''ഒരു പെണ്കുട്ടിയെ റിക്രൂട്ട് ചെയ്താ നിനക്കെത്ര കിട്ടും!'' ചര്ച്ചകള്ക്ക് തുടക്കമിട്ട് 'ഹാല്' ട്രെയിലര്
ക്രിസ്മസ് റിലീസായി ഡിസംബര് 25ന് ചിത്രം തിയേറ്ററുകളില്;
റിലീസിന് മുമ്പ് തന്നെ ഏറെ സംസാര വിഷയമായി മാറിയ ഷെയ്ന് നിഗം ചിത്രം 'ഹാല്' ട്രെയിലര് പുറത്തിറങ്ങി. പ്രണയ ചിത്രമാണെങ്കിലും മലയാളത്തില് ഇതുവരെ സംസാരിക്കാത്ത രീതിയിലുള്ള ഏറെ വ്യത്യസ്തമായൊരു പ്രമേയവുമായാണ് ചിത്രം എത്തുന്നതെന്നാണ് ട്രെയിലര് നല്കുന്ന സൂചന. യുഎ 16+ സെന്സര് സര്ട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്. ക്രിസ്മസ് റിലീസായി ഡിസംബര് 25ന് ചിത്രം പ്രേക്ഷകരിലേക്ക് എത്തും. വീരയുടെ സംവിധാനത്തില് പുറത്തിറങ്ങുന്ന സിനിമയിലെ ചില രംഗങ്ങള് നീക്കം ചെയ്യണമെന്ന നിര്ദ്ദേശവുമായി സെന്സര് ബോര്ഡ് എത്തിയതോടെയാണ് ചിത്രം അടുത്തിടെ ഏറെ വാര്ത്താപ്രാധാന്യം നേടിയിരുന്നത്.
ക്രിസ്ത്യന്, മുസ്ലിം പ്രണയവും ഇസ്ലാമിക് സ്റ്റേറ്റ് (ഐഎസ്) റിക്രൂട്ടിംഗും, മുസ്ലിം വിരുദ്ധതയും മറ്റുമൊക്കെ ഉള്ക്കൊള്ളിച്ചിട്ടുള്ള ട്രെയിലര് ഒട്ടേറെ ചര്ച്ചകള്ക്ക് തുടക്കമിടുമെന്നുറപ്പാണ്. ഒരു റാപ്പറായാണ് ഷെയ്ന് ചിത്രത്തില് എത്തുന്നത്. ചിത്രത്തില് ബീഫ് ബിരിയാണി കഴിക്കുന്ന രംഗം ഉള്പ്പെടെ 16 ഇടങ്ങളാണ് ചിത്രത്തില് നിന്ന് ഒഴിവാക്കണമെന്ന് സെന്സര്ബോര്ഡ് മുമ്പ് നിര്ദ്ദേശിച്ചിരുന്നു. സെന്സര് ബോര്ഡിന്റെ ഈ നീക്കത്തിനെതിരെ ചിത്രത്തിന്റെ അണിയറപ്രവര്ത്തകര് ഹൈക്കോടതിയെ സമീപിച്ചിരുന്നു. ഹാലിന് പ്രദര്ശനാനുമതി നല്കണമെങ്കില് 16 ഇടങ്ങളില് വെട്ടിക്കുറയ്ക്കലുകള് വരുത്തണമെന്നായിരുന്നു സിബിഎഫ്സിയുടെ നിലപാട്.
എന്നാല് ഇതില് നാല് കട്ടുകള് സിംഗിള് ബെഞ്ച് റദ്ദാക്കിയിരുന്നു. ഇത് ചോദ്യം ചെയ്ത് കൊണ്ട് സിബിഎഫ്സിയും കാത്തലിക് കോണ്ഗ്രസും സമര്പ്പിച്ച അപ്പീലുകള് ഹൈക്കോടതി തള്ളുകയുണ്ടായി. സിംഗിള് ബെഞ്ച് വിധി ഡിവിഷന് ബെഞ്ച് ശരിവെച്ചു. അപ്പീലില് തീരുമാനമെടുക്കാന് ജഡ്ജിമാര് 'ഹാല്' സിനിമ നേരിട്ട് കണ്ടിരുന്നു. സിനിമ ആസ്വദിച്ചു എന്നായിരുന്നു ഡിവിഷന് ബെഞ്ച് അംഗങ്ങളുടെ നിരീക്ഷണം.
