ചലച്ചിത്ര താരങ്ങളെ ഹൃദയത്തോടെ ചേർത്ത് വെക്കുന്നവരാണ് തമിഴ് ജനത. കലാകാരന്മാരെ അളവറ്റ് സ്നേഹിക്കുകയും ബഹുമാനിക്കുകയും ചെയ്യുന്നവരാണ് തമിഴ് പ്രേക്ഷകർ. തങ്ങളുടെ കുടുംബത്തിലെ ഒരു അംഗത്തെപോലെയാണ് അവർ താരങ്ങളെ കാണുന്നതും പെരുമാറുന്നതും.

അതുകൊണ്ട് തന്നെ തമിഴ് സിനിമ താരങ്ങളുടെ ജീവിതത്തിൽ ഉണ്ടാവുന്ന സന്തോഷവും സങ്കടവുമെല്ലാം ആരാധകരും സ്വന്തം സന്തോഷവും സങ്കടവുമൊക്കെയായി കണക്കാക്കാറുമുണ്ട്. ചലച്ചിത്ര താരങ്ങളുടെ പേരിൽ അമ്പലം പണിയുകയും പൂജ ചെയ്യുകയും വരെ ചെയ്യാറുണ്ട്.

ആരാധനകാർ ഭ്രാന്തമായ താരാധന വച്ച് പുലർത്തുമ്പോൾ താരങ്ങളും തിരിച്ച് ആരാധകരോട് അങ്ങനെ തന്നെയാണ് പെരുമാറുന്നത്. അതുകൊണ്ട് തന്നെ തമിഴ് താരങ്ങളിൽ ആർക്കാണ് ജനപ്രീതി ഏറെ ഉള്ളതെന്ന് കണ്ടെത്തുക വളരെ പ്രയാസമുള്ള കാര്യമാണ്.

എന്നാൽ പ്രമുഖ മീഡിയ കണ്‍സള്‍ട്ടിംഗ് സ്ഥാപനമായ ഓര്‍മാക്സ് മീഡിയ തമിഴ് സിനിമയിലെ ഏറ്റവും ജനപ്രിയരായ പത്ത് പുരുഷ താരങ്ങളുടെ ലിസ്റ്റ് പുറത്തുവിട്ടിരിക്കുകയാണ്. ഈ വര്‍ഷം ജനുവരിയിലെ സൂചനകള്‍ അനുസരിച്ചാണ് ലിസ്റ്റ് തയ്യാറാക്കിയിരിക്കുന്നത്.

1.വിജയ്

ജനപ്രീയ നായകന്മാരിൽ ഒന്നാമൻ വിജയ് ആണ്. വിജയുടെ അഭിനയ മികവും മെയ് വഴക്കവും എപ്പോഴും ആരാധകർക്ക് താരത്തെ പ്രിയങ്കരനാക്കാറുണ്ട്. ജനങ്ങൾക്കായി അദ്ദേഹം നടത്തുന്ന ക്ഷേമ പ്രവർത്തനങ്ങളും താരത്തെ ആരാധകർക്കുമുന്നിൽ പ്രിയങ്കരനാക്കിയിട്ടുണ്ട്.

2.അജിത്ത് കുമാര്‍

വിജയ്ക്ക് തൊട്ട് പിന്നാലെ അജിത്ത് കുമാര്‍ തന്നെയാണ് താരം. താരം വളരെ സെലെക്ടിവ് ആണെങ്കിലും അദ്ദേഹത്തിന്റേതായി പുറത്തിറങ്ങുന്ന ചിത്രങ്ങൾക്കെല്ലാം ഗംഭീര വരവേൽപ്പാണ് ആരാധകരിൽ നിന്ന് ലഭിക്കുന്നത്.

മിക്യപ്പോഴും വിജയ് ചിത്രങ്ങൾക്ക് എതിരാളിയായി ഇറങ്ങുന്നത് അജിത് ചിത്രങ്ങളാണ്. ഇത്തവണ വിജയ് ചിത്രമായ വാരിസും അജിത്ത് ചിത്രമായ തുനിവും റിലീസ് ആയത് ഒരേ ദിവസമാണ്

3.സൂര്യ

ലിസ്റ്റിലെ മൂന്നാം സ്ഥാനം തമിഴ് ചലച്ചിത്ര ലോകത്തെ നടിപ്പിൻ നായകൻ സൂര്യക്കാണ് പ്രമുഖ തമിഴ് നടൻ ശിവകുമാറിന്റെ മകനായി ജനിച്ച താരത്തിന് തമിഴ് സിനിമയിൽ തിളങ്ങുവാൻ ഒരുപാട് പരിശ്രമിക്കേണ്ടിവന്നു.

