ലോകസിനിമയില്‍ മലയാളത്തെ അടയാളപ്പെടുത്തിയ വിഖ്യാത ചലച്ചിത്രകാരന്‍ അടൂര്‍ഗോപാലകൃഷ്ണന്‍ 80ന്റെ നിറവില്‍. സ്വയംവരം മുതല്‍ പിന്നെയും വരെയുള്ള അദ്ദേഹത്തിന്റെസിനിമകളാണ് മലയാള സിനിമയ്ക്ക് പുതുപാത സമ്മാനിച്ചത്. മലയാള സിനിമയുടെ ശൈശവവും ബാല്യവും അടൂരിന്റെ ബാല്യ കാലവും ഏറെക്കുറേ കടന്നുപോയത് ഒരേ കാലയളവിലാണെന്ന് വിശേഷിപ്പിക്കാം. മലയാള സിനിമയുടെ ചരിത്രഘട്ടങ്ങള്‍ക്ക് സാക്ഷിയാകാനും അടൂരിന് സാധിച്ചു.നാടകത്തെ ഭ്രാന്തമായി സ്നേഹിക്കുകയും ഒടുവില്‍ ചലച്ചിത്ര കലയില്‍ തന്റെ മുദ്ര പതിപ്പിക്കുകയും ചെയ്ത അടൂരിന്റെ സൃഷ്ടികള്‍ കേരള സമൂഹത്തിന്റെ പരിണാമഘട്ടങ്ങളുടെ അടയാളപ്പെടുത്തല്‍ കൂടിയാണ്.

സിനിമ എടുക്കാന്‍ പഠിക്കണം എന്നതിനോടൊപ്പം സിനിമ കാണാനും പഠിക്കണമെന്ന് മലയാളിയെ ബോധ്യപ്പെടുത്തിയ ചലച്ചിത്രകാരന്‍ കൂടിയാണ് അടൂര്‍. പത്തനംതിട്ട ജില്ലയിലെ അടൂരില്‍ 1941 ജൂലായ് 3നാണ് ജനനം. നാടകത്തിനോടുള്ള ഇഷ്ടം കാരണമാണ് അടൂര്‍ 1962ല്‍ പൂനെ ഫിലിം ഇന്‍സ്റ്റിറ്റ്യൂട്ടില്‍ സംവിധാനം പഠിക്കാന്‍ പോകുന്നത്. ചലച്ചിത്ര സംവിധാനം പഠിക്കുന്നത് നാടകത്തിന് ഗുണം ചെയ്യുമെന്നായിരുന്നു അദ്ദേഹത്തിന്റെ വിശ്വാസം. എന്നാല്‍ അവിടെ വെച്ച് അടൂര്‍ ചലച്ചിത്രം എന്ന മാധ്യമത്തിന്റെ
കഴിവുകള്‍ കണ്ടെത്തുകയായിരുന്നു. തിരക്കഥാരചനയിലും സംവിധാനത്തിലും ഡിപ്ലോമയുമായി 1965ല്‍ പൂനെ ഫിലിം ഇന്‍സ്റ്റിറ്റ്യൂട്ടില്‍ ഒന്നാം റാങ്കോടെ ചലച്ചിത്രപഠനം പൂര്‍ത്തിയാക്കി. അതേ വര്‍ഷം തന്നെ കുളത്തൂര്‍ ഭാസ്‌കരന്‍നായരുടെ പങ്കാളിത്തത്തോടെ കേരളത്തിലെ ആദ്യത്തെ ഫിലിം സൊസൈറ്റിയായ തിരുവനന്തപുരത്തെ ചിത്രലേഖ ഫിലിം സൊസൈറ്റിയും സ്വതന്ത്രമായി സിനിമകളുടെ നിര്‍മ്മാണവും വിതരണവും പ്രദര്‍ശനവും നിര്‍വഹിക്കാനായി ചിത്രലേഖ ഫിലിം കോപ്പറേറ്റീവും സ്ഥാപിച്ചു. മലയാള സിനിമയുടെ വളര്‍ച്ചയ്ക്ക് അതൊരു തുടക്കമായിരുന്നു. അരവിന്ദന്‍, പി.എ.ബക്കര്‍, കെ.ജി.ജോര്‍ജ്ജ്, പവിത്രന്‍,രവീന്ദ്രന്‍ തുടങ്ങി ഒട്ടനവധി സംവിധായകര്‍ക്ക് പ്രചോദനമാകാന്‍ ചിത്രലേഖയ്ക്ക കഴിഞ്ഞു.

