മമ്മൂട്ടിയും അടൂർ ഗോപാലകൃഷ്ണനും വീണ്ടും ഒന്നിക്കുന്നുവെന്ന ആവേശകരമായ വാർത്ത പങ്കുവെച്ച് നടൻ കെ.കെ. സുധാകരൻ. മലയാള സിനിമയിലെ എക്കാലത്തെയും മികച്ച ക്ലാസിക് കൂട്ടുകെട്ടുകളിലൊന്നായ ഇരുവരും 'മതിലുകൾ', 'വിധേയൻ', 'അനന്തരം' എന്നീ ചിത്രങ്ങൾക്ക് ശേഷം വീണ്ടും കൈകോർക്കുന്നത് സിനിമാ ലോകത്ത് വലിയ ചർച്ചയായിരിക്കുകയാണ്. മാസ്റ്റർ ബിൻ എന്ന യൂട്യൂബ് ചാനലിന് നൽകിയ അഭിമുഖത്തിലാണ് സുധാകരൻ തന്റെ സിനിമാ ജീവിതത്തെക്കുറിച്ചും മമ്മൂട്ടിയുമായുള്ള സൗഹൃദത്തെക്കുറിച്ചും മനസ്സ് തുറന്നത്.

പത്മരാജൻ സംവിധാനം ചെയ്ത 'ഇന്നലെ' എന്ന ചിത്രത്തിലൂടെയാണ് സുധാകരൻ സിനിമാ രംഗത്തേക്ക് പ്രവേശിക്കുന്നത്. അന്ന് ഓഡിഷന് ശേഷം വീണ 'അച്ചായൻ' എന്ന വിളിപ്പേര് ഇന്നും സിനിമയ്ക്കകത്തും പുറത്തും തനിക്ക് കൂട്ടുണ്ടെന്ന് അദ്ദേഹം ഓർത്തെടുക്കുന്നു. മമ്മൂട്ടി, മോഹൻലാൽ, സുരേഷ് ഗോപി, ജയറാം തുടങ്ങി മലയാളത്തിലെ മുൻനിര താരങ്ങൾക്കെല്ലാം ഒപ്പം അഭിനയിക്കാൻ സാധിച്ച സുധാകരൻ, കനൽ, മരുഭൂമിയിലെ ആന തുടങ്ങിയ ചിത്രങ്ങളുടെ വിദേശത്തെ ഷൂട്ടിംഗ് അനുഭവങ്ങളും പങ്കുവെച്ചു. 'തിമിരം' എന്ന സിനിമയ്ക്ക് ശേഷം പലരും തന്നെ സിനിമയിലേക്ക് അന്വേഷിച്ചിരുന്നെങ്കിലും തന്നെ കണ്ടെത്താൻ പലർക്കും സാധിച്ചിരുന്നില്ലെന്നും അദ്ദേഹം കൂട്ടിച്ചേർത്തു.

സിനിമയിലെ ആകസ്മികമായ വേഷങ്ങളെക്കുറിച്ചും അദ്ദേഹം വാചാലനായി. തിരുവനന്തപുരം ടാഗോർ തിയേറ്ററിൽ ഖദർ മുണ്ടും ഷർട്ടും ധരിച്ച് പോയപ്പോൾ ലഭിച്ച ആഭ്യന്തര മന്ത്രിയുടെ വേഷം തന്റെ കരിയറിലെ വഴിത്തിരിവായി. ജോഷി സംവിധാനം ചെയ്ത സൂപ്പർ ഹിറ്റ് ചിത്രം 'ധ്രുവ'ത്തിൽ സുരേഷ് ഗോപി, ജനാർദ്ദനൻ, വിജയരാഘവൻ തുടങ്ങിയ പ്രതിഭകൾ തന്നെ സല്യൂട്ട് ചെയ്യുന്ന രംഗം അപ്രതീക്ഷിതമായി ലഭിച്ച ഒന്നായിരുന്നുവെന്ന് അദ്ദേഹം അനുസ്മരിച്ചു. ഹിറ്റായ ഒരു സിനിമയിലെ ഒരൊറ്റ വേഷം മതി ജീവിതം മാറാനെന്നും സുധാകരൻ പറഞ്ഞു.

ഖത്തറിലെ പ്രവാസി ദോഹ എന്ന അസോസിയേഷന്റെ സ്ഥാപകാംഗങ്ങളിൽ ഒരാളായ സുധാകരൻ, മമ്മൂട്ടിയുമായി തനിക്കുള്ള വ്യക്തിപരമായ അടുപ്പത്തെക്കുറിച്ചും സംസാരിച്ചു. അസോസിയേഷന്റെ പത്താം വാർഷികത്തിന് മമ്മൂട്ടിയെ ക്ഷണിച്ചതും, അപ്രതീക്ഷിതമായി അവിടെ വെച്ച് അദ്ദേഹത്തിന്റെ വിവാഹ വാർഷികം ആഘോഷിച്ചതും സുധാകരൻ തന്റെ ഓർമ്മകളിൽ പങ്കുവെച്ചു. മമ്മൂട്ടി-അടൂർ ഗോപാലകൃഷ്ണൻ കോംബോ വീണ്ടും വരുന്നു എന്ന വാർത്ത സുധാകരനിലൂടെ പുറത്തുവന്നതോടെ വലിയ പ്രതീക്ഷയിലാണ് ആരാധകർ.