ലോസ് ആഞ്ചലസ്: ലോകം കാത്തിരുന്ന 98-ാമത് ഓസ്കർ പുരസ്കാര വേദിയിൽ ഇത്തവണ സിനിമാ വിശേഷങ്ങൾക്കൊപ്പം തന്നെ ആരാധകരുടെ ശ്രദ്ധ പിടിച്ചുപറ്റിയത് ഹോളിവുഡ് താരം ലിയോനാർഡോ ഡികാപ്രിയോയുടെ സാന്നിധ്യമായിരുന്നു. നീണ്ട നാളത്തെ അഭ്യൂഹങ്ങൾക്ക് വിരാമമിട്ട് തന്റെ കാമുകിയും മോഡലുമായ വിറ്റോറിയ സെറേറ്റിക്കൊപ്പമാണ് താരം ഇത്തവണ ചടങ്ങിനെത്തിയത്. 2023-ൽ ഡേറ്റിംഗ് ആരംഭിച്ചതിന് ശേഷം ഇരുവരും ആദ്യമായാണ് ഒരു ഓസ്കർ ചടങ്ങിൽ ഒരുമിച്ച് പങ്കെടുക്കുന്നത്. റെഡ് കാർപ്പറ്റിൽ ഡികാപ്രിയോ ഒറ്റയ്ക്കാണ് എത്തിയതെങ്കിലും, ഡോൾബി തിയേറ്ററിനുള്ളിൽ വിറ്റോറിയയ്ക്കൊപ്പമിരിക്കുന്ന താരത്തിന്റെ ദൃശ്യങ്ങൾ ടിവി ക്യാമറകൾ പകർത്തിയതോടെ ആരാധകർ ആവേശത്തിലായി. സാധാരണയായി വലിയ പുരസ്കാര ചടങ്ങുകളിൽ തന്റെ അമ്മ ഇർമെലിൻ ഇൻഡൻബിർക്കനെ ഒപ്പം കൂട്ടാറുള്ള ഡികാപ്രിയോ, ഇത്തവണ വിറ്റോറിയയ്ക്കൊപ്പം പൊതുവേദിയിൽ പ്രത്യക്ഷപ്പെട്ടത് തങ്ങളുടെ ബന്ധം ഔദ്യോഗികമായി വെളിപ്പെടുത്തുന്നതിന് തുല്യമായി.

പുരസ്കാര നേട്ടങ്ങളിലും ഡികാപ്രിയോ ചിത്രം 'വൺ ബാറ്റിൽ ആഫ്റ്റർ അനദർ' വലിയ മുന്നേറ്റമാണ് നടത്തിയത്. തോമസ് പിൻചോണിന്റെ നോവലിനെ ആസ്പദമാക്കി നിർമിച്ച ചിത്രത്തിൽ ബോബ് ഫെർഗൂസൺ എന്ന രാഷ്ട്രീയ പോരാളിയെ അവതരിപ്പിച്ച ഡികാപ്രിയോയ്ക്ക് മികച്ച നടനുള്ള നാമനിർദേശം ലഭിച്ചിരുന്നു. എന്നാൽ കടുത്ത പോരാട്ടത്തിനൊടുവിൽ 'സിന്നേഴ്സ്' എന്ന ചിത്രത്തിലൂടെ മൈക്കിൾ ബി. ജോർദൻ മികച്ച നടനുള്ള പുരസ്കാരം സ്വന്തമാക്കി. മികച്ച നടനുള്ള അവാർഡ് നേരിയ വ്യത്യാസത്തിൽ നഷ്ടമായെങ്കിലും, മികച്ച ചിത്രം, മികച്ച സംവിധായകൻ എന്നിവയുൾപ്പെടെ ആറ് വിഭാഗങ്ങളിൽ ഡികാപ്രിയോ ചിത്രം പുരസ്കാരം നേടി 2026-ലെ ഓസ്കറിൽ കരുത്തുതെളിയിച്ചു. ആകെ 13 നോമിനേഷനുകളാണ് ഈ ചിത്രത്തിന് ലഭിച്ചിരുന്നത്.

2023 ഓഗസ്റ്റിൽ ഐബിസയിലെ ഒരു നൈറ്റ് ക്ലബ്ബിൽ വെച്ച് ഇരുവരും ഒരുമിച്ച് നൃത്തം ചെയ്യുന്ന ദൃശ്യങ്ങൾ പുറത്തുവന്നതോടെയാണ് 51-കാരനായ ഡികാപ്രിയോയും 27-കാരിയായ വിറ്റോറിയയും പ്രണയത്തിലാണെന്ന വാർത്തകൾ പ്രചരിച്ചു തുടങ്ങിയത്. പിന്നീട് ഇറ്റലി സന്ദർശന വേളയിലും 2025-ലെ മെറ്റ് ഗാലയിലും ഇവർ ഒന്നിച്ച് പ്രത്യക്ഷപ്പെട്ടിരുന്നെങ്കിലും, ഒരു ഔദ്യോഗിക പുരസ്കാര വേദിയിൽ ഇരുവരും ഒന്നിക്കുന്നത് ഇതാദ്യമാണ്. സ്വകാര്യ ജീവിതം അധികം വെളിപ്പെടുത്താൻ ആഗ്രഹിക്കാത്ത ഇരുവരുടെയും ഈ പരസ്യമായ സാന്നിധ്യം സിനിമാ ലോകത്ത് വലിയ ചർച്ചയായി മാറിയിരിക്കുകയാണ്.