ദളപതി വിജയ് നായകനാകുന്ന ബിഗ് ബജറ്റ് ചിത്രം 'ജനനായകൻ' റിലീസ് പ്രതിസന്ധികൾ നേരിടുന്നതിനിടയിൽ, സംവിധായകൻ എച്ച്. വിനോദ് തന്റെ അടുത്ത പ്രോജക്റ്റിലേക്ക് നീങ്ങുന്നതായി റിപ്പോർട്ടുകൾ. തമിഴ് താരം സൂര്യയുമായി വിനോദ് കഥ ചർച്ച ചെയ്തതായാണ് സൂചനകൾ പുറത്തുവരുന്നത്. ജനുവരി 9-ന് റിലീസ് ചെയ്യാനിരുന്ന 'ജനനായകൻ' സെൻസർ ബോർഡുമായുള്ള തർക്കങ്ങളും കോടതി വ്യവഹാരങ്ങളും കാരണമാണ് അനിശ്ചിതമായി നീണ്ടുപോയത്. നിലവിൽ സെൻസർ ബോർഡിന്റെ റിവൈസിംഗ് കമ്മിറ്റി ചിത്രം കണ്ടതിനുശേഷം അന്തിമ തീരുമാനം എടുക്കുമെന്നാണ് അറിയുന്നത്. ഈ പ്രതിസന്ധികൾക്കിടയിൽ മേയ് മാസത്തോടെ ചിത്രം തിയേറ്ററുകളിൽ എത്തിക്കാനുള്ള ശ്രമത്തിലാണ് അണിയറപ്രവർത്തകർ.

സെൻസർ ബോർഡിനെതിരെയുള്ള ഹർജി നിർമ്മാതാക്കളായ കെ.വി.എൻ പ്രൊഡക്ഷൻസ് മദ്രാസ് ഹൈക്കോടതിയിൽ നിന്നും പിൻവലിച്ചതാണ് ഏറ്റവും പുതിയ വികാസം. നിയമപോരാട്ടവുമായി മുന്നോട്ടുപോകാൻ താൽപ്പര്യമില്ലെന്നും പകരം റിവൈസിംഗ് കമ്മിറ്റിയുടെ തീരുമാനത്തിനായി കാത്തിരിക്കാമെന്നും നിർമ്മാതാക്കൾ കോടതിയെ അറിയിച്ചു. വിജയ്‍യുടെ കരിയറിലെ അവസാന ചിത്രമായതിനാൽ ആരാധകർ ഏറെ ആവേശത്തോടെയാണ് ഇതിനെ കാണുന്നത്. മമിത ബൈജു, പൂജ ഹെഗ്‌ഡെ, ബോബി ഡിയോൾ, പ്രകാശ് രാജ്, ഗൗതം വാസുദേവ് മേനോൻ തുടങ്ങി വൻ താരനിര അണിനിരക്കുന്ന ഈ ചിത്രം 1000 കോടി ക്ലബ്ബിൽ ഇടംപിടിച്ച് വിജയ്‍യുടെ സിനിമാ ജീവിതത്തിന് ഗംഭീരമായ ഒരു യാത്രയയപ്പ് നൽകുമോ എന്ന ആകാംക്ഷയിലാണ് സിനിമാ ലോകം