റാന്നിയിലെ സാധാരണക്കാരായ ചേച്ചിയുടെയും അനിയന്റെയും ആത്മബന്ധത്തിന്റെ കഥയാണ് സാജന്‍ ബേക്കറി സിന്‍സ് 1962. ചെറിയ പിണക്കങ്ങളിലൂടെയും ഇണക്കങ്ങളിലൂടെയും പതിയെ മനസ്സിലേക്ക് കടന്നുകയറി, രണ്ട് മണിക്കൂര്‍ നേരം തങ്ങളുടേത് മാത്രമായൊരു ലോകത്ത് പ്രേക്ഷകരെയും പിടിച്ചിരുത്തുന്നുണ്ട് ചിത്രം. ബെറ്റ്‌സിയുടെയും ബോബിന്റെയും ലോകത്തിലൂടെ പോയ കാലത്തെ വീണ്ടും ഓര്‍മപ്പെടുത്താനും, ആ കാലത്തിന്റെ മധുരം പ്രേക്ഷകര്‍ക്ക് പകരാനും ചിത്രത്തിനാകുന്നുണ്ട്. അവരിലൂടെയാണ് സാജന്‍ ബേക്കറിയിലെ ഓരോ വിഭവങ്ങളും പ്രേക്ഷകര്‍ രുചിച്ചറിയുന്നത്. വലിയ ബഹളങ്ങളൊന്നുമില്ലാതെ, കാണുന്ന ഓരോരുത്തരുടയെും മനസ്സില്‍ പതിയുന്ന വിധത്തിലാണ് അരുണ്‍ ചന്തു സാജന്‍ ബേക്കറി ഒരുക്കിയിരിക്കുന്നത്.

മദ്യപാനം കാരണം കുടുംബം നശിച്ച സാജനിലൂടെ തുടങ്ങി, മക്കളായ ബെറ്റ്‌സിയിലേക്കും ബോബിനിലേക്കുമാണ് ചിത്രം കടന്നുചെല്ലുന്നത്. അപ്പന്റെയും അമ്മയുടെയും മരണ ശേഷം അമ്മാച്ചനാണ് ഇരുവര്‍ക്കും കൂട്ട്. എത്രയും വേഗം ഓസ്‌ട്രേലിയയിലേക്ക് മൈഗ്രേറ്റ് ചെയ്യുകയെന്ന ലക്ഷ്യത്തോടെയാണ് ബോബിന്റെ ഓരോ ദിവസവും തുടങ്ങുന്നത്. എന്നാല്‍, ചില കാരണങ്ങളാല്‍ ബോബിന് അത് സാധിക്കുന്നുമില്ല. ഇതിനിടെയാണ് ബോബിന്റെ ജീവിതത്തിലേക്ക് മെറിന്‍ കടന്നുവരുന്നത്. തുടര്‍ന്ന് ഇവരുടെ ജീവിതത്തിലുണ്ടാകുന്ന സംഭവങ്ങളാണ് കഥയുടെ രസച്ചരട് തെല്ലും ചോരാതെ സാജന്‍ ബേക്കറിയിലൂടെ അവതരിപ്പിച്ചിരിക്കുന്നത്.

ബെറ്റ്‌സിയിലൂടെയും മെറിനിലൂടെയും വ്യക്തമായ ഒരു രാഷ്ട്രീയവും സാജന്‍ ബേക്കറി മുന്നോട്ടുവെക്കുന്നുണ്ട്. അനാവശ്യ കെയറിങ്ങിന്റെ പേരില്‍ സ്വന്തം സഹോദരിയോടോ, ഭാര്യയോടോ ഒക്കെ ചില പുരുഷന്മാരങ്കിലും കാട്ടിക്കൂട്ടുന്ന കോപ്രായങ്ങള്‍ തുറന്നുകാട്ടാനും ചിത്രത്തിനാകുന്നുണ്ട്. തനിച്ച് മാറ്റി നിര്‍ത്തി രണ്ട് മിനിറ്റ് സംസാരിച്ചാല്‍ തീരുന്ന പ്രശ്‌നങ്ങളെ പോലും ഊതി പെരുപ്പിച്ച് വലുതാക്കുന്ന ചിലരുടെയെങ്കിലും രീതിയെ ചോദ്യം ചെയ്യുന്നുമുണ്ട് ചിത്രം.

