ഹോയ് ഹോയ് പാട്ട് ഇനി കേൾക്കാനാവില്ല; വൈറൽ ​ഗാനം യൂട്യൂബ് നീക്കംചെയ്തു

പാകിസ്താനി ​ഗായകൻ ചാഹത്ത് ഫത്തേ അലി ഖാന്റെ വൈറൽ ​ഗാനം യൂട്യൂബ് നീക്കംചെയ്തു. ഖാന്റേതായി സോഷ്യൽ മീഡിയയിൽ വൈറലായ 'ബഡോ ബാഡി' എന്ന ​ഗാനമാണ് യൂട്യൂബിൽനിന്ന് പകർപ്പവകാശലംഘനം ചൂണ്ടിക്കാട്ടി നീക്കംചെയ്തത്. പ്രശസ്ത പാകിസ്താനി ​ഗായിക നൂർജഹാന്റെ ​ഗാനത്തിന്റെ കവർ പതിപ്പായിരുന്നു ചാഹത്ത് ഫത്തേ അലി ഖാന്റെ ആലാപനത്തിൽ ഏറെ ശ്രദ്ധനേടിയത്.വ്യാഴാഴ്ചയാണ് ഖാന്റെ ​ഗാനം യൂട്യൂബിൽനിന്ന് നീക്കിയത്.

28 മില്ല്യൺ പേരായിരുന്നു ​ഗാനം ഇതുവരെ കണ്ടത്. ടോക്ക് ഷോകളിലൂടെയും മറ്റും ശ്രദ്ധേയനായ ചാഹത് മുൻ ക്രിക്കറ്റ് താരം കൂടിയാണ്. നിരവധി മീമുകളിലൂടെ പ്രശസ്തനായ ആളാണ് ചാഹത് ഫത്തേ അലി ഖാൻ. റീൽസിലടക്കം അദ്ദേഹത്തിന്റെ ഈ പാട്ട് ട്രെൻഡായിരുന്നു. വജ്ധാൻ റാവു റംഘാർ എന്ന മോഡലാണ് ​ഗാനരം​ഗത്തിൽ ചാഹത്തിനൊപ്പം ചുവടു വച്ചത്. കാഷിഫ് റാണ എന്നാണ് 56-കാരനായ ചാഹത് ഫത്തേ അലി ഖാന്റെ യഥാർത്ഥ പേര്. ലാഹോറാണ് സ്വദേശം.

1973-ൽ പുറത്തിറങ്ങിയ 'ബനാർസി തഗ്' എന്ന ചിത്രത്തിലെ ഗാനമാണ് 'ബഡോ ബാഡി'. ഈ പാട്ടിന്റെ ഒരു ഭാഗമാണ് ചാഹത് ഖാൻ തന്റെ ശൈലിയിലാക്കി പാടിയത്. ശേഷം നിരവധി ആളുകൾ ഗാനം ഏറ്റെടുത്തു. സോഷ്യൽ മീഡിയകളിൽ ട്രെൻഡായിരുന്നു ഈ ഗാനം.

Related Articles

Next Story