ബോൾഡായ കഥാപാത്രങ്ങളിലൂടെയും ശക്തമായ നിലപാടുകൾ കൊണ്ടും എപ്പോഴും വാർത്തകളിൽ നിറഞ്ഞു നിൽക്കുന്ന താരമാണ് വിദ്യ ബാലൻ. പലപ്പോഴും സമകാലിക വിഷയങ്ങളിലുള്ള തന്റെ അഭിപ്രായങ്ങൾ വിദ്യ തുറന്നു പറയാറുണ്ട്. ഇതിൽ ചിലതൊക്കെ വിവാദമായിട്ടും ഉണ്ട്.

സ്ത്രീകളേയും കുട്ടികളേയും സംബന്ധിക്കുന്ന വിവരങ്ങളും വിദ്യ സംസാരിക്കാറുണ്ട്. അടുത്തിടെ നടന്ന ഒരഭിമുഖത്തിൽ കരിയറിന്റെ തുടക്കകാലത്ത് ഒരു സംവിധായകനിൽ നിന്ന് നേരിട്ട മോശം അനുഭവത്തെ കുറിച്ച് തുറന്നു പറഞ്ഞിരിക്കുകയാണ് താരം. ഹ്യൂമൻസ് ഓഫ് ബോംബെയ്ക്ക് നൽകിയ അഭിമുഖത്തിലായിരുന്നു വിദ്യയുടെ തുറന്നു പറച്ചിൽ.

ചെന്നൈയിൽ ഒരു പരസ്യചിത്രത്തിൽ അഭിനയിക്കാൻ പോയപ്പോഴായിരുന്നു ഇതെന്നും താരം പറയുന്നു. ജീവിതത്തിൽ എപ്പോഴെങ്കിലും കാസ്റ്റിങ് കൗച്ച് നേരിട്ടുണ്ടോ എന്നായിരുന്നു ചോദ്യം. യഥാർഥത്തിൽ കാസ്റ്റിങ് കൗച്ച് എനിക്ക് നേരിടേണ്ടി വന്നിട്ടില്ല. അതിൽ ഞാൻ വളരെയധികം ഭാഗ്യം ചെയ്തയാളാണ്.

പലപ്പോഴും കാസ്റ്റിങ് കൗച്ചിങ്ങിനെ കുറിച്ചുള്ള പേടിപ്പെടുത്തുന്ന കഥകൾ ഞാൻ പലരിൽ നിന്നായി കേട്ടിട്ടുണ്ടായിരുന്നു അതുതന്നെയായിരുന്നു എന്റെ അച്ഛന്റെയും അമ്മയുടേയും ഭയവും. അതുകൊണ്ട് തന്നെ ഞാൻ സിനിമയിലേക്ക് വരുന്നതിനേക്കുറിച്ച് അവർക്ക് നല്ല ആശങ്കയുമുണ്ടായിരുന്നു. എന്നാലും ഒരു സംഭവം എനിക്ക് ഓർമ്മയുണ്ട്.

ചെന്നൈയിൽ ഒരു പരസ്യ ചിത്രത്തിൽ അഭിനയിക്കാനായി പോയതായിരുന്നു ഞാൻ. അതിനിടെ ഞാൻ ചെയ്യാമെന്ന് ഉറപ്പ് നൽകിയ ഒരു ചിത്രത്തിന്റെ സംവിധായകനെ കാണാനിടയായി.

സിനിമയെ കുറിച്ച് സംസാരിക്കുന്നതിനായി ഒരു കോഫി ഷോപ്പിൽ വച്ച് ഞങ്ങൾ തമ്മിൽ കണ്ടു. നമ്മുക്ക് മുറിയിൽ പോയി സംസാരിക്കാമെന്ന് അദ്ദേഹം പറഞ്ഞു. എന്താണ് കാര്യമെന്ന് എനിക്ക് മനസിലായില്ല. കാരണം ഞാൻ തനിച്ചായിരുന്നു.

പക്ഷേ ഞാൻ വളരെ ബുദ്ധിപരമായ ഒരു കാര്യം ചെയ്തു. മുറിയിലെത്തിയപ്പോൾ ഞാൻ എല്ലാ വാതിലുകളും തുറന്നിട്ടു. അതോടെ തനിക്ക് പുറത്തേക്കുള്ള വഴിയാണ് അതെന്ന് അയാൾക്ക് മനസിലായി. എനിക്ക് ആരും ഒരു നിർദ്ദേശവും നൽകിയിട്ടില്ല.

എന്നാൽ ആ സമയത്ത് ഞാനെടുത്ത തീരുമാനമായിരുന്നു അത്. അപ്പോൾ തന്നെ ഞാൻ അതിനോട് പ്രതികരിക്കുകയും ചെയ്തു. സ്വയം സംരക്ഷണമെന്നോ ഒരു സ്ത്രീയുടെ സഹജാവബോധമെന്നോ വിളിക്കാം.

പിന്നീട് താൻ ആ സിനിമയിൽ നിന്ന് പുറത്താക്കപ്പെട്ടുവെന്നും വിദ്യ കൂട്ടിച്ചേർത്തു. ഷെഫാലി ഷായ്ക്കൊപ്പം ജൽസ എന്ന ചിത്രത്തിലാണ് വിദ്യ ഒടുവിൽ അഭിനയിച്ചത്. നീയത്ത്, ലവേഴ്സ് എന്നിവയാണ് വിദ്യയുടേതായി ഇനി വരാൻ പോകുന്ന പ്രൊജക്ടുകൾ.