ബി.വി.അരുണ്‍ കുമാര്‍

മാമാങ്കത്തിലെ മൂക്കുത്തി മൂക്കുത്തി കണ്ടില്ല എന്ന പാട്ട് ആരും മറക്കാനിടയില്ല. മമ്മൂട്ടി നായകനായ ചിത്രത്തില്‍ നോര്‍ത്തിന്ത്യയില്‍ നിന്ന് മലയാളക്കരയെ ഇളക്കിമറിച്ച നടി പ്രാചി തെഹ്ലനാണ് ആ നൃത്ത രംഗത്ത്. നെറ്റ്ബോള്‍, ബാസ്‌കറ്റ്ബോള്‍ താരവുമാണ് പ്രാചി തെഹ്ലാന്‍. 2010 ലെ കോമണ്‍വെല്‍ത്ത് ഗെയിംസിലും 2010, 2011 ലെ ഏഷ്യന്‍ ചാമ്പ്യന്‍ഷിപ്പിലും ഇന്ത്യയെ പ്രതിനിധീകരിച്ച ഇന്ത്യ നെറ്റ്ബോള്‍ ടീമിന്റെ ക്യാപ്റ്റനായിരുന്നു പ്രാചി. പ്രാചിയുടെ നായകത്വത്തില്‍ 2011 ലെ സൗത്ത് ഏഷ്യന്‍ ബീച്ച് ഗെയിംസില്‍ ഇന്ത്യന്‍ ടീമിന്റെ ആദ്യ കിരീടം ഇന്ത്യ സ്വന്തമാക്കി. 2016 ജനുവരിയില്‍ ദിയ ഔര്‍ ബാത്തി ഹം എന്ന സ്റ്റാര്‍ പ്ലസിലെ ടെലിവിഷന്‍ സീരിയലിലൂടെയാണ് അഭിനയരംഗത്തെത്തിയത്. 2017 ല്‍ പുറത്തിറങ്ങിയ പഞ്ചാബി സിനിമയായ അര്‍ജ്ജാനില്‍ അഭിനയിച്ചുകൊണ്ടാണ് പ്രാചി സിനിമാരംഗത്തേക്ക് കടന്നുവന്നത്.

മമ്മൂട്ടി നായകനായ മാമാങ്കം എന്ന ചിത്രത്തിലെ ഉണ്ണിമായ എന്ന കഥാപാത്രത്തെ അവതരിപ്പിച്ചുകൊണ്ടായിരുന്നു മലയാളത്തിലെ അരങ്ങേറ്റം. മോഹന്‍ലാല്‍ നായകനാകുന്ന റാം എന്ന ചിത്രത്തിലൂടെ വീണ്ടും മലയാളികള്‍ക്കു മുന്നിലെത്താനുള്ള തയാറെടുപ്പിലാണ് പ്രാചി. ഡല്‍ഹി സ്വദേശിനിയായ താരം സിനിമാ വിശേഷങ്ങള്‍ പറയുന്നു. 

മാമാങ്കത്തിനു ശേഷം മലയാളത്തില്‍ കണ്ടിട്ടില്ലല്ലോ

മാമാങ്കം എന്റെ മൂന്നാമത്തെ ചിത്രമായിരുന്നു. മലയാളത്തില്‍ ആദ്യത്തേതും. ഓഡിഷനിലൂടെയാണ് എനിക്ക് അതിലേക്ക് അവസരം ലഭിച്ചത്. ആ സിനിമയുടെ ആദ്യം മുതലേ, അതായത്, പദ്മകുമാര്‍ സാര്‍ സംവിധായകനായി വരുന്നതിനു മുമ്പേ, ആ സിനിമയുടെ ഭാഗമായിരുന്നു. ആ സിനിമയിലൂടെ എന്നെ മലയാളക്കര ഒരു നടിയായി സ്വീകരിച്ചു എന്നറിയുന്നതില്‍ സന്തോഷമുണ്ട്. മമ്മൂട്ടി സാറിനൊപ്പം അഭിനയിക്കാന്‍ സാധിച്ചെന്നതും പ്രത്യേകതയാണ്. ഞാന്‍ അദ്ദേഹത്തിന്റെ ഒരു ആരാധിക കൂടിയാണ്. മാമാങ്കത്തിനു ശേഷം മറ്റു പ്രോജക്റ്റുകളൊന്നും മലയാളത്തില്‍ നിന്ന് വന്നിരുന്നില്ല. ഇപ്പോള്‍ ജീത്തു ജോസഫ് സാര്‍ സംവിധാനം ചെയ്യുന്ന റാം എന്ന ചിത്രത്തില്‍ അഭിനയിക്കുന്നുണ്ട്. മോഹന്‍ലാല്‍ സാറാണ് നായകന്‍. അങ്ങനെ എന്റെ രണ്ടാമത്തെ മലയാളം ചിത്രവും ഉടന്‍ റിലീസാകുമെന്ന പ്രതീക്ഷയിലാണ്. ആ സിനിമയും മലയാളക്കര ഇരുകൈയും നീട്ടി സ്വീകരിക്കുമെന്ന വിശ്വാസവുമുണ്ട്.

