വേദിയിൽ കുഴഞ്ഞുവീണ് നടൻ വിശാൽ; ആശുപത്രിയിൽ പ്രവേശിപ്പിച്ച നടന്റെ ആരോഗ്യ നില ഇപ്പോൾ തൃപ്തികരം

തമിഴ് നടൻ വിശാൽ വില്ലുപുരത്ത് നടന്ന ഒരു പൊതുപ്രോഗ്രാമിനിടെ വേദിയിൽ കുഴഞ്ഞുവീണു. വിശാലിനെ ഉടൻ സമീപത്തുള്ള സ്വകാര്യ ആശുപത്രിയിലേക്ക് മാറ്റി. ഇപ്പോൾ അദ്ദേഹത്തിന്റെ നില തൃപ്തികരമാണ്. മെയ് 11-നാണ് സംഭവം. പൂർണ്ണ ആരോഗ്യമല്ലാതിരുന്നിട്ടും 'മിസ് കൂവഗം' എന്ന ട്രാൻസ്‌ജെൻഡർ സൗന്ദര്യ മത്സരത്തിൽ പങ്കെടുക്കാൻ എത്തിയതായിരുന്നു വിശാൽ. വേദിയിൽ സംസാരിക്കുമ്പോഴാണ് അദ്ദേഹം കുഴഞ്ഞുവീണത്.

താരത്തിന് ഉയർന്ന പനിയും ക്ഷീണവുമുണ്ടായിരുന്നു. നേരത്തെ ഭക്ഷണം കഴിക്കാതിരുന്നതും തിരക്കുള്ള ഷെഡ്യൂളുമാണ് ആരോഗ്യപ്രശ്നങ്ങൾ വർദ്ധിപ്പിച്ചതെന്ന് വിശാലിന്റെ മാനേജർ ഹരി കൃഷ്ണൻ വ്യക്തമാക്കി. 2025 ജനുവരിയിൽ വിശാൽ ഡെങ്കിപ്പനിക്ക് ചികിത്സ തേടിയിരുന്നു. അതിന് ശേഷമുള്ള പരിപാടികളിലും അദ്ദേഹം ആരോഗ്യപ്രശ്നങ്ങൾ നേരിട്ടിരുന്നു. എന്നാൽ, തന്റെ ആരോഗ്യത്തെക്കുറിച്ചുള്ള അഭ്യൂഹങ്ങൾ താരം തന്നെ നിഷേധിച്ചു. സാധാരണ പനി ആയിരുന്നെന്നും താൻ സുഖംപ്രാപിച്ചുവെന്നും വിശാൽ വ്യക്തമാക്കിയിരുന്നു. വിശാൽ അവസാനമായി അഭിനയിച്ച 'മധ ഗജ രാജ' എന്ന ചിത്രം 2025 ജനുവരി 12-ന് റിലീസ് ചെയ്തു. ഇത് വലിയ വിജയമായിരുന്നു. ചിത്രം ലോകമാകെ 56 കോടി രൂപ സമ്പാദിച്ചു. അതിൽ 53.5 കോടി തമിഴ്‌നാട്ടിലും 2.5 കോടി അന്താരാഷ്ട്ര വിപണിയിലുമാണ് ലഭിച്ചത്.