താരത്തിന്റെ അഭിനയ മികവുകൊണ്ട് മികച്ച നടനെന്ന പേരും, താര പദവിയും ഒരുപോലെ സൂര്യയെ തേടിയെത്തി. ഗജനിയെന്ന ചിത്രം വന്‍ വിജയമായതോടെ സൂര്യ തന്റെ പേര് സൗത്ത് ഇന്ത്യന്‍ ലോകത്ത് എഴുതി ചേര്‍ത്തു. ഈ ഒറ്റ ചിത്രംകൊണ്ട് നിരവധി ആരാധകരെയും സ്വന്തമാക്കി .

4.രജനികാന്ത്

തമിഴകത്തിന്റെ സ്റ്റൈൽ മന്നനാണ് ലിസ്റ്റിൽ നാലാമത്. വില്ലനായി എത്തി നായകനായി സൗത്ത് ഇന്ത്യന്‍ സിനിമ പ്രേമികളുടെ ഹൃദയം കവര്‍ന്ന താരമാണ് സൂപ്പര്‍സ്റ്റാര്‍ രജനികാന്ത്.

ചടുലമായ സംസാരവും ആരെയും അമ്പരപ്പിക്കുന്ന മെയ്വഴക്കവും സ്റ്റൈലും ഈ 72 ആം വയസിലും താരത്തിന് തമിഴകത്ത് മാത്രമല്ല ലോകമെമ്പാടും ആരാധകരെ സൃഷ്ടിച്ച് നൽകിയിട്ടുണ്ട്.

5.കമലഹാസൻ

ഇന്ത്യൻ സിനിമ പിന്നിട്ട ഒരു നൂറ്റാണ്ടിൽ തന്റെ ജീവിതത്തിന്റെ അരനൂറ്റാണ്ടിലേറെ സമർപ്പിച്ച ഇതിഹാസ നായകനാണ് കമലഹാസൻ. ഉലക നായകനാണ് ലിസ്റ്റിൽ അഞ്ചാമനായി നിൽക്കുന്നത്. തമിഴ് സിനിമ അത്രയൊന്നും പേരെടുത്തിട്ടില്ലാത്ത കാലത്ത് കമൽ ചിത്രങ്ങൾ ലോകശ്രദ്ധ നേടിയിരുന്നു. ഇപ്പോഴും കമൽ ഹസൻ ചിത്രങ്ങൾക്ക് ലോകമെമ്പാടും ആരാധകരാണ്.

6.ധനുഷ്

തമിഴകത്തിന്റെ സ്വന്തം ബ്രൂസ്ലീയാണ് ധനുഷ്. താരമാണ് ലിസ്റ്റിൽ ആറാമനായി നിൽക്കുന്നത്. തുള്ളുവതോ ഇളമൈയിലൂടെ തമിഴ് സിനിമയ്ക്ക് കസ്തൂരിരാജ സംഭാവനചെയ്ത നടനാണ് ധനുഷ്.

സഹോദരന്‍ സെല്‍വരാഘവന്റെ കാതല്‍ കൊണ്ടേന്‍, പുതുപ്പേട്ടൈ എന്നീ ചിത്രങ്ങളിലൂടെ തമിഴ് സിനിമാ ലോകത്ത് പുതിയ ഇടം കണ്ടെത്തുകയായിരുന്നു ധനുഷ്.

സംവിധായകന്‍, ഗായകന്‍, ഗാനരചയിതാവ്, നിര്‍മാതാവ് തുടങ്ങി സമസ്ത മേഖലകളിലും കൈയൊപ്പിട്ട താരത്തിന്റെ അഭിനയജീവിതം ഹോളിവുഡിലെത്തി നില്‍ക്കുന്നു.

7.ശിവകാര്‍ത്തികേയന്‍

ടെലിവിഷൻ അവതാരകനായി എത്തി തമിഴ് സിനിമയിൽ സ്വന്തമായി ഒരു ഇടം സൃഷ്ട്ടിച്ച താരമാണ് ശിവകാര്‍ത്തികേയന്‍. ലിസ്റ്റിലെ ഏഴാമത്തെ പേരും ശിവകർത്തികേയന്റെയാണ്.

