

തത്വമസി എന്ന സിനിമ 13 മണിക്കൂറില്‍ പൂര്‍ത്തിയാക്കിയെങ്കിലും അതിവേണ്ടിയുള്ള തയ്യാറെടുപ്പ് 6 മാസത്തിലധികം നീണ്ടു. മാനസികമായ തയ്യാറെടുപ്പും ധാരാളം ഹോം വര്‍ക്കും ഒക്കെ വേണ്ടി വന്നു. എഫക്റ്റീവ് ആയി എങ്ങനെ ഷോട്ട് എടുക്കാം, എവിടെ കട്ട് ചെയ്ത് എഡിറ്റ് ചെയ്ത് എടുക്കാം തുടങ്ങി നിരവധി കാര്യങ്ങളില്‍ വ്യക്തമായ പ്ലാന്‍ ഉണ്ടാക്കേണ്ടിയിരുന്നു.

മറ്റൊരു വെല്ലുവിളി ആര്‍ട്ടിസ്റ്റുകളെ കണ്ടെത്തുന്നതിലായിരുന്നു. സിനിമയില്‍ കൂടുതലും പുതുമുഖങ്ങള്‍ ആയിരുന്നു. അവരെയാണ് മോള്‍ഡ് ചെയ്യാന്‍ എളുപ്പം. കഥാപാത്രങ്ങള്‍ക്ക് ചേരുന്ന ആര്‍ട്ടിസ്റ്റുകളെ കിട്ടാത്തതിനാല്‍ രണ്ട് തവണ ഷൂട്ടിംഗ് മാറ്റി വച്ചിരുന്നു. പിന്നീട്, പറ്റിയ ആള്‍ക്കാരെ തിരഞ്ഞുപിടിച്ച് ഒക്ടോബര്‍ 21 ന് ഷൂട്ടിംഗ് ആരംഭിക്കുകയായിരുന്നു. ആര്‍ട്ടിസ്റ്റുകള്‍ക്ക് പറഞ്ഞ് ഫലിപ്പിക്കാന്‍ കഴിയുന്ന രീതിയില്‍ ഡയലോഗുകളും മാറ്റി മാറ്റി എഴുതേണ്ടി വന്നു. സമയ ബന്ധിതമായി പൂര്‍ത്തിയാക്കാന്‍ റീടേക്കുകള്‍ ഒഴിവാക്കുക പ്രധാനമായിരുന്നു.

15 മണിക്കൂറില്‍ തീര്‍ക്കണം എന്നായിരുന്നു വിചാരിച്ചിരുന്നത്. പ്ലാനുകള്‍ കൃത്യമായതിനാല്‍ 13.4 മണിക്കൂറില്‍ തീര്‍ക്കാന്‍ പറ്റി.

കാമറ, എഡിറ്റിംഗ്... എല്ലാം ഒറ്റയ്ക്ക്

സിനിമയുടെ ലൈവ് സൗണ്ട് റെക്കോര്‍ഡിംഗ്, മേക്കപ്പ് ഒഴിച്ച് ബാക്കി എല്ലാം ഞാന്‍ തന്നെയാണ് കൈകാര്യം ചെയ്തത്. ബ്ലാക്ക് മാജിക് 6കെ പ്രോ എന്ന കാമറയില്‍ ആണ് സിനിമ ഷൂട്ട് ചെയ്തത്. മലയാളത്തില്‍ ആദ്യമായാണ് ഈ ക്യാമറയില്‍ ഒരു സിനിമ ഷൂട്ട് ചെയ്യുന്നത്. ഈ കാമറയെ കുറിച്ച് അധികം ആര്‍ക്കും അറിവുണ്ടായിരുന്നില്ല. പോസ്റ്റ് പ്രൊഡക്ഷന്‍ ജോലി എളുപ്പമാകും എന്നു മനസ്സിലാക്കിയാണ് ഈ കാമറ തിരഞ്ഞെടുത്തത്.

പല വര്‍ക്ക് ഷോപ്പുകളും അറ്റന്‍ഡ് ചെയ്ത് പഠിച്ച ശേഷമാണ് ഞാന്‍ കാമറ കൈകാര്യം ചെയ്തത്. എഡിറ്റിംഗും ഞാന്‍ തന്നെയാണ് ചെയ്തത്. മുന്‍കൂട്ടിയുള്ള പ്ലാനിംഗ് കാര്യങ്ങള്‍ എളുപ്പമാക്കി. കളര്‍ കറക്ഷനില്‍ വരാന്‍ പോകുന്ന എറര്‍ പോലും നേരത്തെ പരിഹരിച്ചാണ് ഷൂട്ടിംഗ് ആരംഭിച്ചത്. ഈ രീതിയില്‍ എല്ലാ സാധ്യതകളും പഠിച്ച ശേഷമാണ് ഇതിലേക്ക് ഇറങ്ങിയത്. പൂനെ ഫിലിം ഇന്‍സ്റ്റിറ്റ്യൂട്ടിലെ പഠനമാണ് ഇതിനൊക്കെയും കരുത്ത് തന്നത്.

ആദ്യ ചിത്രം

1998 ലാണ് ഞാന്‍ ആദ്യ സിനിമ പടം ചെയ്യുന്നത്. ആറ്റുവേല എന്നായിരുന്നു സിനിമയുടെ പേര്. പിന്നെ നിശബ്ദം എന്നൊരു സിനിമയും ചെയ്തു. പല ചാനലുകളിലും വര്‍ക്ക് ചെയ്തു. അധ്യാപകനായി. ദീര്‍ഘ നാളത്തെ ഇടവേളക്ക് ശേഷം തിരിച്ചു വരുമ്പോള്‍ വ്യത്യസ്തമായി എന്തെങ്കിലും ചെയ്യണം എന്ന് തീരുമാനിച്ചിരുന്നു. അങ്ങനെയാണ് ഈ ആശയത്തിലേക്ക് എത്തിയത്.

കാഴ്ചപ്പാട്

വളരെ കൃത്യമായ പ്ലാനിംഗും ഹോം വര്‍ക്കും ഉണ്ടെങ്കില്‍ നല്ല ക്വാളിറ്റിയുള്ള സിനിമ നിര്‍മിക്കാന്‍ സാധിക്കും. എഡിറ്റിംഗ് ടേബിളില്‍ സിനിമ ഉണ്ടാകില്ല. ആവശ്യമുള്ളത് മാത്രം ഷൂട്ട് ചെയ്യുക, അത് പരമാവധി പെര്‍ഫെക്ട് ആയി ചെയ്യുക. മനസ്സിലുള്ള സിനിമയുടെ എക്‌സിക്യൂഷന്‍ മാത്രമാണ് എഡിറ്റിംഗ് ടേബിളില്‍ നടക്കേണ്ടത്.

പുതിയ പ്ലാനുകള്‍

പുതിയൊരു സിനിമ പ്ലാന്‍ ചെയ്യുന്നുണ്ട്. അതിന്റെ പ്രീ പ്രൊഡക്ഷന്‍ വര്‍ക്കുകള്‍ നടക്കുകയാണ്. അതിലും ഒരു വ്യത്യസ്തത കൊണ്ടു വരുന്നുണ്ട്. അത് എന്താണെന്നത് സസ്‌പെന്‍സ് ആണ്. റിലീസ് ചെയ്യുന്ന അന്ന് സസ്‌പെന്‍സ് പുറത്തുവിടും.