പ്രേക്ഷകരെ ആകാംഷയുടെ മുൾമുനയിലെത്തിച്ച് അഞ്ചാം പാതിരാ. കുഞ്ചാക്കോ ബോബനെ നായകനാക്കി മിഥുൻ മാനുവൽ തോമസ് തിരക്കഥ എഴുതി സംവിധാനം ചെയ്ത "അഞ്ചാം പാതിരാ പ്രേക്ഷകർ ഏറ്റെടുത്ത് കഴിഞ്ഞു. മലയാള സിനിമ ആസ്വാദകരിൽ നിന്നും മികച്ച പ്രതികരണമാണ് ചിത്രത്തിന് ലഭിക്കുന്നത്. ഒറ്റവാക്കിൽ പറഞ്ഞാൽ മലയാള സിനിമയിലെ ലക്ഷണമൊത്തൊരു ത്രില്ലർ സിനിമ അതാണ് അഞ്ചാം പാതിരാ.ഒരു നിമിഷം പോലും പ്രേക്ഷകനെ ബോറടിപ്പിക്കാതെ ആദ്യം മുതൽ അവസാനം വരെ കഥ പറയുന്നതിൽ സംവിധായകൻ മിഥുൻ മാനുവൽ നൂറ് ശതമാനം വിജയിച്ചുവെന്ന് നിസംശയം പറയാം. ഒരു ഡാര്‍ക്ക് സൈക്കോളജിക്കല്‍ ത്രില്ലര്‍ എന്ന ഗണത്തിൽപ്പെടുത്താവുന്നൊരു ചിത്രമാണ് അഞ്ചാം പാതിരാ.

അഞ്ചാം പാതിരാ കുഞ്ചാക്കോ ബോബന്റെ കരിയറിലെ ഏറ്റവും മികച്ച ചിത്രങ്ങളിലൊന്നാണെന്ന് നിസംശയം പറയാനാകും. ചിത്രത്തിൽ വെറും രണ്ട് സീനിൽ മാത്രമാണ് ഇന്ദ്രൻസിന്റെ സാന്നിധ്യമുള്ളതെങ്കിലും, അദ്ദേഹത്തിന്റെ അഭിനയപാഠവം പ്രേക്ഷകരെ ഞരടിച്ചുകളഞ്ഞു. ശ്രീനാഥ് ഭാസിയുടെ പ്രകടനവും എടുത്തു പറയേണ്ടതാണ്. പോലീസ് കൺസൾട്ടിങ് ക്രിമിനോളജിസ്റ് ആയ അൻവർ ഹുസൈൻ എന്ന കഥാപാത്രത്തേയും ആ കഥാപാത്രം നടത്തുന്ന ഒരു ഇൻവെസ്റ്റിഗേഷനെയും ചുറ്റിപ്പറ്റിയാണ് ഈ ചിത്രത്തിന്റെ കഥ മുന്നോട്ടുപോകുന്നത്.

ചിത്രത്തിലെ ഓരോ താരങ്ങളും അവർക്ക് ലഭിച്ച കഥാപാത്രങ്ങൾ അതിന്റെ തന്മയത്വം ചോർന്നുപോകാതെ വളരെ മനോഹരമായാണ് ബിഗ് സ്‌ക്രീനിൽ അവതരിപ്പിച്ചിട്ടുള്ളത്. ചിത്രത്തിൽ എടുത്തുപറയേണ്ട മറ്റൊരു കാര്യം ക്യാമറ വാർക്കാണ്. ഷൈജു ഖാലിദ് ആണ് ക്യാമറയ്ക്ക് പിന്നിൽ. ചിത്രത്തിന്റെ ഫീൽ ഒരു ഘട്ടത്തിലും നഷ്ടപ്പെടുത്താതെ അതിമനോഹരമായാണ് ഓരോ സീനുകളും ഒപ്പിയെടുത്തിരിക്കുന്നത്. തീയറ്ററിലിരിക്കുന്ന പ്രേക്ഷകനെ ഒരു നിമിഷം പോലും മറ്റ് കാര്യങ്ങൾ ചിന്തിക്കുവാൻ അനുവദിക്കാതെ കഥയ്‌ക്കൊപ്പം കൂട്ടിക്കൊണ്ടുപോകുകയാണ് ചിത്രം.

ആഷിഖ്‌ ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ്‌ ഉസ്മാൻ ആണ് അഞ്ചാം പാതിരാ നിർമ്മിച്ചിരിക്കുന്നത്. ചിത്രത്തിന്റെ ട്രെയ്‌ലർ കണ്ട ഏതൊരു പ്രേക്ഷകനും വളരെ പ്രതീക്ഷയോടെയാണ് തീയറ്ററിലെത്തിയത്. പ്രേക്ഷകർ ആഗ്രഹിച്ച, ഒരു പക്ഷെ അതിനേക്കാൾ വലിയയൊരു അനുഭവമാണ് അഞ്ചാം പാതിരാ സിനിമ ആസ്വാദകർക്ക് സമ്മാനിക്കുന്നത്. സുഷിൻ ശ്യാം നിർവഹിച്ച സംഗീതം ഒരു ത്രില്ലർ ചിത്രത്തിൽ എത്ര പ്രാധാന്യം ഉണ്ടോ ആ പ്രാധാന്യം എടുത്തു കാട്ടുന്ന രീതിയിൽ ഉള്ളതാണ്. ത്രില്ലർ, ക്രൈം ത്രില്ലർ ശ്രേണിയിൽ പുറത്തിറങ്ങിയ ദൃശ്യം, മെമ്മറീസ്, രാക്ഷസൻ (തമിഴ്) തുടങ്ങിയ ചിത്രങ്ങൾ പ്രേക്ഷകർ ഇരുകൈകളും നീട്ടിയാണ് സ്വീകരിച്ചത്. ഈ ചിത്രങ്ങളെക്കാളും മുന്നിൽ നിൽക്കുന്ന ചിത്രമാണ് അഞ്ചാം പാതിരാ എന്ന് നിസംശയം പറയാം.