"ഞാന്‍ പറഞ്ഞ കാര്യങ്ങള്‍ വളച്ചൊടിച്ചു, ചാക്കോച്ചന്‍ എന്നോട് ഒരു തെറ്റും ചെയ്തിട്ടില്ല"
Sunilraj clarifies Kunchacko Boban issue
കുഞ്ചാക്കോ ബോബന്റെ രൂപ ശബ്ദ സാദൃശ്യം കൊണ്ട് ശ്രദ്ധേയനായ കലാകാരനാണ് സുനില്‍രാജ് എടപ്പാള്‍. സുനില്‍ സോഷ്യല്‍ മീഡിയയില്‍ പങ്കിട്ട ഒരു കുറിപ്പ് വലിയ വിവാദമായി മാറി. കുഞ്ചാക്കോ ബോബന്‍ അതിഥി താരമായി എത്തിയ ചിത്രമാണ് 'സുരേശന്റെയും സുമലതയുടെയും ഹൃദയഹാരിയായ പ്രണയകഥ.' ചിത്രത്തില്‍ കുഞ്ചാക്കോ ബോബന്റെ തിരക്ക് മൂലം കുറച്ചുഭാഗങ്ങള്‍ ചെയ്യാന്‍ പറ്റി എന്നാണ് സുനില്‍ സോഷ്യല്‍ മീഡിയയില്‍ കുറിച്ചത്. രതീഷ് ബാലകൃഷ്ണ പൊതുവാള്‍ സംവിധാനം ചെയ്ത 'ന്നാ താന്‍ കേസ് കൊട്' എന്ന സിനിമയുടെ സ്പിന്‍-ഓഫ് ചിത്രമായിരുന്നു സുരേശന്റെയും സുമലതയുടെയും ഹൃദയഹാരിയായ പ്രണയകഥ. സോഷ്യല്‍ മീഡിയ കുറിപ്പ് വിവാദമായതോടെ വിശദീകരണവുമായി എത്തിയിരിക്കുകയാണ് സുനില്‍രാജ്.
സുനില്‍രാജിന്റെ വാക്കുകള്‍:
ഹായ് എല്ലാവര്‍ക്കും നമസ്‌കാരം. ഞാന്‍ നിങ്ങളുടെ സ്വന്തം സുനില്‍ രാജ് എടപ്പാള്‍. എന്തൊക്കെയാണ് ഈ കൊച്ചു കേരളത്തില്‍ നടക്കുന്നത്. ഞാന്‍ പോലും അറിയാതെ ഞാനൊരു അധോലോകമായി മാറിയിരിക്കുകയാണ്. ഇന്ന് രാവിലെ ഒരു പോസ്റ്റ് ഇട്ടു വേറൊന്നുമല്ല, കുറേ ആളുകള്‍ എന്റെ അടുത്ത് ചോദിക്കുന്ന ഒരു ചോദ്യമുണ്ട്, 'നീ ചാക്കോച്ചന്‍ അനുകരിച്ചിട്ട് എന്തു കിട്ടി' അല്ലെങ്കില്‍ 'ഇത്രയും വര്‍ഷം ചാക്കോച്ചന്റെ പുറകെ നടന്നിട്ട് എന്തു നേടി', 'ചാക്കോച്ചനെ കൊണ്ട് നിനക്കെന്താ ഗുണം' എന്നൊക്കെ ചോദിച്ചിട്ട് കുറെ ആളുകള്‍ എന്നെ നെഗറ്റീവ് കമന്റ്‌സ് പറയുന്നുണ്ട്.
