അഭിനേതാവിന് ഏറ്റവും വലിയ ലഹരി അഭിനയമായിരിക്കണം : ഗിന്നസ് പക്രു

കൊച്ചി: സിനിമാ മേഖലയെ തകർക്കുന്ന വിധത്തിൽ തുക വാങ്ങുന്നതിനോട് താൽപ്പര്യം ഇല്ലെന്ന് വ്യക്തമാക്കി ഗിന്നസ് പക്രു. കൂടാതെ ലഹരി ഉപയോഗത്തേക്കുറിച്ചും അദ്ദേഹം സംസാരിച്ചു. 916 കുഞ്ഞൂട്ടൻ എന്ന സിനിമയുടെ പ്രചാരണാർഥം പ്രസ് ക്ലബ്ബിൽ നടത്തിയ പത്രസമ്മേളനത്തിൽ സംസാരിക്കുകയായിരുന്നു അദ്ദേഹം.

അഭിനേതാവിനെ സംബന്ധിച്ചിടത്തോളം ഏറ്റവും വലിയ ലഹരി അഭിനയമായിരിക്കണം, കലമാത്രമായിരിക്കണം ലഹരി, മറ്റൊരു ലഹരിയും പ്രോത്സാഹിപ്പിക്കില്ലെന്ന് അദ്ദേഹം അഭിപ്രായം വ്യക്തമാക്കി. ഈ കാര്യത്തിൽ സിനിമയിലെ മുതിർന്ന താരങ്ങളും സിനിമാസംഘടനകളും കൃത്യമായ നിലപാട് എടുത്തിട്ടുണ്ട്.

സ്കൂ‌ളുകളിൽ പോലും ഇന്ന് ലഹരി വ്യാപകമായി കടന്നു കയറിയെന്ന വാർത്തകൾ ഭയപ്പെടുത്തുന്നു. ഈ തെറ്റുകളിൽ കുട്ടികൾ വീഴാതിരിക്കാൻ താരങ്ങളടക്കം മുൻനിരയിൽ പ്രതിരോധവുമായി ഉണ്ടാകണമെന്നും അദ്ദേഹം കൂട്ടിച്ചേർത്തു. 

സിനിമയിലെ താരങ്ങളുടെ തുക നിശ്ചയിക്കുന്നത് അവർ തന്നെയാണ്. മേഖലയെ തകർക്കുന്ന തരത്തിൽ തുക വാങ്ങുവാൻ പാടില്ലെന്നും പക്രു പറഞ്ഞു.