ഇന്ത്യൻ സിനിമയുടെ വിജയഗാഥകളിൽ ഏറ്റവും പ്രചോദനാത്മകമായ ഒന്നാണ് നടൻ സുനിൽ ഷെട്ടിയുടെ ജീവിതം. എളിമയുള്ള ഒരു തൊഴിലാളിവർഗ കുടുംബത്തിൽ ജനിച്ച സുനിൽ ഷെട്ടി, തന്റെ പിതാവ് വീരപ്പ ഷെട്ടി കുടുംബത്തെ പോറ്റാൻ അനുഭവിച്ച കഠിനമായ ത്യാഗങ്ങൾ കണ്ടാണ് വളർന്നത്. ഉപജീവനത്തിനായി ചെറുപ്രായത്തിൽ തന്നെ മുംബൈയിലേക്ക് കുടിയേറിയ വീരപ്പ ഷെട്ടി, ഒരു ദക്ഷിണേന്ത്യൻ ഹോട്ടലിൽ മേശകൾ വൃത്തിയാക്കുന്ന ജോലിക്കാരനായാണ് തന്റെ ജീവിതം ആരംഭിച്ചത്. പിന്നീട് വെയിറ്ററായും ഹോട്ടൽ മാനേജരായും അദ്ദേഹം വളർന്നു. പരാതികളില്ലാതെ കഠിനാധ്വാനം ചെയ്യുന്ന അച്ഛനെ കണ്ടുവളർന്നത് സുനിൽ ഷെട്ടിയുടെ ജീവിതവീക്ഷണത്തെ അടിമുതലേ മാറ്റിമറിച്ചു.

അഭിനയലോകത്ത് വിജയം കൊയ്ത ശേഷം സുനിൽ ഷെട്ടി നടത്തിയ ആദ്യത്തെ വലിയ നിക്ഷേപം ആഡംബര കാറുകളോ ബംഗ്ലാവുകളോ ആയിരുന്നില്ല. പകരം, തന്റെ പിതാവ് ഒരിക്കൽ വെയിറ്ററായി ജോലി ചെയ്തിരുന്ന അതേ ഹോട്ടൽ കെട്ടിടം അദ്ദേഹം സ്വന്തമാക്കി. 2013-ൽ ഭാര്യ മന ഷെട്ടിയുമായി ചേർന്ന് മുംബൈയിൽ 'ആർ-ഹൗസ്' എന്ന പേരിൽ ആഡംബര ഹോം ഡെക്കർ സ്റ്റോർ ആരംഭിച്ചപ്പോൾ, താൻ നിക്ഷേപം നടത്തിയത് 1943-ൽ തന്റെ പിതാവ് പണിയെടുത്ത ഹോട്ടൽ സ്ഥിതി ചെയ്തിരുന്ന അതേ കെട്ടിടത്തിലാണെന്ന് താരം വെളിപ്പെടുത്തിയിരുന്നു. പിതാവിന്റെ വിയർപ്പിന്റെ ഗന്ധമുള്ള ആ കെട്ടിടം സ്വന്തമാക്കാനായത് തന്റെ ജീവിതത്തിലെ വലിയ സ്വപ്നസാക്ഷാത്കാരമാണെന്നാണ് അദ്ദേഹം അന്ന് പറഞ്ഞത്.

ബോളിവുഡിലെ ഏറ്റവും ശ്രദ്ധേയരായ നടന്മാരിൽ ഒരാളായ സുനിൽ ഷെട്ടി ഇന്ന് 125 കോടിയിലധികം രൂപയുടെ ആസ്തിയുള്ള വ്യക്തിയാണ്. ആക്ഷൻ ത്രില്ലറുകളും കോമഡികളും ഉൾപ്പെടെ നൂറിലധികം ചിത്രങ്ങളിൽ വേഷമിട്ട അദ്ദേഹം, സിനിമാ മേഖലയിലെ തന്റെ സാന്നിധ്യം വിജയകരമായി ഉറപ്പിച്ചു. ഇപ്പോൾ സിനിമകളിൽ വളരെ കുറച്ചുമാത്രമേ പ്രത്യക്ഷപ്പെടുന്നുള്ളൂവെങ്കിലും, മികച്ച ബിസിനസ് സംരംഭങ്ങളിലൂടെയും നിക്ഷേപങ്ങളിലൂടെയും അദ്ദേഹം തന്റെ സാമ്രാജ്യം വികസിപ്പിച്ചിട്ടുണ്ട്. അഭിനയത്തിനപ്പുറം ബിസിനസ് രംഗത്ത് കാട്ടിയ മികവാണ് സുനിൽ ഷെട്ടിയെ സിനിമാ വ്യവസായത്തിലെ ഏറ്റവും സാമ്പത്തികമായി സ്ഥിരതയുള്ള താരങ്ങളിൽ ഒരാളായി മാറ്റിയത്.