നടനെന്ന നിലയില്‍ യുവതാരങ്ങള്‍ക്കിടയില്‍ ശ്രദ്ധേയനായ ധ്യാന്‍ ശ്രീനിവാസന്റെ ആദ്യ തിരക്കഥ പ്രേക്ഷകരെ നിരാശരാക്കില്ല. അനൂപ് ജോസഫിന്റെ കഥ അതിന്റെ ഏറ്റവും രസകരമായ അവസ്ഥയിലെത്തിക്കുന്നു ധ്യാന്‍.

ഹാസ്യ പ്രാധാനമായ ചെറു സിനിമകളൊരുക്കുന്നതില്‍ താന്‍ ഒട്ടും പിന്നിലല്ലെന്ന് മുന്‍ ചിത്രങ്ങളിലൂടെ തെളിയിച്ച സംവിധായകനാണ് തോമസ് സെബാസ്റ്റിയന്‍. തന്റെ മൂന്നാം ചിത്രത്തിലും അദ്ദേഹമത് തെറ്റിച്ചില്ല.

തൊഴില്‍ രഹിതരായ വരുണ്‍, അജാസ്, പ്രകാശന്‍, ജംഷീര്‍ എന്നീ യുവാക്കള്‍ പണത്തിനു വേണ്ടി ചെയ്യുന്ന കാര്യങ്ങള്‍ അവരെ ചില പ്രശ്‌നങ്ങളില്‍ കൊണ്ടുചെന്നെത്തിക്കുന്നതും അതില്‍ നിന്നും പുറത്തു കടക്കുവാനുള്ള സംഘത്തിന്റെ ശ്രമങ്ങളുമാണ് സിനിമയുടെ കഥാഗതിയില്‍ നിര്‍ണ്ണായകമാകുന്നത്. ധ്യാന്‍ ശ്രീനിവാസന്‍, അജു വര്‍ഗീസ്, ശ്രീനാഥ് ഭാസി, ഹരീഷ് കണാരന്‍, നിരഞ്ജന അനൂപ്, മംമ്ത മോഹന്‍ദാസ് എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.

ഇതില്‍ അജു വര്‍ഗീസ് ഹരീഷ് കണാരന്‍ ശ്രീനാഥ് ഭാസി എന്നിവരുടെ പ്രകടനം തിയേറ്ററില്‍ ചിരി പടര്‍ത്തുന്നു. നായികയായ നിരഞ്ജനയും അതിഥി വേഷത്തിലെത്തിയ മംമ്തയും തങ്ങളുടെ ഭാഗം ഭംഗിയാക്കിയപ്പോള്‍ നായകനായ ധ്യാന്‍ ശ്രീനിവാസന്‍ സ്വന്തം കഥാപാത്രത്തെ മനോഹരമാക്കി. ഭഗത് മാനുവല്‍ , വിഷ്ണു ഗോവിന്ദന്‍, അലെന്‍സിയര്‍ എന്നിവരും താരനിരയിലുണ്ട്.

ഒരേ സമയം ഒരു ത്രില്ലറിന്റെയും കോമഡി ഡ്രാമയുടെയും സ്വഭാവം പ്രകടിപ്പിക്കാന്‍ ഗൂഢാലോചനയ്ക്കായി. എന്നാലപ്പോഴും കഥാപാത്രങ്ങളെ സ്വതന്ത്ര വ്യക്തിത്വമുള്ളവരാക്കാന്‍ സംവിധായകന്‍ ശ്രദ്ധിച്ചു.

എഡിറ്റിംഗ്, സംഗീതം, ഛായാഗ്രഹണം എന്നിവ ചിത്രത്തെ കൂടുതല ആസ്വാധ്യകരമാക്കുന്നു.

ചുരുക്കത്തില്‍ തീര്‍ച്ചയായും കാണാവുന്ന ഒരു മനോഹര ചിത്രം തന്നെ ഗൂഢാലോചന.