ഹൈദരാബാദ്: തെന്നിന്ത്യൻ സിനിമാ ലോകം കാത്തിരുന്ന ആ പ്രഖ്യാപനം എത്തി. വിജയ് ദേവരകൊണ്ടയും രശ്മിക മന്ദാനയും പ്രധാന വേഷങ്ങളിലെത്തുന്ന ബിഗ് ബജറ്റ് ചിത്രം ‘രണബാലി’യുടെ ഫസ്റ്റ് ലുക്ക് പോസ്റ്ററുകൾ പുറത്തിറങ്ങി. യഥാർത്ഥ ജീവിതത്തിൽ ഇരുവരും വിവാഹിതരായതിന് തൊട്ടുപിന്നാലെ പുതിയ ചിത്രത്തിന്റെ വിശേഷങ്ങൾ എത്തിയത് ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്.

‘രണബാലിയും ജയമ്മയും ഒന്നിക്കുന്നു’

ചിത്രത്തിലെ നായികാ നായകന്മാരുടെ ലുക്കിനൊപ്പം അണിയറപ്രവർത്തകർ പുറത്തുവിട്ട പ്രത്യേക വീഡിയോ സോഷ്യൽ മീഡിയയിൽ ഇതിനോടകം തരംഗമായിക്കഴിഞ്ഞു. "നമ്മുടെ രണബാലിയും ജയമ്മയും എന്നെന്നേക്കും ഒന്നായി" എന്ന കുറിപ്പോടെയാണ് സർപ്രൈസ് വീഡിയോ പങ്കുവെച്ചിരിക്കുന്നത്. ഗീതാ ഗോവിന്ദം, ഡിയർ കൊമ്രേഡ് എന്നീ ചിത്രങ്ങൾക്ക് ശേഷം ഇരുവരും ഒന്നിക്കുന്ന ചിത്രമെന്ന പ്രത്യേകതയും ഇതിനുണ്ട്.

19-ാം നൂറ്റാണ്ടിലെ പോരാട്ടകഥ

ബ്രിട്ടീഷ് ഭരണകാലത്തെ പശ്ചാത്തലമാക്കി ഒരുക്കുന്ന പീരിയഡ് ആക്ഷൻ ഡ്രാമയാണ് രണബാലി. 19-ാം നൂറ്റാണ്ടിലെ വിപ്ലവത്തിന്റെയും പോരാട്ടങ്ങളുടെയും കഥ പറയുന്ന ചിത്രത്തിൽ തികച്ചും വ്യത്യസ്തമായ ഗെറ്റപ്പുകളിലാണ് വിജയ് ദേവരകൊണ്ടയും രശ്മികയും പ്രത്യക്ഷപ്പെടുന്നത്. ചരിത്ര പശ്ചാത്തലത്തിലുള്ള പ്രണയവും അതീവ തീവ്രമായ ആക്ഷൻ രംഗങ്ങളുമാണ് സിനിമയുടെ പ്രധാന ആകർഷണം.

അണിയറയിൽ വമ്പൻ നിര

സൂപ്പർഹിറ്റ് ചിത്രം ‘ശ്യാം സിംഘ റോയി’ക്ക് ശേഷം രാഹുൽ സംകൃത്യൻ സംവിധാനം ചെയ്യുന്ന ചിത്രമാണിത്. മൈത്രി മൂവി മേക്കേഴ്സ് വൻ ബജറ്റിൽ നിർമ്മിക്കുന്ന രണബാലി, വിജയ് ദേവരകൊണ്ടയുടെ കരിയറിലെ ഏറ്റവും വലിയ പ്രോജക്റ്റുകളിൽ ഒന്നായാണ് കണക്കാക്കപ്പെടുന്നത്. ചിത്രത്തിന്റെ കൂടുതൽ വിവരങ്ങൾ വരും ദിവസങ്ങളിൽ പുറത്തുവിടുമെന്ന് നിർമ്മാതാക്കൾ അറിയിച്ചു