നർമത്തിന്റെ മധുരവും പ്രണയത്തിന്റെ കടുപ്പവും ചേർന്നൊരു കാപ്പച്ചീനോ.

ധർമജൻ, ഹരീഷ് കണാരൻ, വിനീത് മോഹൻ, സുനിൽ സുഗതൻ, മനോജ് ഗിന്നസ് തുടങ്ങിയ മലയാളത്തിലെ ഹാസ്യ നടന്മാരെ അണിനിരത്തി ഒരു മുഴുനീള നർമചിത്രം ഒരുക്കിയിരിക്കുകയാണ് പാനിംഗ് ക്യാം ഫിലിംസിന്റെ ബാനറിൽനവാഗത സംവിധായകനായ നൗഷാദ്. യുവ പ്രേക്ഷകർക്കും കുടുംബ പ്രേക്ഷകര്ക്കും ഒരു പോലെ ആസ്വദിക്കാൻ കഴിയുന്ന ഒരു മികച്ച റൊമാന്റിക്ക് കോമഡി എന്റർറെയിനർ ആണ് കാപ്പച്ചീനോ.

ഒരു പരസ്യനിർമാണ കമ്പനിയുടെ പശ്ചാത്തലത്തിൽ പുരോഗമിക്കുന്ന കഥയിൽ കമ്പനിക്കകത്തെ പ്രവർത്തനങ്ങളും അവരുടെ നിത്യജീവിതത്തിൽ സംഭവിക്കുന്ന അമളികളും അബദ്ധങ്ങളും രസകരമായി ചിത്രീകരിച്ചിട്ടുണ്ട്. തുടർന്ന് ആഡ് ഫിലിം മേക്കറായ ജീവനെ (അനീഷ് ജി മേനോൻ) കളിപ്പിക്കാനുള്ള ഫാഷൻ ഡിസൈനറായ സ്നേഹയുടെ (അനിത) പദ്ധതികൾ പാളുകയും കളി കാര്യമാകുകയും ചെയ്യുന്നു. സ്നേഹയുടെയും ജീവന്റെയും പ്രണയം ജാനകിയുടെയും (നടാഷ) അൻവറിന്റേയും (അൻവർ ശരീഫ് ) ജീവിതത്തെ താറുമാറാക്കുന്നു. ബന്ധങ്ങളുടെ കരുത്ത് വിശ്വാസത്തിലാണെന്നതിന്റെ ആഴം കാപ്പച്ചീനോയുടെ രുചിയിലൂടെ നമുക്ക് പകർന്നു തരുന്നു. ഫ്രീക്കൻ പയ്യന്മാരെ കഥാപാത്രങ്ങളാക്കി മലയാള സിനിമയിലെ ക്ളീഷേകളെ തരണം ചെയ്യാൻ സംവിധായകന് സാധിച്ചു എന്നത് ശ്രദ്ധേയമാണ്.

സംഗീതത്തിന് ഏറെ പ്രാധാന്യമുള്ള ചിത്രത്തിൽ ഗാനങ്ങൾ രൂപപ്പെടുത്തിയിരിക്കുന്നത് ഹിശാം അബ്ദുൽ വഹാബ് ആണ്. റഫീഖ് അഹ്മദ്, വേണു വി ദേശം, ഹസീന കാനം എന്നിവർ രചന നിർവഹിച്ച ഗാനങ്ങൾ ആലപിച്ചിരിക്കുന്നത് ജയചന്ദ്രൻ. വിനീത് ശ്രീനിവാസൻ, ഷഹബാസ് അമൻ, മഞ്ജരി, നിവാസ് എന്നിവരാണ്.

നവാഗത സംവിധാനത്തിന്റെ അല്പസ്വല്പ പോരായ്മാകൾ ഉണ്ടെങ്കിലും സമീപകാലത്തിറങ്ങിയ ഒരു ഫീൽ ഗുഡ് മൂവിയാണ് കാപ്പച്ചീനോ. മികച്ച കലാസംവിധാനവും (അരുൺ പി അർജുൻ) ഛായാഗ്രഹണവും (നൂറുദ്ധീൻ ബാവ) ഫ്രെയിമുകൾ നിറം നിറഞ്ഞതാക്കുന്ന സിനിമ നിർമിച്ചിരിക്കുന്നത് ഡോ. സ്‌കോട്ടാണ്.