നേരത്തെ ഞാനും ചാക്കോച്ചനും ഒരുമിച്ച് വന്ന വേദിയില്‍ ഞാന്‍ അദ്ദേഹത്തെക്കുറിച്ച് പറയുകയുണ്ടായി. ചാക്കോച്ചന്‍ വ്യക്തിപരമായി എനിക്ക് ഒരുപാട് സഹായങ്ങള്‍ ചെയ്തിട്ടുണ്ടിട്ട്. അപ്പോള്‍ കുറെ പേര് ചോദിച്ചു അത് പൈസയായിട്ടാണോ അല്ലെങ്കില്‍ ആശുപത്രി കേസിലാണോ എന്നൊക്കെ. അങ്ങനെയൊന്നുമല്ല എനിക്ക് ചെയ്തിട്ടുള്ള സഹായമാണ്, അദ്ദേഹം ഭയങ്കര ബിസി ആയിരുന്ന സമയത്ത് അദ്ദേഹത്തിന്റെ കുറച്ച് പോര്‍ഷന്‍സ് എന്നുവച്ചാല്‍ സജഷന്‍ ഷോട്ട്, പാച്ച് ഷോട്ട്, ചീറ്റിങ് ഷോട്ട്, ഡ്യൂപ്പ് ഷോട്ട് എന്നൊക്കെ പറയുന്ന പോലെയുള്ള കുറച്ച് സീക്വന്‍സ് എനിക്കൊരു സിനിമയില്‍ ചെയ്യാന്‍ പറ്റി
അദ്ദേഹം ആ സമയത്ത് അമേരിക്കയില്‍ ആയിരുന്നു. അപ്പൊ ആ സിനിമയിലേക്ക് എന്റെ കാര്യം സജസ്റ്റ് ചെയ്തത് അദ്ദേഹം തന്നെയാണ്. അത് വലിയൊരു കാര്യമാണ്. നിങ്ങളെ സംബന്ധിച്ച് എത്രത്തോളം ഉണ്ടെന്ന് എനിക്കറിയില്ല, പക്ഷേ എന്നെ സംബന്ധിച്ച് അത് വലിയ കാര്യമാണ്. കാരണം അദ്ദേഹത്തെ പോലൊരു നടന്‍ എന്റെ പേര് പറയുകയും അവരെന്നെ വിളിക്കുകയും ചെയ്യുക. എനിക്ക് ആ സിനിമയില്‍ നല്ല കാര്യങ്ങളെ ഉണ്ടായിട്ടുള്ളൂ. ഒരു നടനെന്ന നിലയില്‍ കിട്ടേണ്ട ഏറ്റവും വലിയ കാര്യങ്ങളും പിന്തുണയും എനിക്ക് അവര്‍ തന്നു.
ചാക്കോച്ചന്‍ ചെയ്ത നല്ലൊരു ഉപകാരം മറ്റുള്ളവര്‍ അറിയാന്‍ വേണ്ടിയാണ് അങ്ങനെയൊരു പോസ്റ്റ് ഇട്ടത്. പക്ഷെ അത് പുറത്തേക്ക് വന്നപ്പോഴേക്കും നെഗറ്റീവ് ആയി. ഓണ്‍ലൈന്‍ മീഡിയക്കാര്‍ അത് വേറെ രീതിയില്‍ വളച്ചൊടിച്ചു. 'ചാക്കോച്ചനെ കുറിച്ച് സുനില്‍ രാജ് മനസ്സ് തുറക്കുന്നു', 'ചാക്കോച്ചനെ കുറിച്ച് രഹസ്യങ്ങള്‍ പറയുന്നു' അങ്ങനെ എന്തൊക്കെയോ കുറെ പേര് എനിക്ക് അയച്ചു, കാണാന്‍ പറ്റിയിട്ടില്ല ഞാന്‍ കുറച്ച് തിരക്കിലായിരുന്നു
കുറേ കോള്‍സ് വന്നപ്പോഴാണ് ഈ സംഭവം എന്താണെന്ന് അറിയുന്നത്. ചാക്കോച്ചന്‍ എന്നോട് ഒരു തെറ്റും ചെയ്തിട്ടില്ല, അദ്ദേഹം ഉപകാരം അല്ലാതെ ഒരു ഉപദ്രവവും എന്റെ അടുത്ത് ചെയ്തിട്ടില്ല ചെയ്യുകയുമില്ല. ഞാന്‍ അങ്ങോട്ട് ചെയ്‌തെങ്കിലെ ഒള്ളൂ. ഒരിക്കലും ഒരു മനുഷ്യനോടും ഒരു ദ്രോഹവും ചെയ്യാത്ത ഒരു മനുഷ്യനാണ് ചാക്കോച്ചന്‍. മാത്രമല്ല ചാക്കോച്ചന്‍ ലവേഴ്‌സ്, ചാക്കോച്ചന്‍ ഫാന്‍സ് ഇവരൊക്കെ തന്നെ ഒരുപാട് ചാരിറ്റി പ്രവര്‍ത്തനങ്ങള്‍ ചെയ്യുന്നു. ഇനിയിപ്പോ അതെന്താണെന്ന് ഞാന്‍ പറയുന്നില്ല കാരണം അത് പറഞ്ഞു കഴിഞ്ഞാല്‍ മറ്റൊരു വിവാദത്തിലേക്ക് പോകും.
എനിക്കിത്രയേ പറയാനുള്ളൂ, ഞാന്‍ പറഞ്ഞ സത്യങ്ങള്‍ വളച്ചൊടിച്ച് അത് അദ്ദേഹത്തിന് വിഷമം ഉണ്ടാക്കുന്ന രീതിയിലേക്ക് കാര്യങ്ങള്‍ എത്തിക്കരുത്. കാരണം അദ്ദേഹത്തെ പോലുള്ള നല്ല മനുഷ്യനുമായി സൗഹൃദം പുലര്‍ത്താന്‍ കഴിയുക എന്നത് എന്നെ സംബന്ധിച്ചിടത്തോളം വലിയൊരു കാര്യമാണ്.''-സുനില്‍രാജ് പറയുന്നു.