ബി.വി. അരുണ്‍ കുമാര്‍

രാമലീലയ്ക്ക് ശേഷം ദിലീപ്, അരുണ്‍ ഗോപി കൂട്ടുകെട്ടില്‍ എത്തിയ ചിത്രമാണ് ബാന്ദ്ര. വിജയകരമായി പ്രദര്‍ശനം തുടരുന്ന സിനിമയുടെ വിശേഷങ്ങള്‍ ദിലീപ് പറയുന്നു

വ്യത്യസ്ത മുഖം

ബാന്ദ്രയ്ക്കു വേണ്ടി കുറച്ച് എക്‌സര്‍സൈസൊക്കെ ചെയ്യേണ്ടി വന്നു. ശാരീരിക അധ്വാനം എന്നുപറയുന്ന രീതിയില്‍ കുറച്ചു ഡയറ്റൊക്കെ ഫോളോ ചെയ്തിട്ടുണ്ട്. അലന്‍ അലക്‌സാണ്ടര്‍ ഡൊമനിക് എന്നാണ് കഥാപാത്രത്തിന്റെ പേര്. ആലാ എന്നാണ് എല്ലാവരും വിളിക്കുന്നത്. അയാള്‍ക്ക് ഇതുവരെയുള്ള സിനിമകളില്‍ നിന്ന് വ്യത്യസ്തമായ മുഖവും രൂപവും ഉണ്ടെന്നാണ് ഞാന്‍ വിശ്വസിക്കുന്നത്. ഇതൊരു ഡോണ്‍ സിനിമയല്ല. മെച്വേര്‍ഡായ രണ്ടുപേരുടെ ലൗ സ്റ്റോറിയാണ്. ഇമോഷണലി പാക്ക്ഡാണ്. അയാളും അയാളുടെ കുടുംബവും സുഹൃത്തുക്കളും ഒക്കെയുള്ള ഇമോഷന്‍.

ഇത് നമ്മുടെ സിനിമ

വന്‍ മുതല്‍മുടക്കില്‍ എടുത്തിരിക്കുന്ന സിനിമയാണ് ബാന്ദ്ര. ഈ സിനിമ ഗംഭീര വിജയമാകട്ടെ എന്നുതന്നെയാണ് നമ്മുടെ പ്രാര്‍ത്ഥനയും പ്രതീക്ഷയും. കാരണം ഇത് എന്റെയോ, സംവിധായകന്‍ അരുണ്‍ ഗോപിയുടോയോ, നിര്‍മാതാവ് അജിത്തിന്റെയോ ആവശ്യം എന്നതിനേക്കാളുപരി മലയാള സിനിമയുടെ ആവശ്യമാണ്. വലിയ മുതല്‍മുടക്കിലുള്ള ഓരോ സിനിമയ്ക്കും വേണ്ടത് സപ്പോര്‍ട്ടാണ്. കേരളത്തില്‍ നിന്ന് അത്തരമൊരു സിനിമ വരുമ്പോള്‍ അത് വലിയൊരു വിജയമായാല്‍ മലയാളികള്‍ക്ക് അഭിമാനിക്കാനുള്ള വലിയ വിജയം തന്നെയാണ്. അതാണ് നമ്മുടെ പ്രാര്‍ത്ഥനയും പ്രതീക്ഷയും. സിനിമ വിജയിപ്പിക്കേണ്ടത് ജനങ്ങളാണ്. ഒരു അവകാശവാദവും ഞങ്ങള്‍ പറയുന്നില്ല. നിങ്ങള്‍ സിനിമ കാണൂ. ഈ സിനിമ നമ്മുടെ സിനിമയാണ്. പ്രേക്ഷകര്‍ക്കു വേണ്ടി നിര്‍മിച്ച സിനിമയാണ്. ഈ സിനിമ ഇവിടെ വിജയിച്ചാലേ മറ്റുള്ള എല്ലായിടത്തേക്കും പോയേക്കാം. അതിനു വേണ്ടിയാണ് ശ്രമിക്കുന്നത്.

എല്ലാവരും കൂടെ നിന്നു

ബാന്ദ്രയില്‍ മറ്റു ഭാഷയിലെ താരങ്ങളെല്ലാം വന്ന് 100 ശതമാനം ആത്മാര്‍ത്ഥമായാണ് വര്‍ക്ക് ചെയ്തിരിക്കുന്നത്. എല്ലാവരുടെയും പെര്‍ഫോമന്‍സ് കണ്ടാല്‍ അത് മനസിലാകും. ഇപ്പോള്‍ തമന്ന ആയാലും ഏറ്റവും നന്നായി പെര്‍ഫോം ചെയ്ത സിനിമയായിരിക്കും ഇത്. ശരത് കുമാര്‍, ഡിനോ മോറിയ, നമുക്ക് ഏറ്റവും പ്രിയപ്പെട്ട ഗണേഷ്‌കുമാര്‍ തുടങ്ങി ഒട്ടനവധി താരങ്ങള്‍ ഈ ചിത്രത്തിലുണ്ട്.

