ബ്രഹ്‌മാണ്ഡ സംവിധായകന്‍ എസ് എസ് രാജമൗലി ഒരുക്കുന്ന വാരണാസി ആണ് ഇപ്പോൾ സിനിമാപ്രേമികൾക്കിടയിലെ ചർച്ചാവിഷയം. മഹേഷ് ബാബു നായകനാകുന്ന ചിത്രത്തില്‍ പൃഥ്വിരാജും പ്രധാന വേഷത്തിലെത്തുന്നുണ്ട്. കുംഭ എന്ന വില്ലൻ വേഷത്തിലാണ് പൃഥ്വിരാജ് രാജമൗലി ചിത്രത്തിൽ എത്തുന്നത്. ഇപ്പോഴിതാ രാജമൗലി വാരണാസിയിക്ക് വേണ്ടി നിർമിച്ചിരിക്കുന്ന സെറ്റാണ് ശ്രദ്ധ നേടുന്നത്. ബാഹുബലിയ്ക്കും ആർ ആർ ആറിനും ശേഷം ഞെട്ടിക്കാൻ ഒരുങ്ങുകയാണ് രാജമൗലി. യഥാർത്ഥ വാരാണസി നഗരത്തിൽ ഷൂട്ടിങ് നടത്തുക എന്നത് ബുദ്ധിമുട്ടുള്ള കാര്യമായതിനാൽ, രാജമൗലി ഹൈദരാബാദിൽ വാരാണസി നഗരത്തിന്റെ തനി പകർപ്പ് തന്നെ നിർമ്മിച്ചിരിക്കുകയാണ്. ഏകദേശം 700 അടി നീളത്തിലും 400 അടി വീതിയിലുമുള്ള ഈ സെറ്റ് യഥാർത്ഥ നഗരത്തിന്റെ 70% വലിപ്പത്തിലാണ് ഒരുക്കിയിരിക്കുന്നത്. വിശ്വനാഥ ക്ഷേത്രവും ഘാട്ടുകളും ഹൈദരബാദിലെ വലിയ സെറ്റില്‍ പുനസൃഷ്ടിച്ചത് കണ്ട് പലരും അമ്പരന്നിരിക്കുകയാണ്.കണ്ടാല്‍ ഒറിജിനലാണെന്ന് തോന്നുന്ന തരത്തിലാണ് രാജമൗലി സെറ്റിന് പെര്‍ഫക്ഷന്‍ നല്‍കിയത്. 48 കോടി ചിലവാക്കിയാണ് സെറ്റിന്റെ നിർമാണം എന്നാണ് റിപ്പോർട്ടുകൾ. ഏറ്റവും മികച്ച ആര്‍ട്ട് ഡയറക്ടര്‍മാരിലൊരാളായ സാബു സിറിളാണ് വാരണാസിയുടെ പ്രൊഡക്ഷന്‍ ഡിസൈനര്‍. നഗരത്തിലെ ഇടുങ്ങിയ വഴികളും പുരാതനക്ഷേത്രങ്ങളും ഘട്ടുകളും അതേപടി ഇവിടെ പുനർനിർമ്മിച്ചിട്ടുണ്ട്.അതേസമയം, ചിത്രം 2027 ഏപ്രിൽ ഏഴിന് തിയേറ്ററിൽ എത്തും. ആഗോള തലത്തിൽ ഉൾപ്പെടെ വമ്പൻ റിലീസായിട്ടാണ് വാരണാസി എത്താൻ ഒരുങ്ങുന്നത്. വാരണാസിയുടെ ടൈറ്റില്‍ അനൗണ്‍സ്മെന്‍റ് വീഡിയോ ഏവരെയും അതിശയിപ്പിച്ചിരിക്കുകയാണ്. പല കാലഘട്ടങ്ങളിലും വിവിധ ഭൂഖണ്ഡങ്ങളിലുമായാണ് ചിത്രം കഥ പറയുക എന്നാണ് സൂചന. രാമായണം പോലുള്ള പുരാണങ്ങളും വീഡിയോയില്‍ വലിയ പ്രാധാന്യത്തോടെ കടന്നുവരുന്നുണ്ട്. രാജമൗലിയുടെയും മഹേഷ് ബാബുവിന്റെയും ആരാധകര്‍ ഏറെ നാളായി കാത്തിരിക്കുന്ന ചിത്രമാണിത്. ആര്‍ ആര്‍ ആര്‍ ന് ശേഷമുള്ള അടുത്ത രാജമൗലി ചിത്രമെന്ന രീതിയില്‍ ആഗോളതലത്തില്‍ തന്നെ സിനിമ ശ്രദ്ധിക്കപ്പെടുമെന്നാണ് പ്രതീക്ഷ.മഹേഷ് ബാബുവും ഏറെ നാളായി ഈ ചിത്രത്തിന്റെ പണിപ്പുരയിലാണ്. സിനിമയ്ക്കായി നടന്‍ നടത്തിയ ബോഡി ട്രാന്‍സ്ഫോര്‍മേഷന്‍ ഏറെ ശ്രദ്ധ നേടിയിരുന്നു. ചിത്രത്തിന്റെ ഷൂട്ടിന്റെ ആദ്യ ഷെഡ്യൂള്‍ നേരത്തെ പൂര്‍ത്തിയായിരുന്നു. ചിത്രത്തിന്റെ സഹനിര്‍മാതാവ് കൂടിയായ മഹേഷ് ബാബു സിനിമയ്ക്കായി പ്രതിഫലം വാങ്ങുന്നില്ലെന്ന റിപ്പോര്‍ട്ടുകളുമുണ്ട്. രാജമൗലിയുടെ അച്ഛനും തിരക്കഥാകൃത്തുമായ വിജയേന്ദ്ര പ്രസാദ് ആണ് വാരണാസിക്ക് തിരക്കഥ ഒരുക്കുന്നത്