രണ്ട് കാലഘട്ടങ്ങളിലെ കഥാപാത്രങ്ങളെയാണ് അജു വര്‍ഗീസ് ചിത്രത്തില്‍ അവതരിപ്പിച്ചിരിക്കുന്നത്. തന്മയത്തത്തോടെയും ഒതുക്കത്തോടെയും രണ്ട് കഥാപാത്രങ്ങളെയും സ്‌ക്രീനിലെത്തിക്കാന്‍ അജുവിന് സാധിച്ചിട്ടുണ്ട്. അല്പമൊന്ന് പാളിയിരുന്നെങ്കില്‍ കയ്യില്‍ നിന്ന് പോകാമായിരുന്ന സാജനെയും കുറ്റമേതും പറയാനില്ലാത്ത വിധം കൃത്യമായി തന്നെ അജു സ്‌ക്രീനിലെത്തിച്ചു. ബെറ്റ്‌സിയായെത്തിയ ലെനയും തന്റെ പ്രകടനം ഗംഭീരമാക്കിയിട്ടുണ്ട്. ആദ്യ ചിത്രത്തിന്റെ പതര്‍ച്ചയൊന്നുമില്ലാതെ രഞ്ജിത മേനോനും മെറിനെ മനോഹരമാക്കിയിട്ടുണ്ട്. അമ്മാച്ചനായെത്തിയ ഗണേഷ് കുമാറിന്റെയും, ബെറ്റ്‌സിയുടെയും ബോബിന്റെയും അമ്മയായെത്തിയ ഗ്രേസ് ആന്റണിയുടെയും പ്രകടനവും എടുത്തുപറയേണ്ടതാണ്.

സംവിധായകനൊപ്പം സച്ചിന്‍ ആര്‍ ചന്ദ്രനും അജു വര്‍ഗീസും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. പ്രസക്തമായൊരു വിഷയം ആസ്വാദ്യകരമാകും വിധത്തില്‍ അവതരിപ്പിക്കുന്നതില്‍ ഇവര്‍ ഓരോരുത്തരും കാട്ടിയ മിടുക്ക് എടുത്തുപറയേണ്ടതാണ്. ഇതുവരെ ചെയ്തതില്‍ നിന്ന് വ്യത്യസ്തമായി സാജന്‍ ബേക്കറി പോലൊരു ചിത്രമൊരുക്കാന്‍ മുന്നോട്ടുവന്ന വിശാഖ് സുബ്രഹ്മണ്യവും ധ്യാന്‍ ശ്രീനിവാസനും തീര്‍ച്ചയായും അഭിനന്ദനമര്‍ഹിക്കുന്നുണ്ട്. തിയേറ്റര്‍ വിട്ടാലും ഉള്ളില്‍ നില്‍ക്കുന്ന തരത്തിലുള്ളൊരു ഫീല്‍ ഗുഡ് ചിത്രമൊരുക്കിയ ഈ കൂട്ടുക്കെട്ടില്‍ നിന്ന് ഇനിയും ഒരുപിടി നല്ല ചിത്രങ്ങള്‍ നമുക്ക് പ്രതീക്ഷിക്കാം. കോവിഡ് കാലത്തിന് ശേഷം കുടുംബ സദസ്സുകളെ തിരികെ തിയേറ്ററുകളിലേക്കെത്തിക്കാന്‍ സാജന്‍ ബേക്കറിക്ക് സാധിക്കട്ടെ..