മൗനം പേസിയതേ എന്ന ചിത്രം റീ-റിലീസ് ചെയ്യുകയും, ഇപ്പോള്‍ 2020 ലെ മികച്ച വില്ലനുള്ള സംസ്ഥാന പുരസ്‌കാരം ലഭിച്ചതിന്റെയും സന്തോഷത്തിലാണ് നന്ദ. നന്ദയും കാര്‍ത്തിയും ആര്യയും വിശാലുമടക്കമുള്ള സംഘമാണ് തമിഴ് താര സംഘടനയായ നടികര്‍ സംഘത്തിന്റെ കെട്ടിടം പണിക്ക് തുടക്കം കുറിച്ചത്. എന്താണ് നിലവില്‍ അതിന്റെ സ്റ്റേജ്, എത്ര കോടിയാണ് ചെലവ്, എന്തുകൊണ്ട് നേരം വൈകുന്നു തുടങ്ങിയ കാര്യങ്ങള്‍ നന്ദ തുറന്ന് സംസാരിക്കുന്നു.

ആ കെട്ടിടത്തിന്റെ പണി തുടങ്ങുമ്പോള്‍ എന്ത് ആവേശമായിരുന്നോ ഞങ്ങള്‍ക്ക് എല്ലാവര്‍ക്കും ഉണ്ടായിരുന്നത്, ഇന്നും അതേ ആവേശം തന്നെയാണ്. അത് തെല്ലും തോര്‍ന്നു പോയിട്ടില്ല. എല്ലാത്തിന്റെയും അവസാനം ഡിസംബറോടുകൂടെ കെട്ടിടം പണി പൂര്‍ത്തിയാകും എന്ന സന്തോഷവും ഇപ്പോഴുണ്ട്.

മുപ്പത്തിയഞ്ച് മുതല്‍ നാല്‍പത് കോടി വരെ ചെലവാക്കിയാണ് കെട്ടിടം പണി നടക്കുന്നത്. ചെന്നൈയിലെ ഒരു ലാന്റ്മാര്‍ക്ക് തന്നെയായിരിക്കും ഇനി ആ കെട്ടിടം, അത് കാണാന്‍ വേണ്ടി മാത്രം ആളുകള്‍ വരുന്ന സമയമുണ്ടാവും. അത്രയും വലുതാണ്, രണ്ട് കല്യാണ മണ്ഡപവും, ജിമ്മും, ചെന്നൈയിലെ ഏറ്റവും വലിയ ഹെല്‍ത്ത് സെന്ററുമടക്കം എല്ലാം ആ കെട്ടിടത്തിന് അകത്തുണ്ടാവും.ഒരുപാടാളുകളുടെ ജീവിതവും ഭാവിയുമാണ് ആ കെട്ടിടം. പലര്‍ക്കും തൊഴിലവസരങ്ങളുണ്ടാവും, അംഗങ്ങളായവര്‍ക്ക് മെഡിക്കല്‍ സപ്പോര്‍ട്ടും, എജ്വുക്കേഷന്‍ സപ്പോര്‍ട്ടും നല്‍കും. ആ തരത്തില്‍ എല്ലാവര്‍ക്കും ഉപകാരപ്രദമായിരിക്കും- നന്ദ പറഞ്ഞു

എന്തുകൊണ്ട് ഒന്‍പത് വര്‍ഷത്തോളം നീണ്ടു നില്‍ക്കുന്നു എന്ന ചോദ്യത്തിനും നന്ദ വ്യക്തമായ മറുപടി പറഞ്ഞു. അതിനിടയില്‍ താരസംഘടനയുടചെ ഇലക്ഷന്‍ നടന്നു, അതിന്റെ പേരിലെ വിവാദങ്ങളും കേസും എല്ലാമായി കുറേക്കാലം വര്‍ക്ക് നിന്നുപോയി. പിന്നെ വീണ്ടും പണി ആരംഭിക്കുമ്പോള്‍ പലതും ഔട്ടേറ്റഡ് ആയിപ്പോയിരുന്നു. അതൊക്കെ വീണ്ടും മാറ്റിപ്പണിതു. അതൊക്കെ കാരണമാണ് ഇത്രയും കാലമെടുത്തത് എന്നാണ് നന്ദയുടെ വിശദീകരണം