'ഒരു സംശയവുമില്ലാതെ ഞാൻ പറയും ഫഹദ് ഫാസിൽ': ആരോടൊപ്പം അഭിനയിക്കാനാണ് ആഗ്രഹം എന്ന ചോദ്യത്തിന് മറുപടി നൽകി തൃഷ

അഭിനയത്തിലെ സൂക്ഷ്മത കൊണ്ട് മലയാളികളുടേതെന്നതുപോലെ കേരളത്തിനപ്പുറമുള്ള ആരാധകരുടെയും പ്രശംസ പിടിച്ചുപറ്റിയ താരമാണ് ഫഹദ് ഫാസിൽ.ഭാഷയുടെ അതിർവരമ്പുകൾ തകർത്ത് ഇന്ത്യയിലാകെ ആരാധകരെയുണ്ടാക്കിയെടുക്കാൻ നടന് കഴിഞ്ഞിട്ടുമുണ്ട്. ഏതു തരം കഥാപാത്രവും തന്റെ കൈകളിൽ ഭദ്രമാണെന്ന് താരം ഇതിനോടകം തന്നെ തീലിയിച്ചിട്ടുമുണ്ട്.

ഇപ്പോഴിതാ ഫഹദ് ഫാസിലിന്റെ ആരാധികയാണ് താനെന്നും നടനൊപ്പം അഭിനയിക്കാൻ ആഗ്രഹമുണ്ടെന്നും പറയുകയാണ് തെന്നിന്ത്യൻ നായിക തൃഷ. തഗ് ലൈഫ് എന്ന പുതിയ സിനിമയുടെ പ്രൊമോഷൻ ഇവൻ്റിൽ വെച്ചാണ് നടി ഇക്കാര്യം അറിയിച്ചത്.

'ഏത് മലയാളം നടനോടൊപ്പമാണ് അഭിനയിക്കാൻ ഏറെ ആഗ്രഹം' എന്ന അവതാരകയുടെ ചോദ്യത്തിന് 'ഒരു സംശയവുമില്ലാതെ ഞാൻ പറയും ഫഹദ് ഫാസിൽ' എന്നായിരുന്നു തൃഷയുടെ മറുപടി. നടനൊപ്പം ഏത് ഴോണറിലുള്ള സിനിമ ചെയ്യുവാനാണ് ആഗ്രഹം എന്ന് ചോദിച്ചപ്പോൾ 'അങ്ങനെ പറയുവാൻ കഷ്‌ടമാണ്. എന്തുതരം സിനിമയാണെങ്കിലും അദ്ദേഹം ഗംഭീരമായാണ് ചെയ്യുന്നത്. ആവേശമാണ് ഈ അടുത്ത് കണ്ടതിൽ ഏറ്റവും ഇഷ്‌ടപ്പെട്ട ചിത്രം. ഏതെങ്കിലും ഒരു ഴോണർ എന്നില്ല, അദ്ദേഹത്തിനൊപ്പം വർക്ക് ചെയ്യാൻ ഞാൻ ഏറെ ആഗ്രഹിക്കുന്നു,' എന്നും തൃഷ മറുപടി നൽകി.

കഴിഞ്ഞ ദിവസം കാൻ ചലച്ചിത്ര മേളയോട് അനുബന്ധിച്ച് ബ്രൂട്ടിന് നൽകിയ അഭിമുഖത്തിൽ ബോളിവുഡ് താരം ആലിയ ഭട്ടും ഫഹദിനൊപ്പം അഭിനയിക്കണം എന്ന ആഗ്രഹം പങ്കുവെച്ചിരുന്നു. 'ഫഹദ് ഫാസിലിന്റെ അഭിനയം എനിക്ക് വളരെ ഇഷ്ടമാണ്. അദ്ദേഹം അസാധ്യ നടനാണ്. ആവേശം സിനിമ എന്റെ ഇഷ്ട ചിത്രങ്ങളിൽ ഒന്നാണ്. ഫഹദിനൊപ്പം പ്രവർത്തിക്കാൻ എനിക്ക് ആഗ്രഹമുണ്ട്,' എന്നാണ് ആലിയ പറഞ്ഞത്.

മലയാള ചിത്രങ്ങൾക്കൊപ്പം തന്നെ അല്ലു അർജുന്റെ പുഷ്പ പോലുള്ള ചിത്രങ്ങളിലെ ഫഹദ് ചെയ്ത കഥാപാത്രങ്ങളും കേരളത്തിനു പുറത്ത് ഫഹദിന്റെ പോപുലാരിറ്റി വർധിപ്പിക്കാൻ സഹായിച്ചിട്ടുണ്ട്.

അതേസമയം അൽത്താഫ് സലിം ഒരുക്കുന്ന ഫഹദിൻ്റെ അടുത്ത ചിത്രം ഓടും കുതിര ചാടും കുതിര ഓണം റിലീസായി തിയേറ്ററുകളിലെത്തുകയാണ്. ഞണ്ടുകളുടെ നാട്ടിൽ ഒരിടവേളയ്ക്ക് ശേഷം രണ്ടാം അൽത്താഫ് ഒരുക്കുന്ന ചിത്രമാണ് ഓടും കുതിര ചാടും കുതിര. ആഷിഖ് ഉസ്മാൻ പ്രൊഡക്ഷൻസിൻ്റെ ബാനറിൽ ആഷിഖ് ഉസ്മാനാണ് ചിത്രം നിർമ്മിക്കുന്നത്. ധ്യാൻ ശ്രീനിവാസൻ, വിനയ് ഫോർട്ട്, ലാൽ, രൺജി പണിക്കർ, റാഫി, ജോണി ആൻ്റണി, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാർ, സാഫ് ബോയ്, ലക്ഷ്മ്‌മി ഗോപാലസ്വാമി, ആതിര നിരഞ്ജന തുടങ്ങിയവരാണ് സിനിമയിലെ മറ്റു പ്രധാന വേഷങ്ങളിലെത്തുന്നത്.