അടൂരിന്റെ സ്വയംവരം എന്ന ആദ്യ ചലച്ചിത്രം മലയാളത്തിലെ നവതരംഗസിനിമയ്ക്ക് തുടക്കം കുറിച്ച രചനയാണ്.സ്വയംവരത്തിന് മുന്‍പ് വരെ സിനിമകള്‍ എത്രതന്നെ ഉദാത്തമായിരുന്നെങ്കിലും അവ വാണിജ്യതാല്‍പര്യങ്ങള്‍ക്ക് വലിയ പ്രാധാന്യം നല്‍കിയിരുന്നു. ഗാന നൃത്ത രംഗങ്ങളില്ലാത്ത സിനിമകള്‍ ചിന്തിക്കാന്‍ പോലുമാവാത്ത കാലഘട്ടത്തിലാണ് സ്വയംവരത്തിന്റെ രംഗപ്രവേശം. ജനകീയ സിനിമകളുടെ നേരെ മുഖം തിരിച്ച സ്വയംവരത്തെ അമ്പരപ്പോടെയാണ് ചലച്ചിത്ര ലോകം സ്വീകരിച്ചത്.മാത്രമല്ല ശബ്ദം എന്നാല്‍ ഇടതടവില്ലാത്ത സംഭാഷണവും കാതടപ്പിക്കുന്ന പിന്നണി സംഗീതവും മാത്രമല്ലെന്നും ദൃശ്യത്തോളം തന്നെ ആശയവിനിമയ സാധ്യത ശബ്ദത്തിനുമുണ്ടെന്ന് ഓരോ നേര്‍ത്ത ശബ്ദം കൊണ്ടും അടൂര്‍ തെളിയിച്ചു. കാച്ചിക്കുറുക്കിയെഴുതിയ തിരക്കഥ പൂര്‍ണ്ണമായ ഒരു ദൃശ്യാനുഭവമാക്കി മാറ്റുന്നത് ഈ ശബ്ദസന്നിവേശത്തിലൂടെയാണ്. ലൊക്കേഷനിലെ സംഭാഷണമടക്കമുള്ള ശബ്ദങ്ങളെ സിങ്ക് സൗണ്ടിലൂടെ ദൃശ്യത്തിലേക്ക് ചേര്‍ക്കുന്ന ഈ പുതു തലമുറക്കാലത്തു നിന്നു വേണം അന്നത്തെ അടൂരിലേയ്ക്ക് നോക്കാന്‍. കടലിരമ്പവും കാറ്റും പോലുള്ള പ്രകൃതിയുടെ ശബ്ദങ്ങളത്രയും അതും ഓരോരോ കാലാവസ്ഥാഭേദങ്ങളുടെ അടിസ്ഥാനത്തില്‍ തന്നെ കൃത്യമായി റെക്കോര്‍ഡ് ചെയ്ത് ഉള്‍പ്പെടുത്താനും അദ്ദേഹത്തിനായി.

കൊടിയേറ്റം,എലിപ്പത്തായം, മുഖാമുഖം, അനന്തരം, മതിലുകള്‍, വിധേയന്‍, കഥാപുരുഷന്‍, നിഴല്‍ക്കുത്ത്, നാല് പെണ്ണുങ്ങള്‍,ഒരു പെണ്ണും രാണും തുടങ്ങി സിനിമകളിലൂടെ അടൂര്‍ എന്ന ചലച്ചിത്ര പ്രതിഭയെ മലയാളം അറിയുകയായിരുന്നു. 7 തവണ ലഭിച്ച ദേശീയ, സംസ്ഥാന പുരസ്‌കാരങ്ങള്‍ അദ്ദേഹത്തിനുള്ളിലെ സിനിമാസ്വാദകനുള്ള അംഗീകാരം കൂടിയായി.