ശശിധരനെ ചെന്നൊന്നു കാണണം, ഒരു പൂച്ചെണ്ടും കയ്യില്‍ വയ്ക്കണം; നടന്‍ വി കെ ശ്രീരാമന്റെ കുറിപ്പ്
Actor V K Sreeraman about Mammootty
മമ്മൂട്ടിയെ, മമ്മൂട്ടി എന്ന് ആദ്യമായി വിളിച്ച സഹപാഠിയെ കഴിഞ്ഞ ദിവസം മമ്മൂട്ടി പരിചയപ്പെടുത്തിയിരുന്നു. എടവനക്കാട് സ്വദേശിയായ ശശിധരനെ വേദിയിലേക്ക് ക്ഷണിക്കുകയും ചെയ്തു മമ്മൂട്ടി. ഈ വീഡിയോ വലിയ ചര്‍ച്ചയായി മാറിയിട്ടുണ്ട്.
30 വര്‍ഷം മുമ്പ്, മമ്മൂട്ടിയെ കുറിച്ച് ദൂരദര്‍ശന്‍ നക്ഷത്രങ്ങളുടെ രാജകുമാരന്‍ എന്ന പേരില്‍ ഒരു ഡോക്യുമെന്ററി പ്രക്ഷേപണം ചെയ്തിരുന്നു. നടനും എഴുത്തുകാരനുമായ വി കെ ശ്രീരാമനുമൊത്തുള്ള സംഭാഷണത്തിലൂടെയാണ് മമ്മൂട്ടിയുടെ ജീവിതം, അനുഭവങ്ങള്‍ ഡോക്യുമെന്ററിയില്‍ അനാവരണം ചെയ്യുന്നത്. ഈ ഡോക്യുമെന്ററിയിലാണ് ശശിധരന്‍ എന്ന സഹപാഠിയെ കുറിച്ച് മമ്മൂട്ടി ആദ്യമായി വെളിപ്പെടുത്തുന്നത്. അതിനെ കുറിച്ച് ശ്രീരാമന്‍ സോഷ്യല്‍ മീഡിയയില്‍ ഒരു കുറിപ്പ് പങ്കുവച്ചിരിക്കുന്നു.
വി കെ ശ്രീരാമന്റെ കുറിപ്പ്:
30 വര്‍ഷം മുമ്പ് ദൂരദര്‍ശന്‍ നിര്‍മ്മിച്ച 'നക്ഷത്രങ്ങളുടെ രാജകുമാരന്‍' എന്ന ഡോക്യുമെന്ററിയുടെ ഷൂട്ട് നടക്കുന്ന സമയത്ത് ഞാന്‍ ചോദിച്ചു. 'നാട്ടിലോ വീട്ടിലോ ആരും നിങ്ങളെ മമ്മൂട്ടി എന്നു വിളിക്കുന്നത് കേട്ടില്ല. മമ്മൂഞ്ഞ്, കുഞ്ഞ് എന്നൊക്കെയാണ് വിളിക്കുന്നത്. എന്താ അതങ്ങനെ?'
ആ ചോദ്യത്തിനു ഉത്തരമായി മഹാരാജാസില്‍ ചെന്നു ചേര്‍ന്ന കാലത്ത് പേരു ചോദിക്കുന്നവരോടെല്ലാം 'ഒമര്‍ ഷറീഫ് 'എന്നാണ് പേരെന്നു പറഞ്ഞിരുന്നതെന്നും ഒരു ദിവസം ഐഡന്റിറ്റി കാര്‍ഡ് നിലത്തു വീണപ്പോള്‍ അതെടുത്ത് നോക്കിയ ശശിധരന്‍ എന്ന ഒരു വിദ്യാര്‍ത്ഥി മറ്റുള്ളവര്‍ കേള്‍ക്കെ 'നിന്റെ യഥാര്‍ത്ഥ പേര് മുഹമ്മദു കുട്ടി എന്നാണല്ലേ? മമ്മൂട്ടി എന്നാണ് ശരിക്കുനിന്നെ വിളിക്കേണ്ടത്'
അതുകേട്ട് കൂടെ നിന്ന മറ്റു സുഹൃത്തുക്കള്‍ മമ്മൂട്ടി എന്ന് ഉച്ചത്തില്‍ വിളിച്ച് അത് ഉറപ്പിക്കുകയും ചെയ്തു. അന്നു മുതലാണ് മമ്മൂട്ടിയായത്. പിന്നെ ഞാനതങ്ങു സ്വീകരിച്ചു?'
എന്തായാലും എടവനക്കാട്ടുകാരനായ ശശിധരനെ ഇന്നലെയാണ് ചിത്രത്തില്‍ കണ്ടത്. ഏറെ സന്തോഷം. ഒരു യുഗത്തിന് നാമകരണം ചെയ്ത മഹത് വ്യക്തിയാണല്ലോ ശശിധരന്‍. ചെന്നൊന്നു കാണണം. ഒരു പൂച്ചെണ്ടും കയ്യില്‍ വയ്ക്കണം.