ഇഷ്ടമില്ലായ്മ മറ്റുള്ളവരിലും അടിച്ചേൽപിക്കുന്നത് അംഗീകരിക്കാൻ കഴിയില്ല: വിമർശനവുമായി അസീസ് നെടുമങ്ങാട്
സിനിമാ റിവ്യൂ നടത്തുന്നവരെ വിമർശിച്ച് നടൻ അസീസ് നെടുമങ്ങാട്. സിനിമാ റിവ്യു നടത്തുന്നവർ അവരുടെ ഇഷ്ടമില്ലായ്മ മറ്റുള്ളവരിലും അടിച്ചേൽപിക്കുന്നത് അംഗീകരിക്കാൻ കഴിയില്ലെന്നാണ് അസീസ് നെടുമങ്ങാട് തുറന്നടിച്ച്. ദിലീപിൻ്റെ ഏറ്റവും പുതിയ ചിത്രം പ്രിൻസ് ആൻഡ് ഫാമിലിയ്ക്ക് ചിലർ നൽകിയ റിവ്യുവിനെതിരെയായിരുന്നു അസീസിന്റെ പ്രതികരണം. റിവ്യൂ കണ്ട് തെറ്റിദ്ധരിക്കപ്പെട്ടെന്നാണ് അസീസ് പ്രതികരിച്ചത്. ചിത്രത്തിന്റെ റിവ്യൂ കണ്ടപ്പോൾ സിനിമ കൊള്ളില്ലെന്ന് തെറ്റിദ്ധരിച്ചെന്നും സുഹൃത്തുക്കൾ പറഞ്ഞപ്പോഴാണ് നല്ല സിനിമയാണെന്ന് തിരച്ചറിഞ്ഞതെന്നും അസീസ് പറയുന്നു. അതിനുശേഷം തിയറ്ററിൽ സിനിമ കണ്ടപ്പോൾ അടുത്തകാലത്തിറങ്ങിയ മനോഹരമായ ദിലീപ് ചിത്രമായി അനുഭവപ്പെട്ടെന്നും അസീസ് കുറിച്ചു.
അസീസിന്റെ വാക്കുകൾ: "റിവ്യു എന്നത് ഒരാളുടെ അഭിപ്രായമാണ്. ആ അഭിപ്രായം പറയുന്നതിൽ ഒരു തെറ്റും ഇല്ല. പക്ഷേ സ്വന്തം ഇഷ്ടമില്ലായ്മ മറ്റുള്ളവരിലും അടിച്ചേൽപിക്കുക എന്നത് അംഗീകരിക്കാൻ പറ്റാത്ത കാര്യമാണ്. പ്രിൻസ് ആൻഡ് ഫാമിലി എന്ന സിനിമയുടെ റിവ്യു കണ്ടപോൾ സിനിമ കൊള്ളില്ലെന്ന് ഞാനും തെറ്റിദ്ധരിച്ചുപോയി. പക്ഷേ, കുറച്ച് സുഹൃത്തുക്കൾ സിനിമ കണ്ടിട്ട് ദിലീപേട്ടന്റെ കുറച്ച് നാളുകൾക്കു ശേഷം നല്ലൊരു സിനിമ കണ്ടു എന്ന് അവർ പറഞ്ഞു. ഞാനും പോയി പടം കണ്ടു. പ്രിയ റിവ്യൂ ഇടുന്ന സുഹൃത്തുക്കളെ, ഇത്രയും മനോഹരമായ സിനിമയെ നിങ്ങൾ ഇങ്ങനെ പറഞ്ഞല്ലോ എന്ന് ഓർക്കുമ്പോൾ വിഷമം തോന്നുവാ! ഞാൻ ഈ സിനിമയിൽ അഭിനയിച്ചിട്ടില്ല. ഇങ്ങനെ അഭിപ്രായം പറഞ്ഞിട്ട് എനിക്ക് ഒന്നും കിട്ടാനും പോകുന്നില്ല. നല്ലതിനെ നല്ലതായി അംഗീകരിക്കാനുള്ള മനസ്സുണ്ടായാൽ മതി. അടിപൊളി സിനിമ ധൈര്യമായിട്ട് ഫാമിലിയുമായി പോയി കാണാം ഓൾ ദി ബെസ്‌റ്റ് ദിലീപേട്ടാ."