കടലിന്റെ പശ്ചാത്തലത്തിനായി നിർമ്മിച്ച കൂറ്റൻ വാട്ടർ ടാങ്ക് തകർന്നു ഷൂട്ടിങ് സെറ്റിൽ വെള്ളപ്പൊക്കം

നിഖിൽ സിദ്ധാർഥയെ നായകനാക്കി രാം ചരൺ നിർമിക്കുന്ന 'ദ് ഇന്ത്യ ഹൗസ്' സിനിമയ്ക്കായി ഒരുക്കിയ കൂറ്റൻ വാട്ടർ ടാങ്ക് തകർന്നു വീണ് അസി. ക്യാമറമാൻ ഉൾപ്പടെ അണിയറ പ്രവർത്തകർക്കു പരുക്കേറ്റതായാണ് അറിയാൻ കഴിയുന്നത്. സെറ്റിൽ ക്യാമറ ഉൾപ്പടെയുള്ള മറ്റ് വസ്തുക്കൾക്കും കേടുപാട് പറ്റി.

കടലിന്റെ പശ്ചാത്തലിലുള്ള രംഗം ചിത്രീകരിക്കുന്നതിനായാണ് കൂറ്റൻ ടാങ്ക് നിർമിച്ചത്. ഈ രംഗം ചിത്രീകരിക്കുന്നതിനുള്ള തയാറെടുപ്പ് നടത്തുന്നതിനിടെയാണ് വാട്ടർ ടാങ്ക് തകർന്നത്. വെള്ളം കുത്തിയൊലിച്ചു വന്നതോടെ സെറ്റിൽ വെള്ളപ്പൊക്കത്തിനു സമാനമായ സാഹചര്യമായി. അപകടത്തിന്റെറെ വിഡിയോ സമൂഹ മാധ്യമങ്ങളിൽ വൈറലാണ്.

പ്രൊഡക്ഷൻ ടീം ഇതുവരെ ഔദ്യോഗിക പ്രസ്താവന പുറത്തിറക്കിയിട്ടില്ല, പരിക്കേറ്റവരുടെ അവസ്ഥയെക്കുറിച്ചുള്ള അപ്‌ഡേറ്റുകൾ ഇപ്പോഴും വ്യക്തമായിട്ടില്ല. നവാഗതനായ റാം വംശി കൃഷ്ണ സംവിധാനം ചെയ്യുന്ന ദി ഇന്ത്യ ഹൗസ്, റാം ചരൺ നിർമ്മാതാവായ അരങ്ങേറുന്ന ആദ്യ പ്രോജക്റ്റ് ആണ്. മുതിർന്ന നടൻ അനുപം ഖേറും ചിത്രത്തിൽ വേഷമിടുന്നുണ്ട്. ഇന്ത്യൻ സ്വാതന്ത്ര്യസമരത്തിൽ വേരൂന്നിയ ഒരു ചരിത്ര നാടകമാണ് ചിത്രമെന്നാണ് പറയപ്പെടുന്നത്. ചിത്രത്തിന്റെ ടീസർ ഇതിനകം തന്നെ ജനങ്ങൾ ഏറ്റെടുത്തുകഴിഞ്ഞിരുന്നു.