അന്തരിച്ച തെലുങ്ക് സിനിമ താരം രാജേഷിന്റെ മകളാണ് ഐശ്വര്യ രാജേഷ്. ടെലിവിഷൻ ഷോകളിലൂടെ പ്രേക്ഷകർക്ക് സുപരിചിതയായ താരം
2011ൽ പുറത്തിറങ്ങിയ അവർകളും ഇവർകളും എന്ന ചിത്രത്തിലൂടെയാണ് സിനിമയിൽ സജീവമായത്. ഇപ്പോൾ തമിഴ്, മലയാളം, തെലുങ്ക് സിനിമകളിൽ സജീവമാണ് താരം.

മലയാളത്തിൽ ഏറെ ചർച്ചയായ ദി ഗ്രേറ്റ് ഇന്ത്യൻ കിച്ചൻ എന്ന ചിത്രത്തിൻ്റെ തമിഴ് പതിപ്പിൽ ഐശ്വര്യ രാജേഷാണ് പ്രധാന കഥാപാത്രത്തെ അവതരിപ്പിക്കുന്നത്. ചിത്രത്തിൻ്റെ പ്രമോഷനുമായി ബന്ധപ്പെട്ടുള്ള ചർച്ചയിൽ ഐശ്വര്യ പറഞ്ഞ കാര്യമാണ് ഇപ്പോൾ വൈറൽ ആവുന്നത്.

ആർത്തവമുള്ള സ്ത്രീകൾ ക്ഷേത്രത്തിൽ പ്രവേശിച്ചാൽ ഒരു ദൈവത്തിനും അസ്വസ്ഥതയുണ്ടാവില്ലെന്നും അത് മനുഷ്യർ സൃഷ്ടിച്ച നിയമങ്ങൾ മാത്രമാണെന്നുമാണ് ഐശ്വര്യ പറഞ്ഞത്.

ആർത്തവ സമയത്തെ സ്ത്രീകളെ മാറ്റി നിർത്തുന്നതും ക്ഷേത്രങ്ങളിലെ പ്രവേശനം നിഷേധിക്കുന്നതും സമാനമായി ശബരിമലയിൽ സ്ത്രീകളുടെ പ്രവേശനത്തിലെ വിവേചനങ്ങളും സംബന്ധിച്ചു ചോദ്യങ്ങൾക്കാണ് ഐശ്വര്യ തന്റെ നിലപാട് തുറന്നു പറഞ്ഞത്.

സ്ത്രീകളുടെ ജീവിതം അടുക്കളയിൽ അവസാനിക്കാനുള്ളതല്ലെന്നും അവരുടെ കഴിവുകളും പ്രകടമാക്കാനുള്ളതാണെന്നും ഇന്ന് സ്ത്രീകൾക്ക് സ്വാതന്ത്ര്യം ലഭിക്കുന്നുണ്ടെന്നും ഐശ്വര്യ പറഞ്ഞു.

എന്നെ സംബന്ധിച്ച് ദൈവത്തിന് സ്ത്രീ പുരുഷ വ്യത്യാസമില്ല. ഒരു ദൈവവും ആളുകൾ ക്ഷേത്രത്തിലെത്തുന്നതിന് ഒരു മാനദണ്ഡവും വെച്ചിട്ടില്ല. ഇതെല്ലാം മനുഷ്യരുണ്ടാക്കിയ ചട്ടങ്ങളാണ്. ശബരിമലയെന്നു മാത്രമല്ല, ഒരു ക്ഷേത്രത്തിലും സ്ത്രീകൾ‌ പ്രവേശിക്കുന്നതിൽ ഒരു വിവേചനവും ഒരു ദേവനോ ദേവിയോ നൽകിയിട്ടില്ല.

നമ്മൾ എന്തു കഴിക്കണം, എന്തു ചെയ്യണം എന്നും ഒരു ദൈവവും പറഞ്ഞിട്ടില്ല. ഇതെല്ലാം നമ്മൾ മനുഷ്യരാണ് സൃഷ്ടിച്ചത്. ദൈവത്തിന് ഈ വേർതിരിവുമായി ഒരു ബന്ധവുമില്ല, ഐശ്വര്യ രാജേഷ് പറയുന്നു.

ശബരിമല ക്ഷേത്രത്തിൽ മാത്രമല്ല, ഒരു പ്രത്യേക വിഭാഗം ഭക്തർ പുണ്യഭൂമിയിൽ പ്രവേശിക്കുന്നതിൽ ഒരു ദൈവത്തിനും അസ്വസ്ഥനാകാൻ കഴിയില്ലെന്നും ഐശ്വര്യ കൂട്ടിച്ചേർത്തു.

മലയാളത്തിലിറങ്ങിയ ദി ഗ്രേറ്റ് ഇന്ത്യൻ കിച്ചൻ വളരെ പ്രസക്തമായ വിഷയമാണ് പറയുന്നതെന്നും അത് എല്ലാവരും മനസിലാക്കേണ്ടതാണെന്നും അതിനാലാണ് ചിത്രം തമിഴിലേക്ക് റീമേക്ക് ചെയ്യണമെന്നു തീരുമാനിച്ചതെന്നും ഐശ്വര്യ വെളിപ്പെടുത്തി. ചിത്രം ഫെബ്രുവരി മൂന്നിനു തിയറ്ററിലെത്തുമെന്നും ഇന്നും വളരെ പ്രസക്തമായ വിഷയമാണ് ചിത്രം പറയുന്നതെന്നും നടി പറഞ്ഞു.

നിമിഷ സജയൻ പ്രധാന കഥാപാത്രമായി ജിയോ ബേബി സംവിധാനം ചെയ്തു 2021 ൽ ഒടിടി പ്ലാറ്റ്ഫോമിൽ റിലീസായ ചിത്രമായിരുന്നു ദി ഗ്രേറ്റ് ഇന്ത്യൻ കിച്ചൻ. തമിഴിനു പുറമേ ദി ഗ്രേറ്റ് ഇന്ത്യൻ കിച്ചൻ ഹിന്ദിയിലും റീമേക്ക് ചെയ്യുന്നുണ്ട്. ബോളിവുഡ് താരം സാനിയ മൽഹോത്രയാണ് ഹിന്ദി പതിപ്പിലെത്തുന്നത്.

ആർ. കണ്ണനാണ് തമിഴ് ചിത്രം ദി ഗ്രേറ്റ് ഇന്ത്യൻ കിച്ചൻ സംവിധാനം ചെയ്യുന്നത്. ഒരുപിടി മികച്ച സ്ത്രീപക്ഷ സിനിമകളുടെ ഭാഗമായ ഐശ്വര്യ രാജേഷിൻ്റെ മറ്റൊരു ശ്രദ്ധേയ പ്രകടനമായിരിക്കും തമിഴ് ചിത്രത്തിലുണ്ടാവുകയെന്നാണ് വിലയിരുത്തുന്നത്.

ഡിസംബർ 30ന് തിയേറ്ററുകളിൽ റിലീസ് ചെയ്ത ഡ്രൈവർ ജമുനയാണ് ഐശ്വര്യ രാജേഷിൻ്റെ ഏറ്റവും ഒടുവിൽ തിയറ്ററിലെത്തിയ ചിത്രം.