'സു ഫ്രം സോ'യുടെ ഗംഭീര വിജയത്തിന് ശേഷം രാജ് ബി ഷെട്ടിയുടെ 'കരാവലി' വരുന്നു, ആകാംക്ഷയുണര്‍ത്തുന്ന പോസ്റ്റര്‍ പുറത്ത്
'സു ഫ്രം സോ'യുടെ ഗംഭീര വിജയത്തിന് ശേഷം രാജ് ബി ഷെട്ടിയുടെ 'കരാവലി' വരുന്നു, ആകാംക്ഷയുണര്‍ത്തുന്ന പോസ്റ്റര്‍ പുറത്ത്
കന്നഡയില്‍ നിന്നുമെത്തിയ 'സു ഫ്രം സോ' എന്ന ബ്ലോക്ക്ബസ്റ്ററിന് ശേഷം രാജ് ബി ഷെട്ടി, സംവിധായകന്‍ ഗുരുദത്ത് ഗാനിഗയുമായി ഒന്നിച്ചെത്തുന്ന 'കരാവലി' വരുന്നു. കര്‍ണാടകയുടെ തീരദേശ കാന്‍വാസിലൊരുങ്ങുന്ന സിനിമയുടെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. 'മൃഗം vs മനുഷ്യന്‍' എന്ന ടാഗ് ലൈനുമായി എത്തിയിരിക്കുന്ന പോസ്റ്ററില്‍ രണ്ട് എരുമകള്‍ക്ക് നടുവില്‍ തീക്ഷ്ണമായ കണ്ണുകളും കൈയ്യില്‍ തീപ്പന്തവുമേന്തി നില്‍ക്കുന്ന രാജ് ബി ഷെട്ടിയെ ആണ് അവതരിപ്പിച്ചിരിക്കുന്നത്.
പ്രജ്വാള്‍ ദേവരാജ് ആണ് നായകനായി എത്തുന്ന ചിത്രത്തില്‍ മാവീര എന്ന നിര്‍ണായക വേഷത്തിലാണ് രാജ് ബി ഷെട്ടി അഭിനയിക്കുന്നത്. മണ്ണില്‍ നിന്ന് ജനിച്ച ഒരു ആത്മാവായിട്ടാണ് മാവീര എന്ന കഥാപാത്രത്തെ സംവിധായകന്‍ ഗുരുദത്ത ഗാനിഗ വിശേഷിപ്പിക്കുന്നത്. 'സിനിമയുടെ എഴുത്ത് തുടങ്ങിയപ്പോള്‍, മാവീരയുടെ വേഷം ആര് അവതരിപ്പിക്കുമെന്ന് ഞങ്ങള്‍ക്ക് ഒരു ഊഹവുമില്ലായിരുന്നു. ആദ്യ ടീസര്‍ പുറത്തിറങ്ങിയതിനുശേഷമുള്ള പ്രതികരണം അതിശയിപ്പിക്കുന്നതായിരുന്നു, പ്രത്യേകിച്ച് കമ്പളയുടെ സത്തയും ഈ പത്ത് സെക്കന്‍ഡ് കായിക വിനോദത്തിന് പിന്നിലെ ചൈതന്യവും മനസ്സിലാക്കുന്ന ദക്ഷിണ കാനറയിലെ ജനങ്ങളില്‍ നിന്നുള്ള പ്രതികരണം വിസ്മയിപ്പിച്ചു'', സംവിധായകന്റെ വാക്കുകള്‍.
'ഞങ്ങള്‍ നിരവധി അഭിനേതാക്കളുമായി സംസാരിച്ചിരുന്നു, അവര്‍ക്ക് കഥാപാത്രം ഇഷ്ടപ്പെട്ടു, പക്ഷേ എന്തോ ഒന്ന് ചേര്‍ന്നിരുന്നില്ല. തീരദേശ ആചാരങ്ങളില്‍ വേരൂന്നിയുള്ള കഥയായതിനാല്‍, കഥാപാത്രത്തെ ആത്മാവില്‍ ചേര്‍ക്കുന്ന അത്രയും മനസ്സിലാക്കുന്ന ഒരാളെ കൊണ്ടുവരാന്‍ ഞങ്ങള്‍ ആഗ്രഹിച്ചിരുന്നു. അങ്ങനെ രാജിനെ കണ്ടു കഥ പറഞ്ഞു. പക്ഷേ, സു ഫ്രം സോയിലെ ഉള്‍പ്പെടെ നിരവധി സിനിമകളുടെ തിരക്കിലായിരുന്നു അദ്ദേഹം. ഞാന്‍ തളര്‍ന്നില്ല. അഞ്ച് മീറ്റിംഗുകള്‍ക്ക് ശേഷം, അദ്ദേഹം ചോദിച്ചു, 'നിങ്ങള്‍ക്ക് വിരോധമില്ലെങ്കില്‍, നിങ്ങള്‍ ചിത്രീകരിച്ച ചില ഭാഗങ്ങള്‍ ഞാന്‍ കാണട്ടെ?' ഞാന്‍ സമ്മതിച്ചു, ഫൂട്ടേജ് കണ്ടപ്പോള്‍ അദ്ദേഹം സമ്മതം അറിയിച്ചു. രാജ് മാവീരയെ അവതരിപ്പിക്കുക മാത്രമല്ല, മാവീരയായി ജീവിക്കുകയായിരുന്നു', ഗുരുദത്ത ഗാനിഗ പറയുന്നു.
'മാവീരയുടെ വരവ്' എന്ന തലവാചകവുമായെത്തിയിരിക്കുന്ന പോസ്റ്ററില്‍ രാജ് ബി ഷെട്ടിയുടെ ലുക്ക് ആകാംക്ഷ ഉയര്‍ത്തുന്നതാണ് 'അയാള്‍ ഒരു കമ്പള മത്സരയോട്ടക്കാരനാണോ? അതോ പാരമ്പര്യത്തിന്റെ പ്രതീകാത്മക സംരക്ഷകനാണോ?' ആരാധകര്‍ ഏറെ കാത്തിരിപ്പിലാണ്. തീരദേശ കര്‍ണാടകയില്‍ വ്യാപകമായി ചിത്രീകരിച്ച കരാവലി അതിജീവനം, വിശ്വസ്തത, മനുഷ്യനും മൃഗവും തമ്മിലുള്ള പ്രാഥമിക സംഘര്‍ഷാവസ്ഥകള്‍ എന്നീ വിഷയങ്ങളിലൂന്നിയുള്ളതാണ്.
പ്രജ്വാള്‍ ദേവരാജ്, രാജ് ബി ഷെട്ടി എന്നിവരെ കൂടാതെ മിത്രയും ഒരു നിര്‍ണായക വേഷത്തില്‍ ചിത്രത്തില്‍ അഭിനയിക്കുന്നു, രമേശ് ഇന്ദിരയും ശ്രദ്ധേയ കഥാപാത്രമായുണ്ട്. സമ്പാതയാണ് നായിക. വികെ ഫിലിം അസോസിയേഷനും ഗാനിഗ ഫിലിംസും ചേര്‍ന്നാണ് ഈ പ്രോജക്റ്റ് നിര്‍മ്മിച്ചിരിക്കുന്നത്, സച്ചിന്‍ ബസ്രൂര്‍ സംഗീതവും അഭിമന്യു സദാനന്ദന്‍ ദൃശ്യങ്ങള്‍ പകര്‍ത്തിയിരിക്കുന്നു. കരാവലി ഈ വര്‍ഷം അവസാനം റിലീസിനായി ഒരുങ്ങുകയാണ്.