സൈമ അവാര്‍ഡ്‌സ് 2025: മാര്‍ക്കോ'യിലൂടെ മികച്ച നവാഗത നിര്‍മ്മാതാവിനുള്ള സൈമ പുരസ്‌കാരം സ്വന്തമാക്കി ക്യൂബ്സ് എന്റര്‍ടെയ്ന്‍മെന്റ്‌സ് സാരഥി ഷരീഫ് മുഹമ്മദ്
ക്യൂബ്സ് ഇന്റര്‍നാഷണല്‍ ഗ്രൂപ്പിന്റെ സ്ഥാപകനും മാനേജിംഗ് ഡയറക്ടറുമായ ഷരീഫ് മുഹമ്മദിന്റേതായി നിലവില്‍ ഇന്ത്യ, യുഎഇ, ഖത്തര്‍ എന്നിവിടങ്ങളിലായി 9 സ്ഥാപനങ്ങള്‍ പ്രവര്‍ത്തിക്കുന്നുണ്ട്.;
'മാര്‍ക്കോ' സിനിമയുടേയും ഇറങ്ങാനിരിക്കുന്ന 'കാട്ടാളന്‍' സിനിമയുടേയും പ്രൊഡ്യൂസറായ ഷരീഫ് മുഹമ്മദിനെ തേടി സൈമ അവാര്‍ഡ്‌സ് 2025 മികച്ച നവാഗത നിര്‍മ്മാതാവിനുള്ള പുരസ്‌കാരം. ദുബായ്-ല്‍ വെച്ച് നടന്ന ചടങ്ങിലാണ് 'മാര്‍ക്കോ' എന്ന സിനിമ നിര്‍മ്മിച്ചതിലൂടെ മികച്ച നവാഗത നിര്‍മ്മാതാവിനുള്ള പുരസ്‌കാരം ഷരീഫ് മുഹമ്മദിനെ തേടിയെത്തിയത്. സൈമ അവാര്‍ഡ്‌സില്‍ മലയാളത്തില്‍ നിന്നും പൃഥ്വിരാജ് സുകുമാരനാണ് മികച്ച നടനായി തിരഞ്ഞെടുക്കപ്പെട്ടത്. തെലുങ്കില്‍ നിന്ന് അല്ലു അര്‍ജ്ജുനും തമിഴില്‍ നിന്ന് ശിവകാര്‍ത്തികേയനും കന്നഡയില്‍ നിന്ന് സുധീപും മികച്ച നടന്മാര്‍ക്കുള്ള പുരസ്‌കാരം നേടി. മലയാളത്തില്‍ നിന്ന് മികച്ച നടിക്കുള്ള പുരസ്‌കാരം ഉര്‍വശിക്കും തമിഴില്‍ നിന്ന് മികച്ച നടിക്കുള്ള പുരസ്‌കാരം സായ് പല്ലവിയും കന്നഡയില്‍ നിന്ന് മികച്ച നടിക്കുള്ള പുരസ്‌കാരം അഷിഖ രംഗനാഥിനും ലഭിച്ചു. ഇവരെ കൂടാതെ നിരവധി പ്രമുഖ താരങ്ങളും സാങ്കേതിക വിദഗ്ധരും അവാര്‍ഡ് വേദിയില്‍ പുരസ്‌കാരങ്ങള്‍ കരസ്ഥമാക്കുകയുണ്ടായി.
