നടി ആക്രമിക്കപ്പെട്ട കേസിൽ വിചാരണ കോടതിയുടെ വിധിക്കെതിരെ അപ്പീലുമായി സംസ്ഥാന സർക്കാർ ഹൈക്കോടതിയെ സമീപിച്ചു. കേസിലെ എട്ടാം പ്രതി നടൻ ദിലീപ്, ഏഴാം പ്രതി ചാർളി തോമസ്, ഒമ്പതാം പ്രതി മേസ്തിരി സനിൽ, പതിനഞ്ചാം പ്രതി ശരത് എന്നിവരെ വിചാരണ കോടതി വെറുതെവിട്ട നടപടി റദ്ദാക്കണമെന്നാണ് സർക്കാരിന്റെ പ്രധാന ആവശ്യം. ഗൂഢാലോചനയ്ക്ക് മതിയായ തെളിവില്ലെന്ന് ചൂണ്ടിക്കാട്ടിയാണ് ഇവരെ കോടതി നേരത്തെ കുറ്റവിമുക്തരാക്കിയത്. എന്നാൽ, വസ്തുതകളും നിയമപരമായ വശങ്ങളും പരിശോധിക്കുന്നതിൽ വിചാരണ കോടതി പരാജയപ്പെട്ടുവെന്ന് സർക്കാർ സമർപ്പിച്ച അപ്പീലിൽ വ്യക്തമാക്കുന്നു.

പ്രതികൾക്ക് പരമാവധി ശിക്ഷ വേണം: സർക്കാർ

കേസിൽ ഒന്ന് മുതൽ ആറ് വരെ പ്രതികളായ പൾസർ സുനി ഉൾപ്പെടെയുള്ളവർക്ക് വിചാരണ കോടതി വിധിച്ച 20 വർഷം കഠിനതടവ് ശിക്ഷ വർധിപ്പിക്കണമെന്നും അപ്പീലിൽ ആവശ്യപ്പെടുന്നുണ്ട്. ഒരു സ്ത്രീയുടെ സ്വകാര്യതയും അന്തസ്സും ഹനിക്കുംവിധം ദൃശ്യങ്ങൾ ചിത്രീകരിച്ചത് അതീവ ഗൗരവകരമായ കുറ്റകൃത്യമാണെന്നും, പ്രതികൾക്ക് കുറഞ്ഞ ശിക്ഷ നൽകുന്നത് സമൂഹത്തിന് തെറ്റായ സന്ദേശം നൽകുമെന്നും സർക്കാർ വാദിക്കുന്നു. അതിനാൽ ഇവർക്ക് പരമാവധി ശിക്ഷ ഉറപ്പാക്കണമെന്നാണ് ആവശ്യം. അതിജീവിതയ്ക്കെതിരെ നടന്ന ക്രൂരകൃത്യത്തിന്റെ മുഖ്യ ആസൂത്രകൻ ദിലീപാണെന്നും, കുടുംബജീവിതം തകർത്തതിന് അതിജീവിതയോടുള്ള വൈരാഗ്യമാണ് ഈ ഗൂഢാലോചനയ്ക്ക് പിന്നിലെന്നും സർക്കാർ അപ്പീലിൽ ആവർത്തിക്കുന്നു. ദിലീപും പൾസർ സുനിയും വിവിധ സ്ഥലങ്ങളിൽ വെച്ച് കൂടിക്കാഴ്ച നടത്തിയതിന് തെളിവുകളും സാക്ഷിമൊഴികളും ഉണ്ടായിരുന്നിട്ടും, വിചാരണ കോടതി ഇവയൊന്നും പരിഗണിച്ചില്ലെന്നും സർക്കാർ ആരോപിക്കുന്നു. കൂടാതെ, അന്വേഷണ ഉദ്യോഗസ്ഥനായ ബൈജു പൗലോസിനെതിരെ വിചാരണ കോടതി നടത്തിയ പരാമർശങ്ങൾ നീക്കം ചെയ്യണമെന്നും സർക്കാരിന്റെ അപ്പീലിലുണ്ട്.

നീണ്ട നിയമനടപടികൾ

2017 ഫെബ്രുവരി 17-ന് തൃശ്ശൂരിൽ നിന്ന് കൊച്ചിയിലേക്കുള്ള യാത്രയ്ക്കിടെയായിരുന്നു നടി ആക്രമിക്കപ്പെട്ടത്. എട്ടുവർഷം നീണ്ട വിചാരണയ്ക്കുശേഷം 2025 ഡിസംബർ 8-നാണ് കേസിൽ വിധി പ്രഖ്യാപിച്ചത്. 2025 ഡിസംബർ 12-ന് പ്രതികൾക്കുള്ള ശിക്ഷാവിധിയും പുറത്തുവന്നു. വിധി വന്നതിന് പിന്നാലെ തന്നെ അപ്പീൽ നൽകുമെന്ന് സർക്കാർ വ്യക്തമാക്കിയിരുന്നുവെങ്കിലും, വിധി വന്ന് 78 ദിവസങ്ങൾക്ക് ശേഷമാണ് ഇപ്പോൾ അപ്പീൽ സമർപ്പിക്കുന്നത്. കേസിൽ ശിക്ഷിക്കപ്പെട്ട പ്രതികൾ നേരത്തെ തന്നെ ഹൈക്കോടതിയിൽ അപ്പീൽ നൽകിയിരുന്നു. സങ്കീർണ്ണമായ നിയമനടപടികളിലൂടെ കടന്നുപോകുന്ന ഈ കേസിൽ സർക്കാരിന്റെ നീക്കം ഏറെ നിർണ്ണായകമാണ്.