സഹപ്രവർത്തകരെയും ആരാധകരെ ഏറെ കണ്ണീരിലാഴ്ത്തിയ ഒന്നായിരുന്നു നടൻ ഇന്നസെന്റിന്റെ വിടവാങ്ങൽ. അദ്ദേഹത്തിന്റെ മരണം കഴിഞ്ഞ് ഒരു ദിവസം പിന്നിടുമ്പോൾ മാധ്യമങ്ങൾക്കെതിരെ സോഷ്യൽ മീഡിയയിൽ വിമർശനം ശക്തമാവുകയാണ്.

സിനിമാ താരങ്ങൾ മൃതദേഹം കാണാൻ എത്തുമ്പോൾ വീഡിയോയും പ്രതികരണവും എടുക്കാനായി ക്യാമറയും മൈക്കുമായി തിക്കിതിരക്കുന്നതിനെതിരെയാണ് സോഷ്യൽ മീഡിയയിൽ വിമർശനം ശക്തമാവുന്നത്.

നടൻ മോഹൻലാൽ കഴിഞ്ഞ ദിവസം രാത്രി മൃതദേഹം കാണാനെത്തിയപ്പോൾ ഉണ്ടായ തിരക്ക് ചൂണ്ടിക്കാണിച്ചാണ് പ്രധാനമായും വിമർശനം ഉയർന്നത്.

യാതൊരുവിധ സാമാന്യമര്യാദയും ഇല്ലാത്ത തനി പാപ്പരാസികൾ ആയി മലയാളി മാധ്യമ പ്രവർത്തകർ മാറി എന്നാണ് സോഷ്യൽ മീഡിയയിൽ വന്ന ഒരു പ്രതികരണം.

വിദേശരാജ്യങ്ങളിൽ ഇത്ര പോലും ഉണ്ടാകില്ല, അവർ സ്വകാര്യത മാനിക്കും, ഇവിടെ പ്രിയപ്പെട്ടവർ കരയുന്നത് വരെ ക്ലോസപ്പ് ഷോട്ട് എടുത്ത് ബി.ജി.എം. കയറ്റി നാട്ടുകാരെ മൊത്തം കാണിക്കുമെന്നാണ് മറ്റൊരു പ്രതികരണം.

ALSO READ

ജയ ജയ ജയ ജയഹേ ആ ഫ്രഞ്ച് സിനിമയുടെ കോപ്പിയടിയല്ല, തെിവുകളുമായി സംവിധായകൻ വിപിൻ ദാസ്

സഹപ്രവർത്തകന്റെ മരണത്തിൽ മനം നൊന്ത് കരയാൻ കൂടി കഴിയാത്ത അവസ്ഥയാണ്. മരിച്ചു കിടക്കുന്ന ആളെ കാണാൻ നിൽക്കുമ്പോൾ ഇപ്പൊ കരയും എന്ന മട്ടിൽ ക്യാമറ മുഖത്തേയ്ക്ക് ഫോക്കസ് ചെയ്തുള്ള നിൽപ്പ് അവസാനിപ്പിക്കണമെന്നുള്ള ആവശ്യവും സോഷ്യൽ മീഡിയയിൽ ഉയരുന്നുണ്ട്.

കർണാടകയിലും തമിഴ്‌നാട്ടിലും സിനിമ താരങ്ങൾ മരിക്കുമ്പോൾ മാധ്യമപ്രവർത്തകർ കാണിക്കുന്ന മര്യാദ കണ്ടുപഠിക്കണമെന്നും മൃതദേഹത്തിനടുത്ത് അവർ ക്യാമറയുമായി തിക്കിതിരക്കാറില്ലെന്നും വിമർശനമുയർന്നു.

കന്നഡ താരം പുനീത് രാജ്കുമാറിന്റെ മൃതദേഹം പൊതുദർശനത്തിന് വെച്ചപ്പോൾ മാധ്യമങ്ങൾ കാണിച്ച മര്യാദ ചിലർ ഉദാഹരണമായും ചൂണ്ടിക്കാണിച്ചു. മാധ്യമപ്രവർത്തകർക്ക് പുറമേ മൊബൈൽ ക്യാമറകളുമായി വരുന്നവർക്കെതിരെയും വിമർശനം ഉയർന്നിട്ടുണ്ട്.

അതേസമയം മാധ്യമപ്രവർത്തകരെ അനുകൂലിച്ചും ചിലർ രംഗത്തെത്തി. ആളുകൾ കാണാൻ ആഗ്രഹിക്കുന്നതാണ് മാധ്യമ പ്രവർത്തകർ ഷൂട്ട് ചെയ്യുന്നതെന്നും അവരെ മാത്രം കുറ്റപ്പെടുത്താനാവില്ലെന്നും കമൻറുകൾ വന്നിരുന്നു