ക്യൂബ്സ് എന്റര്‍ടെയ്ന്‍മെന്റ്‌സിന്റെ ബാനറില്‍ ഷെരീഫ് മുഹമ്മദ് ആദ്യമായി നിര്‍മ്മിച്ച് ഹനീഫ് അദേനി തിരക്കഥയെഴുതി സംവിധാനം ചെയ്ത ഉണ്ണി മുകുന്ദന്‍ നായകനായ 'മാര്‍ക്കോ' മലയാളത്തിലെ തന്നെ ഏറ്റവും വയലന്‍സ് നിറഞ്ഞ ആക്ഷന്‍ ചിത്രമായാണ് പ്രേക്ഷകരിലേക്ക് എത്തിയത്. തിയേറ്ററുകളില്‍ 100 ദിനം പിന്നിട്ട് ചരിത്ര നേട്ടത്തില്‍ എത്തുകയും 100 കോടി ക്ലബ്ബിലും ചിത്രം കയറുകയുമുണ്ടായി. നിര്‍മ്മിച്ച ആദ്യ സിനിമ തന്നെ വിതരണം ചെയ്തുകൊണ്ട് ക്യൂബ്സ് എന്റര്‍ടെയ്ന്‍മെന്റ്‌സ് വ്യത്യസ്തത പുലര്‍ത്തുകയുമുണ്ടായി. അടുത്തതായി 'കാട്ടാളന്‍' എന്ന ചിത്രത്തിലൂടെ ഞെട്ടിക്കാന്‍ ഒരുങ്ങുകയുമാണ് ക്യൂബ്സ് എന്റര്‍ടെയ്ന്‍മെന്റ്‌സ്.
ക്യൂബ്സ് ഇന്റര്‍നാഷണല്‍ ഗ്രൂപ്പിന്റെ സ്ഥാപകനും മാനേജിംഗ് ഡയറക്ടറുമായ ഷരീഫ് മുഹമ്മദിന്റേതായി നിലവില്‍ ഇന്ത്യ, യുഎഇ, ഖത്തര്‍ എന്നിവിടങ്ങളിലായി 9 സ്ഥാപനങ്ങള്‍ പ്രവര്‍ത്തിക്കുന്നുണ്ട്. ക്യൂബ്സ് എന്റര്‍ടെയ്ന്‍മെന്റ്‌സിന് കീഴില്‍ നിര്‍മ്മിച്ച ആദ്യ സിനിമയായ 'മാര്‍ക്കോ' വന്‍ വിജയമായതിന് പിന്നാലെ 'കാട്ടാളന്‍' എന്ന ആന്റണി വര്‍ഗ്ഗീസ് പെപ്പെ ചിത്രവും അണിയറയില്‍ ഒരുങ്ങിക്കൊണ്ടിരിക്കുകയാണ്. ക്യൂബ്സ് ഇന്റര്‍നാഷണലിന് കീഴില്‍ ലോജിസ്റ്റിക്‌സ്, മീഡിയ പ്രൊഡക്ഷന്‍, ഷിപ്പിംഗ്, സിവില്‍, ജനറല്‍ ട്രേഡിംഗ്, ഇന്റീരിയര്‍ ഡിസൈനിംഗ്, കണ്‍സ്ട്രക്ഷന്‍ തുടങ്ങിയ മേഖലകളില്‍ സജീവമാണ് തൃശ്ശൂരിലെ തളിക്കുളം സ്വദേശിയായ ഷരീഫ് മുഹമ്മദ്.
നവാഗതനായ പോള്‍ ജോര്‍ജ്ജ് സംവിധാനം നിര്‍വ്വഹിക്കുന്ന ചിത്രത്തില്‍ പെപ്പെ തന്റെ യഥാര്‍ത്ഥ പേരായ 'ആന്റണി വര്‍ഗ്ഗീസ്' എന്ന പേരില്‍ തന്നെയാണ് എത്തുന്നതെന്ന പ്രത്യേകതയുണ്ട്. മറ്റു ഭാഷ ചിത്രങ്ങള്‍ പോലെ മലയാളം സിനിമകളെ വേറൊരു തലത്തില്‍ എത്തിക്കാന്‍ പോന്ന സാങ്കേതിക മികവും, പ്രൊഡക്ഷന്‍ ക്വാളിറ്റിയും നല്‍കി കൊണ്ട് 'മാര്‍ക്കോ' പോലെയോ അതിനേക്കാള്‍ ഉയരത്തിലോ ഇനിയും വിജയങ്ങള്‍ ഒരുക്കാനുള്ള തയ്യാറെടുപ്പിലുമാണ് ക്യൂബ്സ് എന്റര്‍ടെയ്ന്‍മെന്റ്‌സ്.