ഭജന്‍ ഭദ്രന്‍

ഏഴ് വര്‍ഷത്തിന് ശേഷം വീണ്ടും ഒരു അല്‍ഫോന്‍സ് പുത്രന്‍ ചിത്രം തീയറ്ററുകളില്‍ എത്തിയിരിക്കുകയാണ്. 2015ല്‍ പ്രേമം സൃഷ്ടിച്ച തരംഗം ഗോള്‍ഡില്‍ നിന്നും പ്രതീക്ഷിക്കാം എന്ന് തോന്നുന്നില്ല. എങ്കിലും, സിനിമ കാണാന്‍ പോകുന്നവര്‍ നിരാശപ്പെടേണ്ടി വരില്ല എന്ന് നിസംശയം പറയാം.

പ്രേമം കണ്ടവര്‍ക്ക് ഒരിക്കലും മറക്കാനാവാത്തതാണ് ചിത്രത്തിന്റെ ടൈറ്റില്‍. അതേ ശൈലിയാണ് ഏഴുവര്‍ഷത്തിനിപ്പുറം സംവിധായകന്‍ ഗോള്‍ഡിലും ഉപയോഗിച്ചിട്ടുള്ളത്. പ്രണയമെന്ന വര്‍ണ്ണാഭമായ വികാരത്തെ പൂമ്പാറ്റയിലൂടെ പ്രേക്ഷകരിലെത്തിക്കാന്‍ പ്രേമത്തിലൂടെ അല്‍ഫോന്‍സ് പുത്രന് സാധിച്ചിരുന്നു. ഗോള്‍ഡില്‍ നായക കഥാപാത്രമായ ജോഷിക്ക് അപ്രതീക്ഷിതമായി കിട്ടുന്ന നിധിയുടെ കഥയാണ് പറയുന്നത്. അതുകൊണ്ട് തന്നെ ഐശ്വര്യത്തിന്റെ പ്രതീകമായ പുല്‍ച്ചാടിയെ ചിത്രത്തില്‍ ഉടനീളം കാണാം. നിധി കൈക്കലാക്കാനുള്ള നായകന്റെ പ്രയത്‌നത്തെ ഉറുമ്പ് ഭക്ഷണം തിരയുന്നതുമായി താരതമ്യം ചെയ്യുന്ന മൊണ്ടാഷും ചിത്രത്തിന് ഒരു അല്‍ഫോന്‍സ് ടച്ച് നല്‍കുന്നു.

ചിത്രത്തില്‍ എടുത്ത് പറയേണ്ട മറ്റൊരുകാര്യം കാസ്റ്റിംഗ് ആണ്. ഷമ്മി തിലകനും ലാലു അലക്‌സും മത്സരിച്ചുള്ള പ്രകടനം തന്നെയാണ് കാഴ്ചവച്ചിരിക്കുന്നത്. ഇരുവരുടെയും തമാശകളില്‍ ഒന്ന് പോലും നനഞ്ഞ പടക്കമായി മാറിയിട്ടില്ല. ചിത്രത്തില്‍ മറ്റൊരു ശ്രദ്ധിക്കപ്പെട്ട കഥാപാത്രം ബാബുരാജിന്റെ പോലീസ് വേഷമാണ്. എന്നാല്‍ മറ്റു പല കഥാപാത്രങ്ങള്‍ക്കും ആവശ്യത്തിന് സ്‌ക്രീന്‍ സ്‌പേസ് കിട്ടിയിട്ടില്ല. ഒരു ചെറിയ ഗാനരംഗത്തില്‍ മാത്രം എത്തിയ ഷിജു വില്‍സണും വളരെ കുറച്ച് സമയം മാത്രം സ്‌ക്രീനില്‍ മുഖം കാണിച്ച വിനയ് ഫോര്‍ട്ടും റോഷന്‍ മാത്യുവും ഷറഫുദീനും അവതരിപ്പിച്ച കഥാപാത്രങ്ങള്‍ക്ക് ചിത്രത്തിന്റെ കഥ മുന്നോട്ട് കൊണ്ടുപോകുന്നതില്‍ യാതൊരു പങ്കും വഹിക്കാന്‍ സാധിച്ചില്ല എന്നുതന്നെ പറയാം.

ചിത്രത്തിലെ നായിക നയന്‍താരയാണെങ്കിലും പൃഥ്വിരാജ് നയന്‍താര ജോഡികള്‍ ഒരുമിച്ചുള്ള ഒരു സീന്‍ പോലും കാണാനുള്ള ഭാഗ്യം പ്രേക്ഷകര്‍ക്ക് ലഭിച്ചില്ല. ദീപ്തി സതിയുടെ സാന്നിദ്ധ്യവും ഒരു ഗാനത്തിലും ഒരു സീനിലുമായി ചുരുങ്ങി. ചെമ്പന്‍ വിനോദിന്റെയും ജസ്റ്റിന്‍ ജോണിന്റെയും ഗുണ്ടാകഥാപത്രങ്ങള്‍ നിറഞ്ഞ കയ്യടി നേടി.

വളരെ ചെറിയൊരു പ്ലോട്ട് ആയിരുന്നിട്ടും ഒരുപാട് കഥാപാത്രങ്ങളെ ഉള്‍കൊള്ളിച്ചത് ചിത്രത്തിന്റെ ഒരു പോരായ്മയാണ്. നയന്‍താര നായികയായി എത്തുന്ന ഒരു ചിത്രം എന്ന രീതിയില്‍ തീയറ്റേറുകളില്‍ ഗോള്‍ഡ് കാണാന്‍ പോകുന്നവര്‍ക്ക് ഒരുപക്ഷെ നിരാശപ്പെടേണ്ടിവന്നേക്കാം. നേരവും പ്രേമവും നല്‍കിയ ഒരു സംതൃപ്തി ഗോള്‍ഡില്‍ നിന്ന് പ്രേക്ഷകന് ലഭിക്കുമോ എന്ന കാര്യം സംശയമാണ്.