'എന്നോട് ഇതുവരെ ആരും ഇങ്ങനെ ചെയ്തിട്ടില്ല' സൂരിയെക്കുറിച്ച് വികാരാധീനനായി ഉണ്ണിമുകുന്ദൻ

തമിഴ് നടൻ സൂരിയെക്കുറിച്ച് വികാരഭരിതനായി ഉണ്ണിമുകുന്ദൻ. സൂരി, ഐശ്വര്യ ലക്ഷ്മി , സ്വാസിക തുടങ്ങിയവർ ചേർന്നഭിനയിക്കുന്ന മാമൻ എന്ന തമിഴ് ചിത്രത്തിൻറെ പ്രാചരണ പരിപാടികൾക്കായി ചിത്രത്തിൻറെ ടീം കേരളത്തിലെത്തിയിരുന്നു. ചടങ്ങിൽ മുഖാതിഥിയായി എത്തിയതാണ് ഉണ്ണിമുകുന്ദൻ.ചിത്രത്തിൻറെ ടീമിനൊപ്പം ഉണ്ണിമുകുന്ദൻ മാധ്യമങ്ങളോട് സംസാരിക്കുമ്പോൾ ഉണ്ണി മുകുന്ദൻ പറഞ്ഞ വാക്കുകൾ ആണിപ്പോൾ ശ്രദ്ധയാകുന്നത്.

ഉണ്ണിമുകുന്ദൻ നായകനായ മാർക്കോ സിനിമ തമിഴിൽ റിലീസ് ചെയ്തപ്പോൾ സൂരി അയച്ച ആശംസാ സന്ദേശത്തെക്കുറിച്ച് പറഞ്ഞുകൊണ്ടാണ് തന്നോട് ഇതുവരെ അങ്ങനെ ആരും ചെയ്തിട്ടില്ലെന്ന് പറഞ്ഞ് ഉണ്ണിമുകുന്ദൻ വികാരാധീതനായത്. "എന്റെ വ്യക്തിപരമായ ഒരനുഭവം പറയാം. എനിക്ക് പുള്ളിയോടുള്ള താത്പര്യം എന്തുകൊണ്ടാണെന്ന് ഞാൻ പറയാം. മാർക്കോ എന്ന ചിത്രത്തിന്റെ റിലീസുമായി ബന്ധപ്പെട്ട് എങ്ങനെ പ്രൊമോട്ട് ചെയ്യണം എന്ന് ചിന്തിച്ചിരിക്കുന്ന സമയമാണ്. മലയാളത്തിലും ഹിന്ദിയിലും ചിത്രം റിലീസായി. പെട്ടന്നൊരു ദിവസം നോക്കുമ്പോൾ എനിക്കൊരു വീഡിയോ മെസ്സേജ് വന്നു. തമിഴിൽ സിനിമ റിലീസാവുന്ന സമയത്ത് സൂരി സാർ ആശംസയറിയിച്ച് അയച്ചതായിരുന്നു. അദ്ദേഹത്തെ ഞാൻ മാർക്കോയുമായി ബന്ധപ്പെട്ട് വിളിക്കുകയോ കണ്ടിട്ടോ ഒരു കാര്യവും ആവശ്യപ്പെട്ടിട്ടുമില്ല.എന്റെ അനിയന്റെ ഒരു സിനിമ തമിഴിൽ റിലീസ് ആവുകയാണ്. ഈ സിനിമ എല്ലാവരും കാണണമെന്നുപറഞ്ഞാണ് അദ്ദേഹം മെസേജ് അയച്ചത്. എന്റെ ജീവിതത്തിൽ എന്നോട് ഇങ്ങനെ ആരും ചെയ്തിട്ടില്ല. പക്ഷേ നിങ്ങളത് ചെയ്തു. അതെനിക്ക് മറക്കാൻ പറ്റില്ല. എന്നെ സംബന്ധിച്ച് മാമൻ എന്ന സിനിമ വലിയ ഹിറ്റാവണമെന്ന് ആ​ഗ്രഹിക്കുകയാണ്." ഇങ്ങനെയാണ് ഉണ്ണിമുകുന്ദൻ പറഞ്ഞ വാക്കുകൾ.

കഴിഞ്ഞവർഷം ദുരൈ സെന്തിൽ കുമാർ സംവിധാനം ചെയ്ത ​ഗരുഡൻ എന്ന ചിത്രത്തിൽ സൂരിയും ഉണ്ണി മുകുന്ദനും ഒരുമിച്ചഭിനയിച്ചിരുന്നു. ശശികുമാറായിരുന്നു മറ്റൊരു പ്രധാനവേഷത്തിൽ. ചിത്രത്തിൽ സൂരി നായകനും ഉണ്ണി മുകുന്ദൻ വില്ലനുമായിരുന്നു. ഈ ചിത്രത്തിന്റെ സെറ്റിൽവെച്ചാണ് തങ്ങൾ പരിചയപ്പെട്ടതെന്ന് ഉണ്ണി പറഞ്ഞു.

പ്രശാന്ത് പാണ്ഡ്യരാജ് സംവിധാനം ചെയ്ത സൂരി നായകനാകുന്ന ചിത്രമാണ് മാമൻ. നടൻ സൂരി തന്നെയാണ് ചിത്രത്തിന് കഥയെഴുതിയിരിക്കുന്നതും. ഐശ്വര്യ ലക്ഷ്മിയാണ് ചിത്രത്തിലെ നായിക.