ഇത്തരത്തിലുള്ള വിവാദങ്ങള്ക്ക് പിന്നാലെയാണ് ചിത്രത്തിന് യുഎ 16 + സര്ട്ടിഫിക്കറ്റ് ലഭിച്ചത്. സിനിമയില് സാക്ഷി വൈദ്യയാണ് നായികയായി എത്തുന്നത്. ജോണി ആന്റണി, നത്ത്, വിനീത് ബീപ്കുമാര്, കെ. മധുപാല്, സംഗീത മാധവന് നായര്, ജോയ് മാത്യു, നിഷാന്ത് സാഗര്, നിയാസ് ബെക്കര്, റിയാസ് നര്മകാല, സുരേഷ് കൃഷ്ണ, രവീന്ദ്രന്, സോഹന് സീനുലാല്, മനോജ് കെ.യു, ഉണ്ണിരാജ, ശ്രീധന്യ തുടങ്ങിയവരാണ് ചിത്രത്തിലെ മറ്റ് താരങ്ങള്. മലയാളത്തിന് പുറമെ ഹിന്ദി, തെലുങ്ക്, തമിഴ്, കന്നഡ എന്നീ ഭാഷകളിലായി എത്തുന്ന ചിത്രം ജെ വി ജെ പ്രൊഡക്ഷന്സിന്റെ ബാനറിലാണ് ഒരുങ്ങുന്നത്. ഹാലിന്റെ രചന നിര്വഹിച്ചിരിക്കുന്നത് നിഷാദ് കോയയാണ്. തിങ്ക് മ്യസിക്കാണ് മ്യൂസിക് പാര്ട്നര്.
ചിത്രത്തിന്റെ സംഗീതം നിര്വഹിച്ചിരിക്കുന്നത് നന്ദഗോപന് വി ആണ്. ഛായാഗ്രഹണം: രവി ചന്ദ്രന്, എഡിറ്റര്: ആകാശ് ജോസഫ് വര്ഗ്ഗീസ്, ആര്ട്ട് ഡയറക്ടര്: നാഥന്, പ്രശാന്ത് മാധവ്, പ്രൊജക്റ്റ് ഡിസൈനര്: ഷംനാസ് എം അഷ്റഫ്, കോസ്റ്റ്യൂം ഡിസൈന്: ധന്യ ബാലകൃഷ്ണ, തന്വീര് അഹമ്മദ്, പ്രൊഡക്ഷന് കണ്ട്രോളര്: ജിനു പി.കെ, മേക്കപ്പ്: അമല് ചന്ദ്രന്, കോറിയോഗ്രഫി: സാന്ഡി, ഷെരീഫ് മാസ്റ്റര്, ദിനേശ് മാസ്റ്റര്, മാനിഷാദ, ഗാനരചന: വിനായക് ശശികുമാര്, ബിന്സ്, മുത്തു, നീരജ് കുമാര്, മൃദുല് മീര്, അബി, സ്റ്റില്സ്: എസ് ബി കെ ഷുഹൈബ്, രാജേഷ് നടരാജന്, സൗണ്ട് ഡിസൈന്: അനെക്സ് കുര്യന്, സൗണ്ട് മിക്സിങ്: വിഷ്ണു സുജാതന്, വിഎഫ്എക്സ്: ഡോട്ട് വിഎഫ്എക്സ് സ്റ്റുഡിയോസ്, ഡിഐ: കളര്പ്ലാനറ്റ്, ചീഫ് അസോ. ഡയറക്ടര്: മനീഷ് ഭാര്ഗ്ഗവന്, അസോസിയേറ്റ് ഡയറക്ടര്: പ്രവീണ് എസ് വിജയ്, പ്രൊജക്ട് കോ-ഓര്ഡിനേറ്റര്: ജിബു.ജെടിടി, ഷിസാദ്, പബ്ലിസിറ്റി ഡിസൈന്സ്: ടെന് പോയിന്റ്, വിതരണം: ജെവിജെ റിലീസ് ത്രൂ രാജ്സാഗര് ഫിലിംസ്, ഓവര്സീസ് ഡിസ്ട്രിബ്യൂഷന്: ഫാര്സ് ഫിലിംസ്, പി ആര് ഒ: വാഴൂര് ജോസ്, ആതിര ദില്ജിത്ത്.