കുഴപ്പിച്ച് രസിപ്പിക്കും എക്കോ; തിയേറ്ററില്‍ തന്നെ കാണേണ്ട സിനിമ!
Eko malayalam movie review
ഡോ. അനില്‍ കുമാര്‍ എസ്.ഡി.
ദിന്‍ജിത്ത് അയ്യത്താന്റെ സംവിധാനത്തിലുള്ള എക്കോ കണ്ടു. രണ്ടേകാല്‍ മണിക്കൂര്‍ നീളുന്ന സ്‌ക്രീന്‍ വിരുന്ന്. ബാഹുല്‍ രമേശിന്റെ കഥ, തിരക്കഥ, സംഭാഷണം, ഛായാഗ്രഹണം. സൂരജിന്റെ എഡിറ്റിംഗും മുജീബിന്റെ സംഗീതവും. സന്ദീപ് പ്രദീപ്, നരേന്‍, അശോകന്‍, വിനീത്, ബിനു പപ്പു തുടങ്ങി മികച്ച താരനിര. മനസ്സുകളുടെ ചുഴികളും എക്കോ സിസ്റ്റവും അഭ്രപാളിയിലാക്കിയ കൗശലം. സൂക്ഷ്മമായ കഥപറച്ചിലും അതിലും അതിസൂക്ഷ്മമായ ദൃശ്യപരിചരണവും. സിനിമ കണ്ടുതീര്‍ന്നാലും തിയേറ്റര്‍ വിട്ടാലും കഥയുടെ ഉള്‍പ്പിരിവുകള്‍ മനസ്സില്‍ കിടന്ന് ചുരുള്‍ നിവര്‍ത്തുന്ന സിനിമ.
മലയാള സിനിമയിലെ ഭാവപരിണാമവും ദൃശ്യകൗശലവും കാലത്തിനൊത്ത് പുതുക്കിപ്പണിയുവാന്‍ സിനിമയിലെ പുതുതലമുറ ശക്തരാണ് എന്ന് എക്കോ തെളിയിക്കുന്നു. ആ മാറ്റത്തിനോട് ശരിയായ അര്‍ത്ഥത്തില്‍ പ്രതികരിക്കാന്‍ നമ്മുടെ പ്രേക്ഷക സമൂഹത്തിന് ത്രാണിയുണ്ടെന്നും എക്കോയുടെ വിജയം അടിവരയിടുന്നു. സിനിമ ഒരു സമഗ്രകലയാണെന്നും സംഭാഷണവും വിഷ്വലും ചേര്‍ന്നുണ്ടാക്കുന്ന ഒരു സാന്‍ഡ് വിച്ച് മാത്രമല്ലെന്നും തെളിയിക്കാനും ഈ സിനിമയ്ക്ക് സാധിക്കുന്നു.
ഒരു സിനിമയില്‍ പ്രകൃതിയേയും ജീവജാലങ്ങളേയും മുഖ്യകഥാപാത്രമാക്കി കഥമെനയുകയും ദൃശ്യം ആവിഷ്‌കരിക്കുകയും ചെയ്യുക സുസാധ്യമാണ്. എന്നാല്‍ അതിനെ കൊമേഴ്‌സ്യലായി വിജയിപ്പിക്കുന്ന രസക്കൂട്ടിലേക്ക് ചമച്ചിറക്കുക ധാരാളം പ്രതിഭയും ഭാവനയും വേണ്ട സാഹസമാണ്.
വലിയ മുടക്കു മുതല്‍ ആവശ്യമുള്ള ഒരു സിനിമയില്‍ ഇത്തരം പരീക്ഷണങ്ങള്‍ സിനിമയെന്ന കലയുടെ ജീവവായുവാണ്. അത് സിനിമയെ ഒരു സമഗ്രകലാരൂപമായി പുതുക്കിപ്പണിയാനും നിലനിര്‍ത്താനും സഹായിക്കും. ആ നിലയ്ക്ക് എക്കോ മലയാളസിനിമയുടെ പുതുകാലപ്രതീക്ഷയുടെ നാമ്പാണ്. ദിന്‍ജിത്ത് അയ്യത്താനും ക്രൂവും എക്കോയിലൂടെ പുതു സിനിമയ്ക്ക് നല്‍കുന്ന ഗുണപരമായ ഊര്‍ജ്ജം ശ്ലാഘനീയമാണ്. അതിനെ ഏറ്റെടുത്തു വിജയിപ്പിച്ച ഓരോ സിനിമാസ്വാദകനും ഈ വിപ്ലവകരമായ മാറ്റത്തിന്റെ ജീവനാഡികള്‍.
കാലത്തിനൊത്ത് പുതുക്കിപ്പണിഞ്ഞ പുതു സിനിമയും ആസ്വാദനവും സിനിമയെ കൂടുതല്‍ക്കൂടുതല്‍ കാവ്യമാക്കുന്നതായി എക്കോ തെളിയിച്ചു. കഥയ്ക്ക് അനുയോജ്യമായ ലൊക്കേഷന്‍, കഥാപാത്രങ്ങളുടേയും പ്രകൃതിയുടേയും ബ്ലെന്‍ഡിംഗ്, പരിശീലിപ്പിച്ച പട്ടികളുടെ സ്വാഭാവിക ദൃശ്യസാക്ഷാത്കാരം, മൗനത്തിന്റെ തിരക്കഥയിലുള്ള ഇരിപ്പിടം, കഥയുടെ പുതുമയും ചുഴിയും മലയും കൊക്കയും എന്നിവയാണ് സിനിമയുടെ ശക്തി. ചില കഥാപാത്രങ്ങളെ യുക്തിപൂര്‍വ്വം വിശദീകരിക്കാനാവാത്തത് ദൗര്‍ബല്യവും. എഴുത്തുകാരനും സംവിധായകനും മാത്രമല്ല പ്രേക്ഷകനും ബോധ്യമാവുന്ന കഥാഗതിയാവണം സിനിമയുടെ ഗാത്രഭംഗി.
എങ്കിലും ഈ സിനിമ മലയാള സിനിമയുടെയും സിനിമാപ്രേക്ഷകന്റേയും ഉയര്‍ന്ന നിലവാരത്തിന്റെ ദിശാസൂചികയാണ്. അഭിനന്ദനീയമായ, തിയേറ്ററില്‍ തന്നെ കാണേണ്ട വിഭവവുമാണ്. ബിഗ് സല്യൂട്ട് പ്രിയ എക്കോ ടീം.