മമ്മൂട്ടിയുടെ ആരാധര്‍ക്ക് വേണ്ടിയാണ് മാസ്റ്റര്‍ പീസ്. താരത്തിന്റെ മാസ് അവതാരം പ്രേക്ഷകരെ രസിപ്പിക്കുന്നു. കാംപസിന്റെ ആവേശവും രസങ്ങളും വേണ്ടും വിധം വിതറി ചിത്രത്തെ ആഘോഷ സമാനമായ ഒരനുഭവമാക്കി മാറ്റുവാന്‍ സംവിധായകന്‍ അജയ് വാസുദേവിനായി.

അടിസ്ഥാനപരമായി ഒരു ഇന്‍വസ്റ്റിഗേറ്റീവ് ത്രില്ലറാണ് "മാസ്റ്റർ പീസ്". അത്തരത്തില്‍ അവസാന രംഗം വരെ ആകാംഷ നിലനിര്‍ത്താനും ചിത്രാന്ത്യം യുക്തി ഭദ്രമാക്കാനും സാധിച്ചു.

ആവര്‍ത്തിക്കപ്പെടുന്ന പലതും കാംപസ് രംഗങ്ങളില്‍ മടുപ്പുളവാക്കുന്നു. മമ്മൂട്ടിയുടെ അവതരണ രംഗം വരെ ചിത്രം മന്ദഗതിയില്‍ സഞ്ചരിക്കുന്നു. നായകന്റെ വരവോടെ വേഗത കൈവരിക്കുന്ന ചിത്രം തുടര്‍ന്ന് അതില്‍ നിന്നും താഴേക്ക് പോകാതെ നിലനില്‍ക്കുന്നതില്‍ ഉദയകൃഷ്ണയുടെ തിരക്കഥ പ്രധാന പങ്കു വഹിക്കുന്നു.

ഗോകുല്‍ സുരേഷും ഉണ്ണി മുകുന്ദനും വരലക്ഷ്മി ശരത് കുമാറും മുകേഷും പൂനം ബജ്‌വയും തുടങ്ങി വന്‍ താര നിരയുണ്ടെങ്കിലും ഒരു തരത്തില്‍ മമ്മൂട്ടിയെന്ന താരത്തെ കേന്ദ്രീകരിച്ചാണ് സിനിമയുടെ സഞ്ചാരം. അത് കഥയുടെ ഘടനയില്‍ മുഴച്ച് നില്‍ക്കുന്നില്ല എന്നതും ശ്രദ്ധേയം.

ക്യാമറയും പശ്ചാത്തല സംഗീതവും നന്നായി. ഗാനങ്ങളും മോശമല്ല. ഉണ്ണി മുകുന്ദന്റെ പ്രകടനം ശ്രദ്ധേയം. കലാഭവന്‍ ഷാജോണും തന്റെ കഥാപാത്രത്തെ മനോഹരമാക്കി.

പുതുമയുള്ള കഥയോ കഥാപാത്രങ്ങളോ മാസ്റ്റര്‍ പീസിലില്ല. എന്നാല്‍ സിനിമ ലക്ഷ്യമാക്കുന്ന പ്രേക്ഷകരെ തൃപ്തിപ്പെടുത്തുവാന്‍ തക്ക ചേരുവകള്‍ എമ്പാടുമുണ്ട്.

സംഘട്ടന രംഗങ്ങളിലെ മിഴിവും സമ്പന്നയതും മമ്മൂട്ടി ആരാധകര്‍ക്ക് കൈയ്യടിക്കുവാന്‍ വക നല്‍കുന്നു. ചുരുക്കത്തില്‍ ആകെ മൊത്തം മമ്മൂട്ടി നിറഞ്ഞു കവിയുന്ന പക്കാ മാസ് മസാല എന്റര്‍ടൈനറാണ് മാസ്റ്റര്‍ പീസ്.

ഉത്സവകാല ആഘോഷ ചിത്രമെന്ന നിലയില്‍ അമിത പ്രതീക്ഷകളില്ലാതെ കാണുവാനാണെങ്കില്‍ ധൈര്യമായി ടിക്കറ്റെടുക്കാം.