എവിടെയാണോ നമ്മൾ തോറ്റുപോകുന്നത് അവിടെ നിന്ന് വേണം നമ്മൾ ജീവിതം തുടങ്ങാൻ...അതെ നമിത പ്രമോദ് പ്രധാന വേഷത്തിൽ എത്തിയ അൽ മല്ലു ഒരു സർവൈവർ കഥയാണ്. വ്യക്തമായ രാഷ്ട്രീയം പറഞ്ഞ കഥയുമായി ബോബന്‍ സാമുവല്‍ എത്തിയപ്പോൾ തിയേറ്ററുകളിൽ നിറഞ്ഞ കൈയ്യടിയായിരുന്നു.ഇത് ശക്തമായ പീനിന്റെ കഥയാണ്, പോരാടി വിജയിച്ച യഥാർത്ഥ പെണ്ണിന്റെ കഥയാണ്. ഈ ചിത്രം ശക്തമായ ഒരു സ്ത്രീപക്ഷ സിനിമയാണ്. സിനിമയിൽ സ്ത്രീ കഥാപാത്രങ്ങൾക്ക് പ്രാധാന്യം കുറഞ്ഞു വരുന്ന ഇക്കാലത്ത് നായികാ പ്രാധാന്യത്തോടെ, അതും ഗൾഫ് പശ്ചാത്തലത്തിൽ ഒരുക്കുന്ന ചിത്രമെന്ന നിലയിൽ അൽമല്ലുവിന് ഏറെ പ്രാധാന്യമുണ്ട്.

നാട്ടിലെ ഒരു ഇടത്തരം തറവാട്ടിലെ അംഗമായ നയന ,പെൺകുട്ടി അബുദാബിയിലെ ഒരു ഐ.ടി.കമ്പനിയിൽ ജോലിക്കെത്തുന്നു. അവിടെ വച്ച് ഐ.ടി.രംഗത്തെ പ്രധാനിയായ ടോം എന്ന യുവാവുമായി പ്രണയത്തിലായി. ഈ പ്രണയം ഗൗരവമാകുന്ന ഘട്ടത്തിൽ ചിത്രത്തിന് പുതിയ വഴിത്തിരിവ് സംഭവിക്കുന്നു.. എല്ലാം നഷ്ടപ്പെട്ടെന്നു കരുതിയ ഘട്ടത്തിൽ ഇച്ഛാശക്തിയുടെയും മനോബലത്തിന്റെയും പിൻബലത്തിൽ ജീവിതം
തിരിച്ചുപിടിക്കാൻ ശ്രമിച്ച ആ പെൺകുട്ടി ഇന്നത്തെ ഒരുപാട് പെൺകുട്ടികൾക്ക് മാതൃകയാണ്. സ്നേഹ ബന്ധങ്ങളുടെ കഥ പറയുന്ന ഈ ചിത്രം ഇന്നത്തെ സമൂഹം കാണേണ്ടതാണ് . തോറ്റുകൊടുക്കാതെ പോരാടി ജയിക്കാൻ നമ്മൾ മനസുകൊണ്ട് വിചാരിച്ചാൽ അത് നടക്കുമെന്നുള്ളതിനുള്ള തെളിവാണ് അൽ മല്ലു. എങ്ങനെയായിരിക്കണം യഥാർത്ഥ പെണ്ണെന്ന് ചിത്രത്തിൽ പറയുന്നുണ്ട്.

ശ്രീയായി എത്തിയ ഫാരിസ് മജീദ് തന്റെ കഥാപാത്രത്തെ ഗംഭീരമാക്കി . ജനപ്രിയന്‍, റോമന്‍സ്, ഹാപ്പി ജേര്‍ണി, ഷാജഹാനും പരീക്കുട്ടിയും, വികടകുമാരന്‍ എന്നീ ചിത്രങ്ങള്‍ക്ക് ശേഷം ബോബന്‍ സാമുവല്‍ സംവിധാനം ചെയ്യുന്ന ചിത്രമാണ് അല്‍ മല്ലു. ദുബായ്, അബുദാബി എന്നിവിടങ്ങളിലായാണ് ചിത്രത്തിന്‍റെ ചിത്രീകരണം നടന്നതെന്നതും ശ്രദ്ധേയമാണ്. മികച്ചൊരു താരനിര തന്നെ ചിത്രത്തില്‍ സഹതാരങ്ങളായി എത്തുന്നുണ്ടെന്നും അല്‍ മല്ലുവിന്‍റെ സവിശേഷതയാണ്.മാര്‍ഗ്ഗംകളി എന്ന ചിത്രത്തിന് ശേഷം നമിത അഭിനയിക്കുന്ന ചിത്രമാണ് അല്‍ മല്ലു.

മിയ, സിദ്ദീഖ്, മിഥുന്‍ രമേശ്, ധര്‍മ്മജന്‍ ബോള്‍ഗാട്ടി, മാധുരി, ഷീലു എബ്രഹാം, സിനില്‍ സെെനുദ്ദീന്‍, വരദ, ജെന്നിര്‍ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. വിവേക് മേനോനാണ് ചിത്രത്തിന്‍റെ ഛായാഗ്രാഹകന്‍. ബി.കെ ഹരിനാരായണനാണ് പാട്ടുകള്‍ എഴുതിയിരിക്കുന്നത്. രഞ്ജിന്‍ രാജനാണ് സംഗീതം ഒരുക്കിയിരിക്കുന്നത്. ജയന്‍ നടുവത്താഴത്തും ഡോക്ടര്‍ രജത് ആറും എഴുതിയ കഥയ്ക്ക് സംവിധായകന്‍ ബോബന്‍ സാമുവല്‍ തന്നെ തിരക്കഥയൊരുക്കുകയായിരുന്നു.