മുക്കുത്തി പെണ്ണെന്നാണല്ലോ മലയാളികള്‍ വിളിക്കുന്നത്

ശരിയാണ്. മാമാങ്കത്തില്‍ ഉണ്ണിമായ എന്ന കഥാപാത്രത്തെയാണ് അവതരിപ്പിച്ചത്. പക്ഷേ ആ പാട്ടാണ് കൂടുതലും ഹിറ്റായിരിക്കുന്നത്. നോര്‍ത്തിന്ത്യയില്‍ നിന്ന് വന്നൊരു പെണ്‍കുട്ടി കേരളത്തനിമയുള്ള നൃത്തം അവതരിപ്പിച്ചതെങ്ങനെയെന്ന് പോലും ചോദിച്ചിരുന്നു. സത്യത്തില്‍ ഉണ്ണിമായ എന്ന കഥാപാത്രമായല്ല എന്നെ പലരും കാണുന്നത്. മുക്കുത്തി പെണ്ണായിട്ടാണ്. എനിക്ക് കേരളത്തില്‍ കുറേ കൂട്ടുകാരുണ്ട്. അവര്‍ പോലും എന്നെ ഇപ്പോള്‍ വിളിക്കുന്നത് മുക്കുത്തി പെണ്ണെന്നാണ്. അവര്‍ പറഞ്ഞാണ് ഞാന്‍ അറിയുന്നത് കേരളത്തിലും എന്നെ മുക്കുത്തി പെണ്ണെന്ന് വിളിക്കാറുണ്ടെന്ന്. സത്യത്തില്‍ നോര്‍ത്തിന്ത്യയില്‍ ജനിച്ച എന്നെ കേരളക്കര ദത്തെടുക്കുകയായിരുന്നു, മാമാങ്കത്തിലൂടെ. കുറേക്കാലം മുമ്പ് ഡല്‍ഹിക്കുട്ടിയെന്നും വിളിച്ചിരുന്നു. ഇപ്പോള്‍ ഞാന്‍ മുക്കുത്തി പെണ്ണെന്ന വിളി ഇഷ്ടപ്പെടുന്നു.

മോഹന്‍ലാലിനൊപ്പം റാമിലെ അഭിനയത്തെ കുറിച്ച്

ജീത്തു ജോസഫ് സാറാണ് സംവിധാനം. ലാലേട്ടന്‍ നായകനായെത്തുന്നു. ഇതില്‍ക്കൂടുതലൊന്നും ഇപ്പോള്‍ പറയാനാകില്ല. സിനിമ റിലീസിന് തയാറെടുക്കുകയാണ്. 

മലയാള സിനിമയില്‍ ആരാണ് റോള്‍ മോഡല്‍

മമ്മൂട്ടി സാര്‍ തന്നെയാണ് എന്റെ റോള്‍ മോഡല്‍. നടിമാരില്‍ മഞ്ജു വാര്യറെ ഇഷ്ടമാണ്.

മികച്ച നടനുള്ള സംസ്ഥാന സര്‍ക്കാരിന്റെ അവാര്‍ഡ് മമ്മൂട്ടിക്ക് കിട്ടിയത് അറിഞ്ഞിരുന്നോ

ആ... അറിഞ്ഞു. മാത്രമല്ല അദ്ദേഹത്തെ ഫോണില്‍ വിളിച്ച് അഭിനന്ദനം അറിയിക്കുകയും ചെയ്തു.

