കേരളക്കരെയെ ഒന്നാകെ ദുഃഖത്തിലാഴ്ത്തിയ വാർത്തയാണ് കൊല്ലം സുധിയുടെ അകാലത്തിലെ വിയോഗം. തങ്ങൾക്കൊപ്പം കഴിഞ്ഞ ദിവസം വരെ തമാശകൾ പറഞ്ഞും സംസാരിച്ചും ഇരുന്ന സുഹൃത്ത് ഇനി ഇല്ലാ എന്ന വസ്തുത വിശ്വസിക്കാൻ പ്രിയപ്പെട്ടവർക്ക് ഇതുവരെ കഴിഞ്ഞിട്ടില്ല. ഏവർക്കും പ്രിയങ്കരനായ താരത്തിന്റെ ഓർമകളാണ് ഇപ്പോൾ സോഷ്യൽമീഡിയ നിറയെ.

മലയാളികളെ കുടുകുടേ ചിരിപ്പിച്ച കൊല്ലം സുധിയുടെ ജീവിതം ഏറെ പ്രതിസന്ധികൾ നിറഞ്ഞതായിരുന്നു. സുധിയുടെ ആദ്യ വിവാഹം പ്രണയിച്ചായിരുന്നു ആ ബന്ധത്തിൽ ഉണ്ടായ മകന് ഒന്നര വയസായിരിക്കുമ്പോള്‍ ഭാര്യ കുഞ്ഞിനെ സുധിയ്ക്ക് നൽകി മറ്റൊരാളുടെ കൂടെ പോയി.

ALSO READ

ബിഗ്ഗ് ബോസ്സ് താരം ദേവുവിന് നേരെ അതിക്രമം, പരാതി നൽകി താരം

ശേഷം മകനെയും കൊണ്ടാണ് താരം സ്റ്റേജ് ഷോകളിൽ പോയിരുന്നത്. സ്റ്റേജിൽ കയറുമ്പോൾ സ്റ്റേജിന് പിന്നിൽ അവനെ ഉറക്കി കിടത്തുന്നതും 5 വയസ്സായപ്പോൾ മകൻ കർട്ടൻ വലിക്കാൻ ഇരുന്നതുമെല്ലാം നിറകണ്ണുകളോടെ സുധി തന്നെ വെളിപ്പെടുത്തിയിട്ടുള്ളതാണ്.

മകന് 11 വയസ്സായപ്പോഴാണ് സുധി രണ്ടാമത് വിവാഹം കഴിച്ചത്. ഭാര്യ രേണു. അന്നുമുതൽ തനിക്ക് സന്തോഷം മാത്രമുള്ള കുടുംബജീവിതം ആണ് ഉള്ളതെന്ന് സുധി ഒരിക്കൽ അഭിമുഖത്തിൽ പറയുകയുണ്ടായി. തന്റെ മകൻ അമ്മയുടെ കുറവ് അന്നു മുതൽ അനുഭവിച്ചിട്ടില്ല എന്ന് സുധി പറഞ്ഞു.

ഭാര്യ രേണവും രണ്ടു മക്കളും ആയിരുന്നു സുധിയുടെ ലോകം. തന്റെ ജീവിതത്തിലെ എല്ലാം അറിഞ്ഞ് തനിക്കൊപ്പം ജീവിക്കാൻ തീരുമാനിച്ച രേണു സുധിക്ക് അത്രമാത്രം പ്രിയപെട്ടവളായിരുന്നു. സുധിയുടെ വിയോഗത്തിൽ തകർന്നിരിക്കുകയാണ് താരത്തിന്റെ ഭാര്യയും രണ്ട് മക്കളും.

തൃശൂർ കയ്പമംഗലത്ത് വച്ച് തിങ്കളാഴ്ച്ച രാവിലെ  നാലരയോടെ ഉണ്ടായ അപകടമാണ് സുധിയുടെ ജീവനെടുത്തത്. വടകരയിൽ നിന്നും പ്രോഗ്രാം കഴിഞ്ഞ് മടങ്ങിയ സംഘം സഞ്ചരിച്ചിരുന്ന കാർ എതിരെ വന്ന പിക്കപ്പുമായി കൂട്ടിയിടിക്കുകയായിരുന്നു. അപകടം നടന്ന ഉടനെ ഇവരെ ആശുപത്രിയിൽ എത്തിച്ചെങ്കിലും സുധിയുടെ ജീവൻ രക്ഷിക്കാനായില്ല.

ബിനു അടിമാലി, ഉല്ലാസ് അരൂർ, മഹേഷ് എന്നിവരും സുധിക്കൊപ്പം ഉണ്ടായിരുന്നു. ഇവരെ വിദഗ്ദ ചികിത്സയ്ക്ക് ആയിട്ട് എറണാകുളത്തെ സ്വകാര്യ ആശുപത്രിയിലേക്ക് മാറ്റും. സ്വകാര്യ ചാനലിന്റെ പ്രോഗ്രാമിൽ പങ്കെടുത്ത് മടങ്ങുന്നതിനിടെയാണ് അപകടമുണ്ടായതെന്നാണ് വിവരം.

സിനിമകളിലും ടിവി ഷോകളിലുമായി മലയാളികളെ ഏറെ ചിരിപ്പിച്ച നടനാണ് കൊല്ലം സുധി. ജഗദീഷിനെ അനുകരിച്ച് ഏറെ കയ്യടി നേടിയിട്ടുള്ള താരം കൂടിയായിരുന്നു അദ്ദേഹം.

ബിനു അടിമാലി, ഉല്ലാസ് എന്നിവർക്കൊപ്പമായിരുന്നു സുധി പല വേദികളിലും പ്രോഗ്രാം അവതരിപ്പിച്ചിരുന്നത്. ഇവർ ഒന്നിച്ച് സ്റ്റേജിൽ എത്തുമ്പോൾ തന്നെ കാണികളിൽ ആവേശം നിറയുമായിരുന്നു.

മിമിക്രിയിലൂടെ ബിഗ് സ്ക്രീനില്‍ എത്തിയ ആളാണ് സുധി. 2015 ല്‍ പുറത്തിറങ്ങിയ കാന്താരി എന്ന ചിത്രത്തിലൂടെയാണ് സിനിമയില്‍ എത്തിയത്. കട്ടപ്പനയിലെ ഋത്വിക് റോഷന്‍ എന്ന ചിത്രത്തിലെ സുധിയുടെ കഥാപാത്രം ഏറെ ശ്രദ്ധിക്കപ്പെട്ടിരുന്നു.

കുട്ടനാടന്‍ മാര്‍പാപ്പ, തീറ്റ റപ്പായി, വകതിരിവ്, ആന്‍ ഇന്റര്‍നാഷ്ണല്‍ ലോക്കല്‍ സ്‌റ്റോറി, കേശു ഈ വീടിന്റെ നാഥന്‍, എസ്‌കേപ്പ്, സ്വര്‍ഗത്തിലെ കട്ടുറുമ്പ് എന്നിവയാണ് സുധി അഭിനയിച്ച മറ്റ് സിനിമകള്‍.