കോമഡിയും റൊമാൻസും തന്റേതായ ശൈലിയിൽ അഭിനയിച്ച് ഫലിപ്പിക്കാനുള്ള താരത്തിന്റെ കഴിവാണ് പ്രേക്ഷകർക്കിടയിൽ ശിവകാർത്തികേയന് പ്രത്യേക ഒരു സ്ഥാനം നേടി കൊടുത്തത്.

8.വിക്രം

മലയാളി നെഞ്ചോട് ചേർത്തുവച്ച് ഞങ്ങളുടെ പയ്യൻ എന്ന് വാഴ്ത്തിയ നടൻ. അതെ, വിക്രമാണ് ലിസ്റ്റിൽ എട്ടാമൻ. മലയാള സിനിമയിൽ സഹനടനായി എത്തി പിന്നീട് തെന്നിന്ത്യ കീഴടക്കിയ ചിയാൻ വിക്രമായി വളർന്നു.

സിനിമയ്ക്ക് വേണ്ടി എത്രവേണമെങ്കിലും കഷ്ടതകൾ അനുഭവിക്കാനും തന്റെ രൂപത്തിൽ ഏതു വിധമുള്ള മാറ്റങ്ങൾ വരുത്താനും കഴിവും അർപ്പണബോധവുമുള്ള വിക്രത്തിനു തമിഴിലും മലയാളത്തിലും ആരാധകർ ഒരുപോലെയാണ് ഉള്ളത്.

തിരിച്ചടികളിൽ പതറാതെ, എന്തിനെയും ചിരിയോടെ കാണുന്ന, ഏത് വിവാദത്തെയും മനോഹരമായി നേരിടുന്ന, കുടുംബവും ആരാധകരും ഒന്നാണെന്ന് വിശ്വസിക്കുന്ന താരം പലപ്പോളും ആരാധകരോടുള്ള തന്റെ സ്നേഹം തുറന്നു കാട്ടാറുണ്ട്.

9.വിജയ് സേതുപതി

ജൂനിയർ ആർട്ടിസ്റ്റായി വർഷങ്ങളോളം തമിഴ് സിനിമയിൽ ചെറിയ ചെറിയ വേഷങ്ങൾ ചെയ്ത താരമാണ് വിജയ് സേതുപതി. ലിസ്റ്റിലെ ഒൻപതാമത്തെ പേര് വിജയ് സേതുപതിയുടെയാണ്. തമിഴ് സിനിമയിലെ ഏറ്റവും വെര്‍സറ്റെെല്‍ ആയ നടന്‍ എന്ന് നിസ്സംശയം പറയാവുന്ന താരമാണ് വിജയ് സേതുപതി.

അതുകൊണ്ട് തന്നെയാണ് താരത്തിന് മക്കൾ സെൽവൻ എന്ന പേരും ലഭിച്ചത്. നായകന് പിന്നില്‍ അണിനിരക്കുന്ന പേരില്ലാത്ത സംഘത്തില്‍ നിന്നും സഹനടനായും വില്ലനായും നായകനായും വളര്‍ന്ന് ഇന്ന് തമിഴ് സിനിമയുടെ മുഖമായി മാറിയിരിക്കുകയാണ് താരം.

10.കാർത്തി

ലിസ്റ്റിൽ പത്താമൻ നടൻ കാര്‍ത്തിയാണ്. സൂര്യയുടെ അനുജൻ എന്നോ ശിവകുമാറിന്റെ മകനെന്നോ ഇൻഡസ്ട്രിയിൽ അറിയപ്പെടാതെ സ്വന്തമായി ഒരു പാത വെട്ടി തെളിച്ച താരമാണ് കാർത്തി.

ഏതു റോളും അനായാസം കൈകാര്യം ചെയ്യാനുള്ള കഴിവ് താരത്തിനുണ്ട്. പരുത്തി വീരൻ എന്ന താരത്തിന്റെ ആദ്യ ചിത്രം തന്നെ കാർത്തിയിലെ കലാവൈഭവം പ്രേക്ഷകർക്ക് മലാസിലാക്കികൊടുക്കുന്ന ഒന്നായിരുന്നു.

ഏറ്റവും ഒടുവിൽ ഇറങ്ങിയ മാണിരത്നം ചിത്രം പൊന്നിയിൻ സെൽവത്തിൽ വമ്പൻ താരനിര ഉണ്ടെങ്കിലും തിളങ്ങി നിന്നത് കാർത്തിയാണ്.