ഗണേഷ്‌കുമാറാണ് ഈ സിനിമയ്ക്കു വേണ്ടി ഏറ്റവും കൂടുതല്‍ സഹകരിച്ചിട്ടുള്ള വ്യക്തി. നിയമസഭാ സമ്മേളനം നടക്കുന്ന സമയത്തായിരുന്നു ഷൂട്ടിംഗ്. ഏകദേശം നൂറിലധികം ദിവസം ഈ സിനിമയുടെ മൊത്തം ഷൂട്ടിംഗ് ഉണ്ടായിരുന്നു. അതുപോലെ ഷാജോണ്‍ വേറൊരു സിനിമയ്ക്കും പോകാതെ ഈ സിനിമയ്ക്കു വേണ്ടി നിന്നു. പിന്നെ വേറൊരു നായിക കൂടിയുണ്ട് ബാന്ദ്രയില്‍, മംത മോഹന്‍ദാസ്. വേറെ സിനിമകള്‍ വന്നപ്പോഴും ബന്ദ്ര തീരുംവരെ കൂടെയുണ്ടായിരുന്നു.

ബാന്ദ്ര നല്‍കുന്ന സന്ദേശമെന്താണ്?

നമുക്ക് ഇമോഷന് പല മുഖങ്ങളുണ്ട്. അത് സമൂഹത്തിന് എങ്ങനെയാണ് മെസേജ് കൊടുക്കുന്നതെന്ന് ഓരോരുത്തരുടെ കാഴ്ചപ്പാരും കാര്യങ്ങളുമാണ്. നിങ്ങള്‍ സിനിമ കാണൂ. വളരെ നല്ല മനസോടെ, അതായത് നമ്മള്‍ ഒരു സിനിമ ഉണ്ടാക്കിയ രീതിയില്‍ കാണാതെ സിനിമ എന്‍ജോയ് ചെയ്യാന്‍ പോയി കാണൂ. എനിക്കൊരു അപേക്ഷയുണ്ട്. ഈ സിനിമയെ നിങ്ങള്‍ പോസ്റ്റ്‌മോര്‍ട്ടം ചെയ്യാനല്ല വന്നിരിക്കേണ്ടത്. എന്‍ജോയ് ചെയ്യുക. ആ മനസോടുകൂടി ചെന്ന് സിനിമ കാണണം. പിന്നെ നമ്മളെ സപ്പോര്‍ട്ട് ചെയ്യുക.

ഉദയ്കൃഷ്ണക്കൊപ്പം വീണ്ടും

ഉദയ്കൃഷ്ണയുടെ പത്തിരുപത് സിനിമകളില്‍ ഞാന്‍ അഭിനയിച്ചിട്ടുണ്ട്. അതില്‍ നിങ്ങള്‍ തന്നെ ഏറ്റവും കൂടുതല്‍ ഓമനിക്കുന്ന ചിത്രങ്ങളാണ് സിഐഡി മൂസയും റണ്‍വെ, മായാ മോഹിനി, ക്രിസ്റ്റിയന്‍ ബ്രദേഴ്‌സ് എന്നിവ. അതിനു പുറമെ എല്ലാവരും ഒരുമിച്ച് അഭിനയിച്ച സിനിമയാണ് ട്വന്റി20യും അദ്ദേഹം എഴുതിയതാണ്. ഇത്രയും ഒരുപാട് സിനിമകള്‍ ചെയ്ത എഴുത്തുകാരനാണ് ഉദയ്കൃഷ്ണ.

മുന്നോട്ടുപോകുക

മനുഷ്യനെന്നു പറയുമ്പോള്‍ ഉയര്‍ച്ചയും താഴ്ചയും ഉണ്ടായിക്കൊണ്ടേയിരിക്കും. പക്ഷേ നമ്മള്‍ നമ്മുടെ ജോലികള്‍ ചെയ്തുകൊണ്ടേ ഇരിക്കുക. അതില്‍ ഏതാണ് ക്ലിക്കാകുന്നതെന്ന് നമുക്കറിയില്ല. സക്‌സസ് ഫോര്‍മുല എന്താണെന്നറിയില്ല. അതറിയാമെങ്കില്‍ നമുക്കതുമാത്രം ചെയ്താല്‍ മതി. നമ്മള്‍ പ്രാര്‍ത്ഥനയോടെ മുന്നോട്ടു മുന്നോട്ടു ശ്രമിച്ചുകൊണ്ടിരിക്കുകയാണ്. ഇതു നന്നാകണേ എന്ന പ്രാര്‍ത്ഥനയോടെയാണ് നമ്മള്‍ നിങ്ങളുടെ മുന്നിലിരിക്കുന്നതും പ്രേക്ഷകരുടെ മുന്നിലേക്ക് ഈ സിനിമ കൊണ്ടുവന്നതും.