കേരളത്തിലെ ഇഷ്ടപ്പെട്ട ഭക്ഷണം ഏതാണ്

പുട്ടും കടലക്കറിയും എനിക്ക് ഏറെ ഇഷ്ടപ്പെട്ട ഭക്ഷണമാണ്. ഡല്‍ഹിയാണ് എന്റെ ജന്‍മദേശം. അവിടെ ഇത്തരം ഭക്ഷണം കിട്ടാന്‍ വളരെ പാടാണ്. പക്ഷേ, കേരളത്തില്‍ അങ്ങനെയല്ല. തട്ടുകടകളും ഹോട്ടലുകളും നിരവധിയുണ്ട്. അവിടെയെല്ലാം പുട്ടും കടലയും കിട്ടും. പിന്നെ കൊത്തു ബറോട്ടയും ഇഷ്ടമാണ്. പായസവും എനിക്ക് ഇഷ്ടപ്പെട്ടതാണ്.

കേരളത്തിലെ ഇഷ്ടപ്പെട്ട സ്ഥലങ്ങള്‍

ഐ ലൗ കൊച്ചി. കാരണം ഞാന്‍ സിനിമയ്ക്കായി ആദ്യമെത്തിയ സ്ഥലം കൊച്ചിയാണ്. കുറേ സുഹൃത്തുക്കള്‍ എനിക്ക് അവിടെയുണ്ട്. പിന്നെ വയനാട് ഇഷ്ടമാണ്. പച്ചപ്പും മലനിരകളും എന്റെ മനസിനെ ആകര്‍ഷിച്ചു. മാമാങ്കത്തിന്റെ ഷൂട്ടിംഗും വയനാടുണ്ടായിരുന്നു.

പുതിയ പ്രോജക്ട്

എന്റെ അഞ്ചാമത്തെ ചിത്രമാണ് ജെന്റില്‍മാന്‍ രണ്ടാം ഭാഗം. അതില്‍ അഭിനയിക്കാനുള്ള തയാറെടുപ്പിലാണ്. ആ കഥാപാത്രത്തെ കുറിച്ചും ഇപ്പോള്‍ പറയാനാകില്ല. ഷൂട്ടിംഗ് അടുത്തമാസം തുടങ്ങും.

ഏതുതരം കഥാപാത്രങ്ങളാണ് ഇഷ്ടം

അതൊക്കെ സ്‌ക്രിപ്റ്റിനനുസരിച്ചാണ് നോക്കുന്നത്. ചില പ്രത്യേക വേഷങ്ങളേ ചെയ്യൂ എന്നൊന്നും എനിക്കില്ല. ഒരു ബഹുമുഖ നടിയാകാനാണ് എനിക്ക് ആഗ്രഹം. അതിനായി കാത്തിരിക്കുകയാണ്. ഐ ആം വെയിറ്റിംഗ്...

കേരളത്തെ കുറിച്ച്

തങ്ങള്‍ക്ക് ഇഷ്ടമുള്ളവരെ ജീവന് തുല്യം സ്നേഹിക്കുന്നവരാണ് മലയാളികള്‍. നോര്‍ത്തിന്ത്യക്കാരിയായിട്ടും അവരുടെ മനസില്‍ ഒരു സ്ഥാനം നേടാന്‍ സാധിച്ചത് എന്റെ മഹാഭാഗ്യമാണ്. എന്റെ കഥാപാത്രത്തേയും അവര്‍ സ്വീകരിച്ചു. മലയാളികള്‍ നല്‍കിയ സ്നേഹത്തിനും സ്വീകരണത്തിനും നന്ദി പറയുകയാണ് ഈ അവസരത്തില്‍ ഞാന്‍. കേരളത്തിന്റെ മകളായാണ് അവരെന്നെ കണ്ടത്. കായിക രംഗത്തു നിന്ന് വന്നയാളെന്ന നിലയിലും എനിക്ക് അവര്‍ ബഹുമാനവും സ്നേഹവും നല്‍കിയിരുന്നു.